Read Uzbek Muqaddas Kitob Mixo 2 Bible Online

Mixo 2 - Uzbek Muqaddas Kitob bible

Mixo 2

¹Ey toʻshagida yotib, yovuzlikni rejalashtirganlar![25] Sizning holingizga voy! Tong otganda siz Rejalaringizni amalga oshirasiz. Ha, bu sizning qoʻlingizdan keladi.

²Sizlar birovning ekinzoriga koʻz olaytirib, Uni tortib olasiz. Birovning uyini yoqtirib qolib, Uni oʻzingizniki qilib olasiz. Birini oʻz uyidan, Boshqasini meros qilib olgan yeridan mahrum etasiz.

³Shu sababdan Egamiz demoqda: “Men sizlarga qarshi falokatni reja qilyapman. Sizlar boʻyinturuqdan qochib qutulolmaysiz, Burningizni osmonga koʻtarib yurmaysiz. Bu ogʻir damlar boʻladi.”

⁴Oʻsha vaqt kelganda, sizlarni masxara qilib, Odamlar shunday achchiq marsiya kuylashadi: “Biz merosimizdan mahrum boʻldik! Dalalarimiz dushmanlarga[26] boʻlib berildi. Endi biz butunlay xarob boʻldik!”

⁵Shunday ekan, Egamizning xalqi qaytadan boʻlganda yurtni, Ulush qilib olmaysiz siz bir parcha yerni.

⁶Sizlar menga aql oʻrgatib deyapsiz: “Bizga aql oʻrgatma! Nafasingni issiq qil, Biz sharmanda boʻlmaymiz.”

⁷Ey Yoqub nasli[27], sizlar aytasiz: “Nahotki Egamizning sabri tugagan boʻlsa?! Nahotki Xudo shunday ishlarni qilsa?!” Bu soʻzlarni aytishingiz joizmi?! Axir, Xudoning soʻzlari toʻgʻri odamga yaxshilik keltiradi — ku!

⁸Egamiz demoqda: “Sizlar oʻz xalqingizga zulm qildingiz! Xotirjam yurgan odamning qadamini poyladingiz. Jangda talafot koʻrgan odamga oʻxshatib, Uning egnidagi toʻnini yechib oldingiz.

⁹Xalqimning ayollarini shinam uylaridan chiqarib yubordingiz, Farzandlarining nasibasini Mening yurtimdan uzdingiz[28].

¹⁰Qani, turinglar, ketinglar bu yerdan! Orom topa olmaysiz endi bu yurtda! Axir, qilgan gunohlaringiz yurtimni harom qildi, Yurtimning xarob boʻlishiga sabab boʻldi.

¹¹Bordi — yu, oldingizga yolgʻonchi odam kelsa, — Sharob, boʻzadan va’z aytaman, — deb aytsa, Sizlar uni paygʻambar deya qabul qilasiz!

¹²Ey Yoqub nasli[29], Men sizlarni albatta yigʻaman, Ey Isroilning omon qolganlari, Men sizlarni toʻplab olaman. Qoʻradagi qoʻylarday, yaylovdagi suruvday, Sizlarni Men bir joyga yigʻaman. Oʻshanda yurtingiz odamlarga toʻlib — toshadi.

¹³Men Yoʻlboshchingiz boʻlib, sizlarga yoʻl ochaman, Sizlarni surgundan olib chiqaman. Sizlar shahar darvozasidan chiqib ketasiz. Men, Shohingiz sizlarni boshlab boraman. Men, Egangiz, oldinda yuraman.”