Read Uzbek Muqaddas Kitob Mixo 3 Bible Online

Mixo 3 - Uzbek Muqaddas Kitob bible

Mixo 3

¹Men shunday dedim: “Ey Yoqub naslining yoʻlboshchilari, eshiting! Ey Isroil[30] hukmdorlari, quloq soling! Adolat oʻrnatish sizning vazifangiz — ku!

²Sizlar esa yaxshilikdan nafratlanasiz, Qabihlikka mehr qoʻyasiz, Siz xalqimning terisini shilib, Etini suyagidan ajratib olasiz.

³Siz xalqimning etini yeysiz, Terisini shilib, suyaklarini maydalaysiz, Qozonga solinadigan goʻshtday ularni nimtalaysiz.

⁴Vaqti kelib, Egamizga iltijo qilasiz, Oʻshanda Xudodan javob olmaysiz. Sizlar qabihlarcha ish tutdingiz, Shu bois U sizlardan yuz oʻgiradi.”

⁵Egamiz shunday demoqda: “Ey xalqimni yoʻldan ozdirgan paygʻambarlar! Sizlar qorningizni toʻygʻizganlarga tinchlikni bashorat qilasiz, Ogʻzingizni moylamaganlarga esa urushni e’lon qilasiz.

⁶Endi ustingizga tun bostirib keladi, Sizlar vahiylarni koʻrmaysiz. Qaro zulmat sizni oʻrab oladi, Bashorat qilishingizga imkon boʻlmaydi. Sizlar uchun quyosh botadi, Kunduz ham zulmat boʻladi.

⁷Sharmanda boʻlasiz, ey valiylar, Uyatga qolasiz, ey folchilar. Mendan soʻz olmaganingiz uchun Ogʻzingizni ocholmay qolasiz.”

⁸Ammo mening vujudim kuchga toʻlgan, Egamizning Ruhi meni toʻldirgan. Qudrat va adolatga toʻlganman. Endi men Yoqub naslining itoatsizligini fosh qilaman, Isroil[31] xalqining gunohini yuziga solaman.

⁹Ey Yoqub naslining yoʻlboshchilari, eshiting! Ey Isroil hukmdorlari, quloq soling! Sizlar adolatdan hazar qilasiz, Haqiqatni buzib koʻrsatasiz.

¹⁰Qonlar evaziga barpo qildingiz Quddusni, Zulm evaziga bunyod etdingiz Sionni![32]

¹¹Ey Quddus hokimlari, sizlar pora olib hukm qilasiz, Ey Quddus ruhoniylari, sizlar tama qilib ta’lim berasiz, Ey Quddus paygʻambarlari, sizlar pul uchun bashorat qilasiz. Tagʻin Egamizning nomini roʻkach qilib, aytasiz: “Egamiz biz bilan, bunga shubha yoʻq! Boshimizga biror koʻrgilik tushmas.”

¹²Sizlar sababli Quddus daladay shudgor qilinadi, Sion xarobazor boʻladi, Egamizning uyi turgan togʻni[33] Qalin chakalakzor qoplaydi.