Read Uzbek Muqaddas Kitob Mixo 5 Bible Online

Mixo 5 - Uzbek Muqaddas Kitob bible

Mixo 5

¹Ey Quddus, yiqqin lashkaringni! Gʻanimlar bizni qurshovga oldi![39] Ular Isroil hukmdorining betiga tayoq bilan uradi[40].

²Ammo Egamiz demoqda: “Ey Efratdagi Baytlahm, Sen Yahudoning mitti shahri boʻlsang ham, Isroilni Men uchun boshqaradigan zot sendan chiqadi[41]. Uning nasabi qadimlarga borib taqaladi.”

³Ha, Egamiz Isroil xalqini bir muddatga dushmanlarga taslim qiladi, Ammo bu hol uzoq davom etmaydi. Homilador ayolning koʻzi yoriganda, Boʻlgʻusi hukmdorning birodarlari surgundan qaytadi. Ular Isroil xalqi bilan birlashadi.

⁴Egamizning qudrati ila oʻsha hukmdor suruvini boqadi, Oʻz Egasi Xudoning ulugʻvorligi ila ularni boshqaradi. Isroil xalqi xatarsiz yashaydi, Axir, hukmdorining dovrugʻi butun dunyoga yoyiladi.

⁵Oʻsha zot tinchlik oʻrnatuvchi boʻladi. Mabodo Ossuriyaliklar[42] Yurtimizga bostirib kelsa, Chegaramizga qadam bossa, Hukmdorimiz bizni himoya qiladi. Ha, Ossuriyaliklar Yurtimizga bostirib kelsa, Qal’alarni ular yorib oʻtsa, Biz ularga qarshi yetti yoʻlboshchini tanlaymiz, Hatto sakkiz rahnamoni tayinlaymiz. Ular qilich koʻtarib, Ossuriya ustidan hukmronlik qilishadi, Nimroʻdning yerida oʻz hukmini oʻtkazishadi.

⁷Koʻp xalqlar orasida Yoqub naslining[43] omon qolganlari Egamiz osmondan tushiradigan Shudringday boʻlishadi, Maysalarni sugʻoradigan Yomgʻirga oʻxshagan boʻlishadi. Ularni hech kim toʻxtata olmaydi, Ular dushmanlari ustiga bostirib borishadi.

⁸Ha, koʻp xalqlar orasida Yoqub naslining omon qolganlari Oʻrmon hayvonlari orasidagi Arslonday boʻlishadi, Qoʻy suruvi orasiga kirib qolgan Sher bolasiga oʻxshagan boʻlishadi. Yurgan yoʻllarida hammaga tashlanib gʻajishadi, Ularga hech kim bas kela olmaydi.

⁹Ey Isroil, sening qoʻling yovlardan baland keladi, Barcha dushmanlaring qirilib ketadi.

¹⁰Egamizning kalomi shudir: “Oʻsha kuni otlaringizni Men yoʻq qilaman, Jang aravalaringizni parcha — parcha etaman.

¹¹Vayron qilaman yurtingiz shaharlarini, Yakson etaman jamiki qal’alaringizni.

¹²Yurtingizda sehr — joduga barham beraman, Orangizda bironta folbinni qoldirmayman.

¹³Tasviru butsimon toshlaringizni yoʻq qilaman, Boshqa sajda qilmaysiz qoʻlingiz ijodiga.

¹⁴Asheraga[44] atalgan ustunlarni qoʻporib tashlayman, Shaharlaringiz kulini koʻkka sovuraman.

¹⁵Menga itoat qilmagan xalqlar ustiga Qahru gʻazabimni yogʻdirib, qasos olaman.”