Read Uzbek Muqaddas Kitob Mixo 6 Bible Online

Mixo 6 - Uzbek Muqaddas Kitob bible

Mixo 6

¹Egamizning soʻzini eshiting: “Qani, turing! Togʻlar oldida ayting da’voingizni, Qirlar eshitsin sizning ovozingizni.”

²Ey togʻlar, Egamizning da’vosiga quloq tuting, Zaminning mangu poydevorlari[45], siz ham eshiting! Egamiz Oʻz xalqi bilan da’volashadi, Xalqi Isroil bilan U bahslashadi.

³Egamiz demoqda: “Ey xalqim, senga Men nima qildim?! Senga tushdimi biror ogʻirligim?! Qani, javob bergin — chi Menga!

⁴Men sizlarni Misr yurtidan olib chiqqan edim — ku, U yerdagi qullikdan xalos etgan edim — ku. Oldingizga yuborgandim yoʻlboshchilarni — Muso, Horun va Maryamni.

⁵Ey xalqim, nahot eslamasangiz Moʻab shohi Boloqning yovuz niyatini, Bavoʻr oʻgʻli Balomning unga bergan javobini?! Shitimdan Gilgalga qilgan safaringizda ham Nimalar yuz berganini bir eslang[46]. Bu voqealarni esga olsangiz, Men, Egangiz, sizlarni qutqarmoqchi boʻlib, Ne — ne ishlar qilganimni koʻrasiz!”

⁶Yuksalgan Xudoga sajda qilganimda, Nima olib boray Egamizning huzuriga?! Unga atab qurbonliklar kuydirsammikan?! Bir yoshli buzoqlarni nazr qilsammikan?!

⁷Unga atab minglab qoʻchqorlarni soʻysam, Zaytun moyin daryo — daryo qilib oqizsam Egamiz mendan mamnun boʻlarmikan?! Itoatsizligim evaziga toʻngʻich oʻgʻlimni beraymi?! Gunohim evaziga oʻz farzandimni qurbon qilaymi?!

⁸Ey inson, nima yaxshi ekanligini Egamiz senga ayon qildi. Shudir Uning sendan qilgan talabi: Adolatli ish tutgin, Mehr — shafqat qilishdan zavq olgin, Kamtar boʻlib, Xudoning yoʻlidan yurgin.

⁹Xudodan qoʻrqish — donolik, axir! Egamiz Quddus ahliga xitob qilar: “Yaxshilab quloq soling! Men sizlarni hademay jazolayman![47]

¹⁰Ey fosiqlar, harom boyligingizga qanday koʻz yumay?! Tarozidan urib yiqqan davlatingizni qanday unutay?! Bunday boylikdan jirkanaman, axir!

¹¹Notoʻgʻri tarozini ishlatgan odamni qanday oqlayin?! Soxta qadoq toshlardan foydalangan kishiga qanday chidayin?!

¹²Ey Quddus boylari, sizlar zoʻravonlik qilyapsiz, Ey shahar odamlari, sizlar aldayapsiz. Yolgʻondan boshqani bilmas tillaringiz.

¹³Shuning uchun Men sizlarga qaqshatqich zarba beraman, Gunohlaringiz uchun sizlarni xarob qilaman.

¹⁴Sizlar yeysiz, lekin toʻymaysiz, Qorningiz doim och boʻladi. Narsa yigʻasiz — u, saqlay olmaysiz, Yiqqanlaringizni urushda nobud qilaman.

¹⁵Siz ekasiz, ammo oʻrib olmaysiz. Moy olasiz, ammo undan foydalanmaysiz. Uzum ezasiz[48], ammo sharobidan ichmaysiz.

¹⁶Axir, sizlar shoh Omrining odatlarini tashlamayapsiz. Axab[49] xonadonining barcha qilmishlariga taqlid qilyapsiz, Ularning yoʻlini tutyapsiz. Shuning uchun Men sizlarni xarob qilaman. Sizni koʻrganlar sizlardan hazar qiladi, Barcha xalqlar sizlarni haqorat etadi[50].”