Read Uzbek Muqaddas Kitob Noxum 3 Bible Online

Noxum 3 - Uzbek Muqaddas Kitob bible

Noxum 3

¹Holingga voy, ey qoʻli qon shahar! Oʻtaketgan makkor, oʻljaga toʻlgan shahar! U yerdagi qotilliklar hech tugamas!

²Quloqqa chalinar qamchilarning vizillashi, Gʻildiraklarning taraq — turugʻi, Yelayotgan ot tuyoqlarining tovushi, Jang aravalarining gumburlashi!

³Jangga kirmoqda otliq sipohlar, Yalt — yult etmoqda qilichlar, Yarqiramoqda nayzalar, Uyilib ketdi oʻliklar, Uyum — uyum boʻldi jasadlar, Murdalarning son — sanogʻi yoʻq. Qoqilishar jasadlarga odamlar!

⁴Ey Naynavo[15], oʻzingni buzuq fohishaday[16] tutding, Suyuqoyoq jodugarday odamlarni rom qilding, Buzuqliging bilan xalqlarni qul qilding, Sehr — jodularing bilan oʻzingga ogʻdirding.

⁵“Men senga qarshiman! — deb aytmoqda Sarvari Olam. — Men koʻylagingni koʻtarib, Xalqlarga yalangʻoch tanangni koʻrsataman, Ellar oldida sharmandangni chiqaraman.

⁶Ustingdan axlat yogʻdirib, seni xoʻrlayman. Odamlarga seni tomosha qildiraman.

⁷Seni koʻrganlar orqaga chekinib, shunday deyishar: «Naynavo vayron boʻldi! Kim unga achinar ekan?!» Seni yupatadigan hech kim yoʻq!”

⁸Noʻ — Omon[17] shahridan sening ortiq joying bormidi?! Oʻsha shahar Nil daryosi boʻyida joylashgandi, Suvlar qurshovida turgandi, Daryo — uning istehkomi, Suvlar — himoyasi boʻlgandi.

⁹Habashistonu[18] Misr uning ustidan hukmronlik qilardi, Kuchining chek — chegarasi yoʻq edi. Liviya[19] bilan Lub uning ittifoqdoshlari edi.

¹⁰Shunday boʻlsa — da, Noʻ — Omon shahrining aholisi surgun qilindi, Odamlari asirlikka olib ketildi, Har bir koʻchaning boshida Toshga urib oʻldirildi goʻdaklari, Aslzodalari uchun qur’a tashlandi, Barcha zodagonlari zanjirband boʻldi.

¹¹Ey Naynavo, sen ham mast boʻlib, gandiraklab qolasan[20], Bekinasan, dushmanlaringdan qochib, panoh izlaysan.

¹²Sening hamma qal’alaring Mevasi pishgan anjir daraxtiga oʻxshar. Anjirni silkitsang, Anjirlar xoʻrandaning ogʻziga tushar.

¹³Lashkaringga bir qarasang — chi! Xotin kishidan farqi yoʻq — ku ularning. Yurtingning darvozalari yov uchun keng ochildi, Darvozalarning tambalarini olov yoʻq qildi.

¹⁴Qamalga tayyorlangin! Suvga toʻldir idishlaringni! Mustahkamla qoʻrgʻonlaringni! Oyoq bilan ezgin loyni, Tayyorla tezroq qoliplaringni!

¹⁵Baribir olov seni yamlab yuborar, Chigirtka[21] ekinlarni qirtishlaganday, Qilich seni qirib tashlar. Chigirtkaday koʻpayaver!

¹⁶Savdogarlaringni osmondagi yulduzlardan ham koʻp qilding, Biroq ular chigirtkaday yurtingni talashar, Soʻng qanot qoqib uchib ketishar.

¹⁷Sovuq kunda devorlarga qoʻnadigan, Quyosh chiqqach esa uchib yoʻq boʻladigan Chigirtkadaydir sening posbonlaring, Chigirtka galasidaydir sening sarkardalaring. Ular qayerga gʻoyib boʻlganini bilmaydi hech kim.

¹⁸Ey Ossuriya shohi, Rahnamolaringning[22] koʻzi yumilgan, Yoʻlboshchilaring abadiy uyquga ketgan, Sening xalqing togʻlarga tarqalgan, Ularni yigʻadigan biror kimsa yoʻq.

¹⁹Sening yarangni davolab boʻlmas, Jarohating halokatlidir. Bu haqda xabar topgan hamma odamlar Xursandligidan chapak chalar. Zotan, hech kim cheksiz zulmingdan Qochib qutula olmagan.