Read Uzbek Muqaddas Kitob Xabaqquq 3 Bible Online

Xabaqquq 3 - Uzbek Muqaddas Kitob bible

Xabaqquq 3

¹Xabaqquq paygʻambarning kuyga solingan ibodati quyidagicha:

²“Ey Egam, men Sening shuhrating haqida eshitdim. Qilgan buyuk ishlaringdan hayratda qoldim. Ey Egam, bizning davrimizda ham shunday ishlaringni qilgin. Odamlar Sening nimalarga qodir ekanligingni bilib qoʻyishsin. Gʻazablanganingda mehr — shafqatni esdan chiqarmagin.

³Xudo keladi Edom yurtidan[14], Muqaddas Xudo keladi Poron qirlaridan[15]. Uning ulugʻvorligi koʻkni porlatar, Hamdu sanolariga butun dunyo toʻlar.

⁴Ulugʻvorligi chaqmoqday chaqnar, Nur sochilar Uning qoʻlidan — Kuch yashiringan bilagidan.

⁵Uning oldida yuradi oʻlat, Uning ketidan ergashadi ofat.

⁶Toʻxtaganda yer silkinadi, Nazar solganda xalqlarni titroq bosadi. U yurgan koʻhna yoʻllar boʻyidagi Mangu togʻlar oʻpirilib tushadi, Abadiy qirlar choʻkib past boʻladi.

⁷Koʻshon xalqining qoʻrqqanini men koʻryapman, Midiyon[16] xalqining dagʻ — dagʻ qaltiraganini koʻryapman.

⁸Ey Egam, nahotki gʻazablansang daryolardan?! Nahot Sening jahling chiqsa irmoqlardan?! Yoki Sening qasding bormidi dengizdan?![17] Shuning uchun otlaringni choptirasanmi, Zafarli jang aravalaringga minib olasanmi?!

⁹Sen gʻilofdan chiqarasan kamoningni, Oʻqlarga toʻldirasan oʻqdoningni. Daryolar bilan yorasan yer yuzini.

¹⁰Buni koʻrganda togʻlarni dard tutar, Shiddatli oqim koʻpirib oqar. Dengiz tubidan nido yangrar, Dengiz toʻlqinlari koʻkka intilar.

¹¹Sening oʻqlaring uchib chaqnaydi, Nayzalaring yalt etib yonadi. Bundan quyoshu oy oʻz joyida qotib turadi[18].

¹²Sen jahl ustida bosib oʻtarsan yer yuzini, Gʻazabga minib oyoq osti qilarsan xalqlarni.

¹³Qutqarish uchun kelasan Oʻz xalqingni, Oʻz tanlaganing orqali ozod qilish uchun ularni[19]. Fosiq xalqning yoʻlboshchisini urasan, Boshdan — oyoq uni shilib tashlaysan.

¹⁴Ana, gʻanimlarimiz quyun kabi kelyaptilar, Bizni har yoqqa tarqatib yubormoqchi boʻlyaptilar. Oʻz uyasida oʻljasini gʻajigan yirtqich hayvonday, Oson ovidan oʻzida yoʻq sevinyaptilar. Sen esa ularning yoʻlboshchisini oʻz oʻqlari bilan halok qilasan.

¹⁵Otlaring tuyoqlari dengizni[20] bosib ezadi, Bahaybat suvlarni bir joyga yigʻib qoʻyadi.”

¹⁶Men bularni[21] eshitdim. Shunda uvushdi mening yuragim, Titray boshladi lablarim, Madorim qolmay, qaltiradi tizzalarim. Ammo men sabr — toqat qilaman, Bosqinchilarimiz boshiga tushadigan kulfat kunini kutaman[22].

¹⁷Bordi — yu, anjir daraxti gullamay qolsa, Uzum toklari meva tugmasa, Zaytun daraxtlari hosil bermasa, Daladagi ekinlar unmay qolsa, Qoʻralarda qoʻylar qolmasa, Ogʻilxonalar boʻm — boʻsh boʻlsa,

¹⁸Shunda ham Egamdan shod boʻlarman, Najotkorim Xudodan quvonarman.

¹⁹Egam Rabbiy mening qudratimdir. U oyoqlarimni kiyik oyogʻiday qiladi, Choʻqqilar uzra meni bexatar yurgizadi. Ijrochilar rahbariga. Torli asboblar joʻrligida.