Read Uzbek Muqaddas Kitob Zafaniyo 2 Bible Online

Zafaniyo 2 - Uzbek Muqaddas Kitob bible

Zafaniyo 2

¹Esingni yigʻib olgin, Ey sharmanda xalq![16]

²Shamol uchiradigan somonday Yoʻq boʻlib ketmasingdan oldin[17], Egamizning alangali qahriga Uchramasingdan oldin, Egamizning gʻazab kuni Kelmasdan oldin esingni yigʻib olgin!

³Egamizning amrlariga itoat qiladigan, Ey yurtning kamtarin odamlari, Egamizga intilinglar. Toʻgʻrilikka bogʻlanib, Moʻmin — qobillik payida boʻlinglar. Shundagina Egamizning gʻazab kunida Jazodan qutulib qolishingiz mumkin.

⁴Gʻazo shahri[18] huvullab qoladi, Ashqalon shahri vayron boʻladi. Ashdod aholisi kunning tush paytigacha haydab chiqariladi, Exron shahri tag — tugi bilan yoʻq qilinadi.

⁵Ey dengiz qirgʻogʻida yashayotgan Filist xalqi[19], Sening holingga voy! Ey Kan’ondagi Filist yurti, Egamiz senga qarshi shunday deydi: “Men seni vayron qilaman, Birontangni ham tirik qoldirmayman.”

⁶Ey dengiz qirgʻogʻidagi oʻlka, Sen dashtga aylanasan. U yerda choʻponlar chodirlar tikadi, Ular qoʻy — echkilari uchun qoʻralar quradi.

⁷Yahudo[20] xalqining omon qolganlari Yurtingga egalik qiladi. Choʻponlari yurtingda qoʻy — echkilarini oʻtlatishadi, Ular Ashqalondagi tashlandiq uylarda tunashadi. Axir, Egasi Xudo ularga gʻamxoʻrlik qiladi, Ularni yana farovonlikka erishtiradi.

⁸Isroil xalqining Xudosi — Sarvari Olam shunday demoqda: “Moʻabliklar xalqimni qanchalik tahqirlaganini, Ommonliklar[21] ularni qanchalik xoʻrlaganini, Xalqimni haqoratlab, yurtiga tahdid solishganini eshitdim. Shunday ekan, Men barhayot Xudo boʻlganim haqi aytamanki, Moʻab yurti Sadoʻm shahrining holiga tushadi, Ommon yurti Gʻamoʻra shahriga[22] oʻxshab qoladi. Oʻsha yurtlar shoʻr bosgan tikanzorlarga aylanadi, To abad tashlandiq joylar boʻlib qoladi. Xalqimning omon qolganlari ularni talon — taroj qiladi. Yurtlarini oʻzlariga mulk qilib olishadi.”

¹⁰Ular Sarvari Olamning xalqini mazax qilganlari uchun, Kekkayib, magʻrurlanganlari uchun Bu koʻrgiliklar boshlariga tushadi.

¹¹Egamiz ularni vahimaga soladi, Yer yuzidagi jamiki xudolarni yoʻq qiladi. Shunda dengiz qirgʻogʻidagi ellar Egamizga sajda qilishadi. Har biri oʻz yurtida Egamizni madh etadi.

¹²Ey Habashistonliklar[23], Egamiz sizlarni ham qilichi bilan oʻldiradi.

¹³Egamiz shimolga qarshi qoʻl koʻtaradi, U Ossuriyani[24] yoʻq qiladi. Naynavo shahrini[25] vayron qiladi, Uni suvsiz sahroga aylantiradi.

¹⁴U yerda chorva oʻtlab yuradigan boʻladi, Har xil yovvoyi hayvonlar orom oladi. Saroy vayronalarida boyoʻgʻli yashaydi, Oynalaridan uning tovushi eshitiladi. Ostonalarida xarobalar uyum — uyum boʻlib yotadi. Binolarining sadr yogʻochlari shilib olinadi.

¹⁵Bexatar yashayotgan manman shahar shu koʻyga tushadi! “Menga teng keladigani yoʻq”, deb aytayotgan shaharning holi shu boʻladi! Xarob boʻlgan bu shahar Yovvoyi hayvonlarning makoniga aylanadi. Vayronalar oldidan oʻtgan — ketganlar Undan hazar qilib, yerga tupurib ketishadi.