Read Uzbek Muqaddas Kitob Zakariyo 10 Bible Online

Zakariyo 10 - Uzbek Muqaddas Kitob bible

Zakariyo 10

¹Bahorda yomgʻir beradigan Egamizdan yomgʻir soʻranglar. Boʻron bulutlarini yaratgan, Odamzodga yomgʻir beradigan, Hamma uchun dalalarni Oʻt — oʻlanga toʻldiradigan Egamizdir.

²Xonaki sanamlar[64] behuda gaplarni gapiradilar, Folbinlar yolgʻon follar ochadilar. Tush ta’bir qiluvchilar yolgʻon ta’bir qiladilar, Behuda tasalli beradilar. Shuning uchun bu xalq qoʻyday sarson boʻlib yuribdi, Choʻponi yoʻqligi uchun azob chekyapti.

³Egamiz shunday demoqda: “Gʻazabim xalqimning yoʻlboshchilariga qarshi yonmoqda, Men xalqimning bu choʻponlarini jazolayman. Men, Sarvari Olam, Oʻz suruvim boʻlgan Yahudo[65] xalqi uchun qaygʻuraman. Men oʻsha suruvni ulugʻvor jang otlariday qilaman.

⁴Yahudo orasidan tamal toshi[66], Chodir qozigʻi, jang kamoni chiqadi. Ha, har bir yetakchi ularning orasidan chiqadi.

⁵Birgalikda ular jang payti koʻchada loy kechgan Jangchilarday boʻladilar, Men, Egangiz, ular bilan birgaman. Ular urushga chiqib, Dushman chavandozlarini sharmanda qiladilar.

⁶Men Yahudo xalqini kuchga toʻldiraman, Yusufning avlodini[67] qutqaraman. Ularga rahm — shafqat koʻrsataman, Axir, Men ularning Egasi Xudoman. Ularning iltijolariga javob berib, Oʻz yurtiga qaytarib olib kelaman. Oʻshanda ular hech qachon rad qilinmaganday boʻladi.

⁷Efrayim xalqi[68] qudratli jangchilarday boʻladi, Ularning yuraklari sharob ichgandagi singari quvnoq boʻladi. Buni koʻrgan farzandlari shodlanadi, Ular Mening qilgan ishlarimdan xursand boʻladi.

⁸Men choʻpon kabi hushtak chalib, Oʻz xalqimni yigʻaman, Axir, Men ularni qutqarganman. Oldin ular qancha boʻlgan boʻlsalar, Ularning soni yana shuncha boʻladi.

⁹Men ularni xalqlarning orasiga sochib yuborgan boʻlsam ham[69], Eng uzoqdagi yurtlarda ham ular Meni eslaydilar. Farzandlariyu oʻzlari omon qolib, qaytib kelishadi.

¹⁰Men xalqimni Misr yurtidan qaytaraman, Ossuriya yeridan[70] yigʻib kelaman. Men ularni Gilad oʻlkasi va Lubnon yurtigacha boʻlgan yerlarga joylashtiraman. Hatto mana shu joylar ham ularga torlik qiladi.

¹¹Mening xalqim kulfat dengizidan oʻtsa, Oʻsha dengizning toʻlqinlarini urib tushiraman. Nil daryosining tubi qurib qoladi. Ossuriya xalqining takabburligiga barham beraman. Misr esa oʻz saltanat hassasini[71] yoʻqotadi.

¹²Oʻz qudratim bilan xalqimni kuchli qilaman. Ular Mening nomimga loyiq hayot kechiradilar.” Egamizning kalomi shudir.