Read Uzbek Muqaddas Kitob Zakariyo 11 Bible Online

Zakariyo 11 - Uzbek Muqaddas Kitob bible

Zakariyo 11

¹Ey Lubnon, och darvozalaringni! Sadr daraxtlaringni[72] olov yondirib tashlasin.

²Ey sarv daraxti, dod solib yigʻlagin, Axir, sadr daraxtlari quladi. Oʻsha ulugʻvor daraxtlar vayron boʻldi. Ey Bashandagi[73] emanlar, dod solib yigʻlang, Qalin — qalin oʻrmonlarning daraxtlari Kesib tashlandi, axir.

³Ana, eshiting! Choʻponlarning yigʻisin, Koʻm — koʻk yaylovlar nobud boʻldi, axir. Quloq soling sherlarning oʻkirishiga, Iordan butazorlari nobud boʻldi, axir.

⁴Egam Xudo menga shunday dedi: — Boʻgʻizlanishga olib ketilayotgan qoʻy suruviga choʻponlik qilgin.

⁵Qoʻylarni sotib olganlar ularni oʻldirib, jazosiz yuribdilar. Qoʻylarni sotganlar esa: “Xudoga shukur! Biz boymiz”, deydilar. Qoʻylarga hatto oʻz choʻponlarining ham rahmi kelmaydi.

⁶Men, Egangiz, shunday aytmoqdaman: “Endi bu yurtdagi odamlarga rahm qilmayman. Men ularni bir — birining qoʻliga va hukmdorlarining qoʻliga topshiraman. Hukmdorlari yurtni vayron qiladi. Men esa hech kimni bu hukmdorlarning qoʻlidan qutqarmayman.”

⁷Shunday qilib, qoʻy savdogarlari meni boʻgʻizlanadigan qoʻy suruviga choʻpon[74] qilib yolladilar[75]. Men ikkita tayoq oldim. Ulardan birini “Iltifot”, ikkinchisini esa “Ahillik” deb atab, qoʻylarni boqdim.

⁸Bir oy ichida ularning uchta choʻponini haydab yubordim. Qoʻy savdogarlariga boʻlgan sabr — toqatim ham tugadi, ular ham meni yomon koʻrib qoldilar.

⁹Shundan keyin men qoʻy savdogarlariga: — Endi sizlarning qoʻylaringizni boqmayman, — dedim. — Oʻladigani oʻlsin, halok boʻladigani halok boʻlsin, qolganlari esa bir — birining goʻshtini yesin.

¹⁰Men “Iltifot” nomli tayogʻimni oldim — da, uni sindirib tashladim. Shu orqali Egamizning Oʻz xalqi[76] bilan qilgan ahdini bekor qildim.

¹¹Shunday qilib, oʻsha kuni bu ahd bekor boʻldi. Meni kuzatib turgan qoʻy savdogarlari[77] bu ish Egamizning soʻzi ekanligini tushundilar.

¹²Keyin men ularga shunday dedim: — Agar sizlar ish haqimni berishni lozim koʻrsangiz, beringlar, boʻlmasa, bermay qoʻyaveringlar. Shunda ular menga bor — yoʻgʻi oʻttiz kumush tanga[78] berdilar.

¹³Shundan keyin Egamiz menga: — Bu kumushni kulolga bergin, — dedi. Meni baholab berilgan bu arzimas kumush tangalarni olib, Egamiz uyidagi kulolga[79] berdim.

¹⁴Keyin “Ahillik” deb atalgan ikkinchi tayogʻimni sindirdim. Shunday qilib, Yahudo va Isroil[80] orasidagi birodarlikni bekor qildim.

¹⁵Shundan keyin Egamiz menga aytdi: “Bor, yana bir marta choʻponlik qilgin. Ammo bu safar foydasiz choʻponday boʻlgin.

¹⁶Ha, Men bu yurtga shunday bir choʻpon beramanki, u halok boʻlayotganlarga qaramaydi. Yoʻqolganlarni izlamaydi, yaradorlarga shifo bermaydi, sogʻ boʻlganlarni oziqlantirmaydi. Aksincha, semiz qoʻylarni soʻyib yeydi, tuyoqlarini ham kesib tashlaydi.

¹⁷Ey suruvni tark etadigan qadrsiz choʻponim, Holingga voy! Qilich sening qoʻlingni chopib, Oʻng koʻzingni oʻyib tashlasin! Sening qoʻling butunlay qurib qolsin, Oʻng koʻzing koʻr boʻlsin!”