Read Uzbek Muqaddas Kitob Zakariyo 12 Bible Online

Zakariyo 12 - Uzbek Muqaddas Kitob bible

Zakariyo 12

¹Bashorat. Egamizning Isroil[81] haqida aytgan gaplari. Zamin poydevorini qoʻygan, falaklarni yoygan, insonga jon ato qilgan Egamiz shunday demoqda:

²“Qarab turinglar, Men Quddusni sharob qadahiday qilib qoʻyaman. U oʻzining atrofidagi xalqlarni gandiraklatadigan boʻladi[82]. Quddusni qamalga olishganda, Yahudo yurtining qolgan boshqa joylariga ham hujum qilishadi.

³Oʻsha kuni Men Quddusni boshqa xalqlar uchun ogʻir toshday qilib qoʻyaman. Uni koʻtarganlarning hammasi oʻzlariga zarar keltiradilar. Butun yer yuzidagi xalqlar unga qarshi chiqish uchun birlashadilar.

⁴Oʻsha kuni, Men har bir otni dahshatga solaman, ularning chavandozlarini esa aqldan ozdiraman, — demoqda Egamiz. — Yahudo xalqiga esa Oʻzim gʻamxoʻrlik qilaman. Dushmanlarining otlarini koʻr qilib qoʻyaman.

⁵Shunda Yahudo urugʻlari oʻzlariga: — Quddus aholisining qudrat manbayi bizning Xudoyimiz, Sarvari Olamdir, — deydilar.

⁶Oʻsha kuni Men Yahudo urugʻlarini oʻtin orasidagi qizib turgan choʻgʻday, bugʻdoy bogʻlamlari orasidagi yonib turgan mash’aladay qilaman. Ular oʻngu soʻldagi, atrofidagi xalqlarni yamlab yutadilar. Quddusdagi odamlar esa osoyishta hayot kechiradilar.

⁷Men, Egangiz, avval Yahudo xalqiga gʻalaba beraman. Dovud avlodining va Quddus aholisining shuhrati Yahudoning shuhratidan oshib ketmasligi uchun shunday qilaman.

⁸Oʻsha kuni Men Quddus aholisini himoya qilaman. Ularning orasidagi eng ojizi ham Dovudday kuchli boʻladi. Dovud avlodi esa Mening farishtamday, xuddi Oʻzimday Quddus ahlini boshlab boradi.

⁹Mening rejam oʻsha kuni Quddusga qarshi chiqqan barcha xalqlarni halok qilishdir.

¹⁰Men Dovud avlodiga, Quddus aholisiga mehr — shafqat va ibodat ruhini yogʻdiraman. Ular Menga — oʻzlari nayza sanchganga qarashadi. Yolgʻiz farzandga aza tutganday, aza tutishadi. Toʻngʻich farzand uchun motam tutganday, motam tutishadi.

¹¹Oʻsha kuni Quddusdagi dod — faryod, Magidoʻ vodiysidagi Hadad — Rimmonda[83] tutilgan azaday, kuchli boʻladi.

¹²Butun yurt aza tutadi. Har bir oila alohida aza tutadi: Dovud avlodining oilalari alohida, ularning xotinlari alohida, Natan[84] avlodining oilalari alohida, ularning xotinlari alohida,

¹³Levi avlodining oilalari alohida, ularning xotinlari alohida, Shimax[85] avlodining oilasi va ularning xotinlari alohida aza tutadilar.

¹⁴Qolgan oilalar ham oʻzlari alohida aza tutadilar. Ularning xotinlari ham alohida aza tutadilar.”