Read Uzbek Muqaddas Kitob Zakariyo 3 Bible Online

Zakariyo 3 - Uzbek Muqaddas Kitob bible

Zakariyo 3

¹Keyin farishta menga Egamizning farishtasi oldida oliy ruhoniy Yoshua turganini koʻrsatdi. Yoshuaning oʻng tomonida esa shayton[20] uni ayblab turgan edi.

²Egamiz shaytonga shunday dedi: — Ey shayton! Gaplaringning hammasi yolgʻon! Men Quddusni tanlagan Egangman. Men senga aytaman, gaplaring yolgʻon! Axir, bu kishi alangadan qutqarilgan bir oʻtin parchasiday emasmi?!

³Yoshua farishtaning oldida kir kiyimlarda turar edi.

⁴Farishta atrofida turganlarga[21]: — Uning kir kiyimlarini yechinglar, — dedi. Yoshuaga esa: — Mana, qara, Men sening gunohlaringni olib tashladim, — dedi. — Endi senga toza, bayramlarda kiyadigan yangi kiyimlarni kiydiraman.

⁵Keyin men: — Uning boshiga toza salla kiydiringlar, — dedim. Uning boshiga toza salla, ustiga esa yangi kiyim kiydirishdi. Egamizning farishtasi uning yonida turar edi.

⁶Keyin Egamizning farishtasi Yoshuani ogohlantirib, shunday dedi:

⁷— Sarvari Olam shunday aytmoqda: “Agar sen Mening yoʻlimdan yurib, talablarimni bajarsang, Mening uyimda, Ma’badim hovlilarida bosh boʻlasan. Senga shu yerda turganlar orasidan joy beraman[22].

⁸Ey oliy ruhoniy Yoshua, quloq sol! Oldingda turgan ruhoniylar ham quloq solishsin. Sizlar kelajakda sodir boʻladigan voqealarning ramzisizlar. Men ismi «Novda»[23] boʻlgan xizmatkorimni zohir qilaman.

⁹Men Yoshuaning oldiga bir tosh qoʻydim. Mening yetti koʻzim oʻsha toshga qadalgan. Bu toshning ustiga Men yozuv yozaman, — demoqda Sarvari Olam. — Mana shu yurtning gunohini bir kunda olib tashlayman.

¹⁰Oʻsha kuni sizlar qoʻni — qoʻshnilaringizni chaqirib, oʻz uzumzorlaringizda va anjir daraxtlaringiz tagida oʻtirasizlar.” Sarvari Olamning kalomi shudir.