Read Uzbek Muqaddas Kitob Zakariyo 5 Bible Online

Zakariyo 5 - Uzbek Muqaddas Kitob bible

Zakariyo 5

¹Men yana tepaga qarab uchayotgan oʻrama bir qogʻozni[29] koʻrdim.

²Farishta mendan: — Nima koʻryapsan? — deb soʻradi. Men: — Uchib ketayotgan oʻrama bir qogʻozni koʻryapman, uning uzunligi yigirma tirsak, eni esa oʻn tirsak[30], — deb javob berdim.

³Shunda u menga dedi: — Bu qogʻozga butun yurt ustiga keladigan la’nat yozilgan. Qogʻozning bir tomonidagi yozuvga koʻra, oʻgʻrilik qilganlar, orqa tomonidagi yozuvga koʻra, yolgʻon qasam ichganlar yurtdan yoʻq qilinadi.

⁴Sarvari Olam aytmoqda: “Bu la’natni Men yubordim, u oʻgʻrining uyiga kiradi. Kim Mening nomim bilan yolgʻon qasam ichsa, oʻshaning uyiga kiradi. La’nat oʻsha uyda boʻlib, uni tosh va sinchlariga qoʻshib, butunlay vayron qiladi.”

⁵Men bilan gaplashgan farishta kelib, menga shunday dedi: — Qara — chi, kelayotgan narsa nima ekan.

⁶Men: — U nima? — deb soʻradim. Farishta: — Bu kelayotgan narsa savatdir, — deb javob berdi. — Yurtdagi jamiki aholining niyatu muddaolarini bildiruvchi timsol oʻsha savat ichidadir.

⁷Qoʻrgʻoshindan yasalgan qopqoq ochildi, savatning ichida esa bir ayol oʻtirgan ekan.

⁸Farishta dedi: — Bu ayolning ismi Fosiqlik. Shunday deb, u ayolni qaytarib savatga tiqib qoʻydi — da, qopqogʻini yopdi.

⁹Men yana tepaga qarab, ikkita ayol uchib kelayotganini koʻrdim. Ular qanotlarini shamolda yoygan holda uchib kelayotgan edilar, qanotlari turnaning qanotlariga oʻxshar edi. Ular kelib oʻsha savatni oldilar — da, osmonga koʻtarib olib ketdilar.

¹⁰Men bilan gaplashayotgan farishtadan soʻradim: — Ular savatni qayerga olib ketishyapti?

¹¹U menga: — Bobil[31] yurtiga olib ketishyapti, — deb javob berdi. — Oʻsha yerda unga sajdagoh qurishadi. Sajdagoh tayyor boʻlgandan keyin, savatni oʻsha yerda oʻz joyiga qoʻyishadi.