Read Uzbek Muqaddas Kitob Zakariyo 6 Bible Online

Zakariyo 6 - Uzbek Muqaddas Kitob bible

Zakariyo 6

¹Men yana tepaga qarab, ikkita bronza togʻ orasidan chiqib kelayotgan toʻrtta aravani koʻrdim.

²Birinchi aravani qizgʻish, ikkinchi aravani esa qora otlar,

³uchinchi aravani oq, toʻrtinchi aravani esa ola — bula otlar tortib kelayotgan edi. Bu otlarning hammasi kuchli edi.

⁴Men bilan gaplashayotgan farishtadan: — Ey toʻram, bular nima? — deb soʻradim.

⁵Farishta shunday javob berdi: — Bular butun olam Rabbiysining huzuridan chiqib kelayotgan toʻrtta samoviy ruhdir.

⁶Qora otli arava shimolga boradi. Oq otlisi esa uning orqasidan ketadi[32]. Ola — bula otli arava janubga boradi.

⁷Ana shu kuchli otlar chiqib kelib, yerni aylanishga shoshildilar. Farishta ularga: — Boringlar, yerni koʻrib chiqinglar, — dedi. Shunda ular yerni aylanib kelishdi.

⁸Keyin farishta meni chaqirib, shunday dedi: — Mana, qara! Otlar shimoldagi yurtga[33] borishdi. U yerda Egamizning irodasini ado etishdi, Egamiz jahlidan tushdi[34].

⁹Egamiz menga quyidagi soʻzlarni ayon qildi:

¹⁰— Bobildagi surgundan qaytib kelgan Xalday, Toʻviyo va Yodayodan tilla va kumush ol. Oʻsha kuniyoq Zafaniyo oʻgʻli Yoʻshiyoning uyiga bor.

¹¹Berilgan kumush va oltindan toj yasagin. Uni Yohuzadax oʻgʻli — oliy ruhoniy Yoshuaning boshiga kiygizgin — da,

¹²unga shunday degin: “Sarvari Olam shunday demoqda: Novda[35] degan odam oʻz turgan joyidan shoxlaydi — da, Mening Ma’badimni quradi.

¹³Ha, Mening Ma’badimni quradigan oʻshadir. U shohona ulugʻvorlikka ega boʻlib, hukmronlik qiladi. Taxtining oldida ruhoniy turadi[36]. Ikkalasi orasida tinchlik, osoyishtalik boʻladi.

¹⁴Bu toj Xalday[37], Toʻviyo, Yodayo va Zafaniyo oʻgʻli Yoʻshiyoning[38] qaramogʻida boʻladi. U Mening Ma’badimda yodgorlik boʻlib qoladi.

¹⁵Uzoq joylardan odamlar kelib, Mening Ma’badimni qurishga yordam berishadi.” Ey surgundan qaytib kelganlar! Shunda Sarvari Olam meni yuborganini sizlar anglab yetasizlar. Agar sizlar Egangiz Xudoning soʻzlariga yaxshilab quloq solsangizlar, mana shularning hammasi sodir boʻladi.