Read Uzbek Muqaddas Kitob Zakariyo 8 Bible Online

Zakariyo 8 - Uzbek Muqaddas Kitob bible

Zakariyo 8

¹Sarvari Olam menga Oʻz soʻzini ayon qildi.

²Sarvari Olam shunday aytmoqda: “Men Quddusga[45] qattiq achinib ketdim. Uning dushmanlariga boʻlgan gʻazabim alangaday yonmoqda.”

³Egamizning kalomi shudir: “Men Quddusga qaytaman, Sion Mening maskanim boʻladi. Shunda Quddus sadoqatli shahar deb ataladi. Mening togʻim[46] — Sarvari Olamning togʻi muqaddas togʻ deb ataladi.”

⁴Sarvari Olam shunday demoqda: “Cholu kampirlar yana Quddus koʻchalarida oʻtiradilar. Yoshi ulugʻ boʻlgani uchun ularning qoʻllarida hassalari boʻladi.

⁵Shaharning koʻchalari oʻynayotgan bolalar bilan toʻladi.”

⁶Sarvari Olamning kalomi shudir: “Balki bularning hammasi xalqimdan qolganlariga imkonsizday tuyular. Ammo bu ishlar Men uchun imkonsiz emas”, — demoqda Sarvari Olam.

⁷Sarvari Olam shunday aytmoqda: “Men sharq va gʻarbda sarson boʻlgan Oʻz xalqimni qutqaraman.

⁸Ularni yana Quddusda yashashlari uchun olib kelaman. Ular Mening xalqim boʻladi, Men esa ularning Xudosi boʻlaman. Ularni sadoqat va odillik bilan boshqaraman.”

⁹Sarvari Olam shunday demoqda: “Dovyurak boʻlinglar, endi sizlar paygʻambarlarning soʻzlarini eshityapsizlar. Ma’badim, ya’ni Uyimning qayta qurilishi uchun poydevor qoʻyilayotganda, oʻsha paygʻambarlar shu yerda edilar.

¹⁰Ha, oʻsha kunlardan oldin odam va hayvonlarning ter toʻkib qilgan mehnatlari zoye ketardi, ular yaxshi hosil ololmas edilar[47]. Dushmanlar xalqqa tinchlik bermasdi. Men hammani bir — biriga qarshi qilib qoʻygan edim.

¹¹Ammo endi, ey xalqimning qolganlari, Men sizlar bilan oldingiday munosabatda boʻlmayman, — demoqda Sarvari Olam.

¹²— Sizlar tinchlikda urugʻlaringizni ekasizlar. Toklaringiz serhosil boʻladi. Yer hosil beradi, osmondan shudring tushadi. Sizlarni Men mana shular bilan barakalayman.

¹³Ey Yahudo va Isroil[48] xalqi, sizlar boshqa xalqlar orasida la’natlangan xalqning ramzi edingizlar. Endi bunday boʻlmaydi! Men sizlarni qutqaraman. Sizlar baraka ramzi va manbayi boʻlasizlar. Qoʻrqmanglar! Dadil boʻlinglar!”

¹⁴Sarvari Olam shunday aytmoqda: “Ota — bobolaringiz Mening jahlimni chiqarganda boshlariga ofat keltiraman, degandim. Oʻz fikrimdan qaytmadim, — demoqda Sarvari Olam.

¹⁵— Qoʻrqmanglar, ey Quddus va Yahudo xalqi! Endi Men sizlarga yaxshilik keltiraman, deb qaror qildim.

¹⁶Quyidagi aytganlarimni qilishingiz kerak: bir — biringizga haqiqatni ayting. Hukm qilganingizda odil qaror chiqarib, tinchlik oʻrnating.

¹⁷Bir — biringizga qarshi yovuz rejalar tuzmang, yolgʻon qasam ichmang. Men bulardan nafratlanaman.” Sarvari Olamning kalomi shudir.

¹⁸Sarvari Olam menga Oʻz soʻzini ayon qildi.

¹⁹Sarvari Olam shunday aytmoqda: “Ey Yahudo xalqi, toʻrtinchi, beshinchi, yettinchi va oʻninchi oylar[49] endi azayu roʻza vaqti emas, balki sizlar uchun shodu xurramlik va quvnoq bayramlar davri boʻladi. Sizlar haqiqat va tinchlikni sevinglar.”

²⁰Sarvari Olam shunday demoqda: “Hali boshqa shaharlarda yashaydigan odamlar ham Quddusga keladi.

²¹Bir shaharning aholisi ikkinchi shaharda yashovchilarning oldiga borib: «Biz ketyapmiz, yuringlar, Egamizdan iltifot soʻraylik, Sarvari Olamga sajda qilaylik», deb aytadi.”

²²Koʻp ellar va kuchli xalqlar Sarvari Olamdan iltifot soʻragani va Unga sajda qilgani Quddusga keladilar.

²³Sarvari Olamning kalomi shudir: “Oʻsha kunlarda turli tillarda gapiruvchi, har xil ellarga mansub boʻlgan oʻn kishi bir yahudiyni ushlab oladi. Uning kiyimidan mahkam tutadilar — da, unga: «Biz sen bilan boraylik. Axir, Xudo sizlar bilan ekanini eshitdik», deb aytadilar.”