Read Uzbek Muqaddas Kitob Zakariyo 9 Bible Online

Zakariyo 9 - Uzbek Muqaddas Kitob bible

Zakariyo 9

¹Bashorat. Egamizning soʻzi Xadrax yurtiga[50] qarshidir. Damashq shahriga qaratilgandir. Egamiz barcha Isroil qabilalarini kuzatib turganday, Butun insoniyatni ham kuzatadi[51].

²Xadraxga chegaradosh boʻlgan Xomat[52] ham, Donolarga toʻla boʻlgan Tir va Sidon[53] ham Egamizning koʻzi ostidadir[54].

³Tir shahri oʻziga qal’a qurib olgan, Shunchalik koʻp kumush va oltin yiqqanki, Ular koʻchadagi chang va loydaydir.

⁴Lekin endi Rabbiy ularning mulkini tortib oladi, Boyliklarini dengizga uloqtiradi. Shaharning oʻzi esa olovga yem boʻladi.

⁵Ashqalon shahri[55] buni koʻrib, qoʻrquvga tushadi, Gʻazo ham dahshatga tushib qaltiraydi, Umidi puchga chiqqan Exron ham shu ahvolga tushadi. Gʻazoning shohi halok boʻladi, Ashqalonda esa hech bir zot qolmaydi.

⁶Egamiz shunday deydi: “Ashdodda nasli buzilgan xalqlar yashaydi. Ha, Men Filistlarning takabburligiga chek qoʻyaman.

⁷Men Filistlarning ogʻzidagi qonli goʻshtni, Tishlaridagi harom ovqatni[56] olib tashlayman. Filistlarning tirik qolganlari Menga tegishli boʻladi, Ular Yahudoning avlodiday boʻlib qoladi. Exron ham Yobus xalqiday[57] Oʻz xalqimning bir qismi boʻladi.

⁸Bosqinchilardan asray deb Men Oʻzim uyimni qoʻriqlayman. Xalqimning yurtini hech kim bosib ololmas, Ha, Men hammasini koʻrib turibman.

⁹Xursand boʻlib, quvoning, Ey Quddus xalqi! Shodlik ila hayqiring, Ey Sion aholisi! Mana, shohingiz kelyapti. U zafar qozongan gʻolibdir. Shunga qaramay, Kamtarindir shohingiz, U eshakning ustida, Ha, eshakning bolasini — Xoʻtikni minib kelyapti.

¹⁰Men Efrayimning[58] jang aravalarini yoʻqotaman, Quddusning[59] jang otlarini tortib olaman. Urush kamonlari ham yoʻq qilinadi, Shohingiz xalqlarga tinchlik keltiradi. Men bir dengizdan ikkinchisiga qadar, Furot daryosidan tortib Yer yuzining toʻrt tomoniga hukmronlik qilaman.

¹¹Men sizlar bilan qilgan, Qurbonlik qoni bilan tasdiqlangan ahdim[60] tufayli, Asirlaringizni suvsiz chuqurlikdan ozod qilaman.

¹²Ey umidvor asirlar, Oʻz qal’angizga qayting. Bugun Men aytyapman, Yoʻqotganlaringizni ikki barobar qilib tiklayman.

¹³Men Yahudoni Oʻz kamonimdek qayirdim, Efrayimni[61] esa kamonim oʻqi qildim. Ey Sion[62], Men sening oʻgʻillaringni Yunon[63] oʻgʻillariga qarshi qoʻzgʻataman. Mening qoʻlimda jangchining qilichiday oʻynaysan.”

¹⁴Shundan keyin Egamiz Oʻz xalqi uzra zohir boʻladi, Uning oʻqi yashinday otiladi. Egamiz Rabbiy burgʻuni chalib, Janubdan kelgan quyunlar orasida hujum qiladi.

¹⁵Sarvari Olam Oʻz xalqini himoya qiladi, Ular dushmanlarini qirib, Yov palaxmonlarini oyoq osti qilib tashlaydilar. Qurbonlik soʻyganday yov qonini toʻkadilar, Qurbongoh shoxlari qonga belanganday, Ular dushmanlarining qoniga belanadilar. Sharobu may bilan gʻalabani nishonlaydilar, Xursandligidan mast odamday hayqiradilar.

¹⁶Oʻsha kuni ularning Egasi Xudo Oʻz xalqini qutqaradi. Axir, ular Egamizning suruvidir. Egamizning yurtida ular Toj gavharlariday porlaydilar.

¹⁷Uning xalqi qanday goʻzal va ajoyib! Yangi sharobu donlar Yigit — qizlarni baquvvat qilar.