Read Uzbek Muqaddas Kitob Malaki 2 Bible Online

Malaki 2 - Uzbek Muqaddas Kitob bible

Malaki 2

¹Sarvari Olam shunday deydi: “Ey ruhoniylar, endi sizlarga amrim shudir: Menga quloq soling. Chin yurakdan nomimni ulugʻlang. Aks holda, ustingizga la’natlar yogʻdiraman, barakalaringizni la’nati qilaman. Darvoqe, barakalaringizni la’natlab boʻldim ham, chunki birontangiz ogohimga e’tibor bermadingiz.

³Men farzandlaringizni jazolayman. Qurbonliklaringizning ichaklaridan chiqqan axlatni betlaringizga sochaman, oʻsha axlatga qoʻshib, oʻzlaringizni ham axlat uyumiga tashlab yuboraman.

⁴Shunda bu amrni sizlarga Men berganimni bilib olasizlar. Men bu amr orqali ota — bobongiz Levi va uning nasllari bilan tuzgan ahdimni[6] mustahkam qilmoqchi edim, — deydi Sarvari Olam.

⁵— Levi qabilasi bilan qilgan oʻsha ahdim farovon hayot ahdi edi. Men levilarning qalbiga qoʻrquvni solib qoʻydim, ular Mendan qoʻrqishardi, nomimni benihoya izzat etishardi.

⁶Ular koʻrsatmalarimni xalqqa buzmasdan yetkazishardi, adolatli hukm chiqarishardi. Sofdillik va toʻgʻrilik yoʻllarida Menga hamroh edilar, koʻplarni gunohdan qaytardilar.

⁷Ruhoniyning vazifasi odamlarga toʻgʻri ta’lim berishdir. Odamlar uning oldiga maslahat soʻrab borishlari kerak, axir, Men Sarvari Olamman, u Mening elchimdir.

⁸Ammo, ey ruhoniylar, sizlar yoʻlimdan ogʻdingizlar, oʻz koʻrsatmalaringiz bilan koʻplarni yoʻldan urdingizlar. Levi qavmi bilan tuzgan ahdimni barbod qildingizlar, — deydi Sarvari Olam.

⁹— Men esa sizlarni xoʻrladim, barcha xalqlardan pastroq qildim. Sizlar Mening yoʻlimdan yurmayapsiz, qonun masalasida tarafkashlik qilyapsiz.”

¹⁰Hammamizning Otamiz[7] bir emasmi?! Hammamizni bir Xudo yaratgan emasmi?! Nega endi biz bir — birimizga sadoqatsiz boʻlishimiz kerak?! Nega Xudo ota — bobolarimiz bilan tuzgan ahdni bulgʻashimiz kerak?!

¹¹Ey Yahudo xalqi[8], sizlar sadoqatsizlik qildingiz. Quddusda hamda butun yurtda jirkanchli ishlarga qoʻl urdingiz. Ha, Egamiz yaxshi koʻradigan Ma’badni bulgʻab, begona xudolarga topinadigan qizlarga uylandingiz.

¹²Egamiz bunday ishlarga qoʻl urgan har bir odamni xalqimiz[9] orasidan yoʻq qilsin. Unday odamlar Sarvari Olamga nazrlar keltirmasin.

¹³Sizlar yana shunday qilyapsiz: Egamizning qurbongohini koʻz yoshlar bilan yuvyapsiz, faryod qilib figʻon chekyapsiz, chunki Xudo nazrlaringizni qabul qilmayapti, U bulardan mamnun emas.

¹⁴“Nima uchun?” deb soʻraysiz. Chunki sizlar yoshlik chogʻingizda uylangan xotiningizga bevafolik qildingiz. Axir, u sizning umr yoʻldoshingiz, nikoh ahdingizdagi xotiningiz — ku! Egamizning Oʻzi sizlarning orangizda guvohdir.

¹⁵Ehtiyot boʻling, orangizda hech kim oʻz xotiniga xiyonat qilmasin. Xudo sizlarni bir tanu bir jon qilgan — ku![10] Endi Xudo sizlardan nimani kutyapti? Haqiqiy xudojoʻy farzandlarni kutyapti[11].

¹⁶“Xotinidan nafratlanib, undan ajrashgan erkak[12] oʻz himoyasi ostida boʻlgan xotiniga shafqatsizlik qilgan boʻladi[13]”, — deydi Isroil xalqining Xudosi — Egamiz. “Shu bois hushyor boʻlinglar, xiyonat qilmanglar”, — deydi Sarvari Olam.

¹⁷Sizlar gaplaringiz bilan Egamizni charchatib yubordingizlar — ku, yana: “Qanday qilib Uni charchatibmiz?” deb soʻraysizlar. Sizlar: “Yomonlik qilgan hammani Egamiz yaxshi koʻradi, ulardan mamnun boʻladi. Qani, adolat Xudosi bormi oʻzi?!” deb aytasizlar. Bu gaplaringiz bilan Egamizni charchatyapsizlar.