Read Uzbek Muqaddas Kitob Matto 1 Bible Online

Matto 1 - Uzbek Muqaddas Kitob bible

Matto 1

¹Ibrohim va Dovud avlodidan boʻlgan Iso Masihning nasabnomasi[1] quyidagicha:

²Ibrohimdan Is’hoq tugʻildi. Is’hoqdan Yoqub tugʻildi. Yoqubdan Yahudo va uning aka — ukalari tugʻildilar.

³Yahudo va Tamaradan Paraz va Zerax tugʻildilar. Parazdan Xazron tugʻildi. Xazrondan Ram[2] tugʻildi.

⁴Ramdan Ominadav tugʻildi. Ominadavdan Naxshoʻn tugʻildi. Naxshoʻndan Salmoʻn tugʻildi.

⁵Salmoʻn va Rahobadan Boʻaz tugʻildi. Boʻaz va Rutdan Obid tugʻildi. Obiddan Essay tugʻildi.

⁶Essaydan shoh Dovud tugʻildi. Dovud va Uriyoning sobiq xotinidan Sulaymon tugʻildi.

⁷Sulaymondan Raxabom tugʻildi. Raxabomdan Abiyo tugʻildi. Abiyodan Oso tugʻildi.

⁸Osodan Yohushafat tugʻildi. Yohushafatdan Yohuram tugʻildi. Yohuramdan[3] Uzziyo tugʻildi.

⁹Uzziyodan Yoʻtom tugʻildi. Yoʻtomdan Oxoz tugʻildi. Oxozdan Hizqiyo tugʻildi.

¹⁰Hizqiyodan Manashe tugʻildi. Manashedan Omon tugʻildi. Omondan Yoʻshiyo tugʻildi.

¹¹Isroil xalqi Bobilga surgun qilingan davrda[4] Yoʻshiyo Yohayixinni[5] va boshqa oʻgʻil farzandlarni koʻrdi[6].

¹²Isroil xalqi Bobilga surgun qilingandan keyin[7] Yohayixindan Shaltiyol tugʻildi. Shaltiyoldan Zarubabel[8] tugʻildi.

¹³Zarubabeldan Abihud tugʻildi. Abihuddan Eliyaqim tugʻildi. Eliyaqimdan Azzur tugʻildi.

¹⁴Azzurdan Zodoʻx tugʻildi. Zodoʻxdan Oxiyom tugʻildi. Oxiyomdan Elihud tugʻildi.

¹⁵Elihuddan Elazar tugʻildi. Elazardan Matton tugʻildi. Mattondan Yoqub tugʻildi.

¹⁶Yoqubdan Maryamning eri Yusuf tugʻildi. Maryamdan esa Masih deb atalgan Iso tugʻildi.

¹⁷Shunday qilib, Ibrohimdan Dovudgacha hammasi boʻlib oʻn toʻrt nasl, Dovuddan to xalq Bobilga surgun qilingungacha oʻn toʻrt nasl va surgunlik davridan to Masih tugʻilgungacha oʻn toʻrt nasldir[9].

¹⁸Iso Masihning tugʻilishi shunday sodir boʻldi: Isoning onasi Maryam Yusufga unashtirib qoʻyilgan edi. Ularning nikohidan oldin Maryam Muqaddas Ruhdan homilador ekanini bildi.

¹⁹Maryamning boʻlgʻusi eri Yusuf solih odam boʻlib, Maryamni sharmanda qilishni istamay, birovga bildirmasdan fotihasini buzmoqchi boʻldi.

²⁰Yusuf bu haqda oʻylab yurganda, Egamizning bir farishtasi unga tushida zohir boʻlib dedi: “Ey Dovud oʻgʻli Yusuf! Maryamga uylanishdan qoʻrqma, chunki qornidagi Bola Muqaddas Ruhdan paydo boʻlgan.

²¹Maryam oʻgʻil tugʻadi, Uning ismini Iso[10] qoʻyasan, chunki U Oʻz xalqini gunohlardan qutqaradi.”

²²Bu barcha voqealar Egamizning paygʻambar orqali aytgan quyidagi soʻzlari bajo boʻlishi uchun yuz bergan edi:

²³“Qiz homilador boʻladi, u oʻgʻil tugʻadi, Uning ismini Immanuil deb qoʻyishadi.”[11] Immanuil “Xudo biz bilan” deganidir.

²⁴Yusuf uygʻonib ketdi. Egamizning farishtasi buyurgandek, u Maryamga uylandi.

²⁵Ammo Maryam Oʻgʻilni[12] tugʻmaguncha Yusuf Maryamga yaqinlashmadi. Bola tugʻilganda esa Yusuf Unga Iso deb ism qoʻydi.