Read Uzbek Muqaddas Kitob Matto 10 Bible Online

Matto 10 - Uzbek Muqaddas Kitob bible

Matto 10

¹Iso Oʻzining oʻn ikki havoriysini yoniga chaqirib, ularga yovuz ruhlarni quvib chiqarish va har qanday dardu xastaliklarni sogʻaytirish qudratini berdi.

²Bu oʻn ikki havoriyning ismlari quyidagichadir: birinchisi Butrus deb atalgan Shimoʻn, uning ukasi Endrus, Zabadiyoning oʻgʻillari Yoqub va Yuhanno,

³Filip, Bartolomey, Toʻma, soliqchi[92] Matto, Xalfey oʻgʻli Yoqub, Taddeyus[93],

⁴vatanparvar[94] Shimoʻn va Isoga xoinlik qilgan Yahudo Ishqariyot.

⁵Iso oʻn ikki havoriyni joʻnatayotib, ularga quyidagicha koʻrsatmalar berdi: “Gʻayriyahudiylar yashaydigan joylarga oyoq bosmanglar, Samariyaliklarning[95] shaharlariga kirmanglar.

⁶Aksincha, adashgan qoʻylarga oʻxshagan Isroil xalqi oldiga boringlar.

⁷Borganlaringizda: «Osmon Shohligi yaqinlashdi», deb e’lon qilinglar.

⁸Xastalarni sogʻaytiringlar, oʻliklarni tiriltiringlar, teri kasalligiga[96] chalinganlarni poklanglar, jinlarni quvib chiqaringlar. Tekin oldingizlar, tekin beringlar.

⁹Belbogʻlaringizga oltin, kumush, hatto mis chaqa ham qistirib olmanglar.

¹⁰Yoʻlga toʻrva ham, qoʻshimcha kiyim ham, choriq ham, hassa ham olmanglar. Chunki mehnatkash oʻzining non — nasibasiga munosibdir.

¹¹Qaysi shahar yoki qishloqqa kirsangiz, u yerda oʻzingizga munosib odamni topib, ketguningizcha oʻsha odamning uyida turinglar.

¹²Uyga kirganingizda: «Xonadoningizda tinchlik — omonlik boʻlsin», deb aytinglar.

¹³Agar u munosib xonadon boʻlsa, siz tilagan tinchlik oʻsha xonadonda qoladi. Agarda nomunosib boʻlsa, tilagan tinchligingiz oʻzingizga qaytib keladi.

¹⁴Agar kim sizni qabul qilmasa va soʻzlaringizga quloq solmasa, oʻsha uydan yoki shahardan chiqib ketayotganingizda oyoqlaringizdagi changni qoqib ketinglar[97].

¹⁵Sizga chinini aytaman: qiyomat kunida oʻsha shaharning holi Sadoʻm va Gʻamoʻra shaharlarining[98] holidan ham battar boʻladi.

¹⁶Men sizlarni boʻrilar orasiga qoʻylarday yuboryapman. Sizlar ilonday ziyrak, kaptarday oq koʻngil boʻlinglar.

¹⁷Insonlardan ehtiyot boʻlinglar. Chunki ular sizlarni mahkamalarga topshirib, sinagogalarda kaltaklaydilar.

¹⁸Men tufayli sizlarni hokimlar va shohlar huzuriga olib boradilar, sizlar esa ularga va gʻayriyahudiylarga Men haqimdagi Xushxabarni aytasizlar.

¹⁹Sizlarni mahkamaga olib borishganda: «Qanday gapiramiz, nima aytamiz», deb xavotir olmanglar. Nima aytishingiz oʻsha vaqtda sizlarga bildiriladi.

²⁰Oʻshanda sizlar emas, balki Otangiz Xudoning Ruhi sizlar orqali gapiradi.

²¹Aka ukasini, ota bolasini oʻlimga topshiradi. Bolalar oʻz ota — onalariga qarshi chiqib, ularni oʻldirtiradilar.

²²Mening nomim tufayli hamma sizlardan nafratlanadi. Lekin oxirigacha bardosh bergan najot topadi.

²³Agar sizlarni bir shaharda quvgʻin qilsalar, boshqasiga qochib boringlar. Sizlarga chinini aytayin: sizlar Isroilning shaharlarini aylanib chiqishga ulgurmasingizdan, Inson Oʻgʻli keladi.

²⁴Shogird ustozidan ustun emas, qul ham oʻzining xoʻjayinidan ustun emas.

²⁵Shogird ustoziday, qul xoʻjayiniday boʻlsa kifoya. Agar uy egasini Baalzabul, ya’ni ins — jinslar hukmdori[99] deb atagan boʻlishsa, uy ahlini undan battar nom bilan atashadi!

²⁶Shunday boʻlsa — da, odamlardan qoʻrqmanglar! Axir, har qanday yashirin narsa ma’lum boʻladi, har qanday sir ochiladi.

²⁷Sizga qorongʻida gapirayotganlarimni yorugʻda aytinglar. Qulogʻingizga shivirlab aytganlarimni uylarning tomi ustidan baqirib, e’lon qilinglar.

²⁸Tanani oʻldirib, jonni oʻldira olmaydiganlardan qoʻrqmanglar. Xudodan qoʻrqinglar! Chunki U jonni ham, tanani ham doʻzaxda halok etishga qodir.

²⁹Ikkita chumchuq bir tangaga[100] sotiladi, shunday emasmi? Biroq bularning birontasi ham osmondagi Otangizning xohishisiz yerga tushmaydi.

³⁰Sizlarning esa hatto boshingizdagi har bir tola sochingiz sanalgan.

³¹Shuning uchun qoʻrqmanglar, sizlar koʻplab chumchuqlardan qadrliroqsizlar.

³²Kim Meni insonlar oldida tan olsa, Men ham osmondagi Otamning oldida uni tan olaman.

³³Ammo kim insonlar oldida Meni rad etsa, Men ham osmondagi Otamning oldida uni rad etaman.

³⁴Meni yer yuziga tinchlik olib kelgan, deb oʻylamanglar. Men tinchlik emas, qilich olib kelganman.

³⁵Oʻgʻilni otasidan, qizni onasidan, kelinni qaynanasidan ajratish uchun kelganman.

³⁶Insonning dushmanlari oʻz uyidagilari boʻladi[101].

³⁷Kimki otasini yoki onasini Mendan ortiq sevsa, Menga loyiq emas. Kimki oʻgʻlini yoki qizini Mendan ortiq sevsa, Menga loyiq emas.

³⁸Kimki oʻz xochini olib[102], ortimdan yurmasa, Menga loyiq emas.

³⁹Oʻz jonini ayamoqchi boʻlgan uni yoʻqotadi. Men uchun jonini bergan esa, uni asrab qoladi.

⁴⁰Sizni qabul qilgan odam Meni qabul qilgan boʻladi. Meni qabul qilgan esa Meni Yuborganni qabul qilgan boʻladi.

⁴¹Kimki paygʻambarni paygʻambar boʻlgani uchun qabul qilsa, paygʻambarga munosib mukofotni oladi. Kimki solih odamni solih boʻlgani uchun qabul qilsa, solihga munosib mukofotni oladi.

⁴²Agar siz shogirdlarimning eng kichigiga u Mening shogirdim boʻlgani uchun bir piyola sovuq suv bersangiz, albatta mukofotingizni olasiz, deb sizga chinini aytaman.”