Read Uzbek Muqaddas Kitob Matto 12 Bible Online

Matto 12 - Uzbek Muqaddas Kitob bible

Matto 12

¹Oradan koʻp oʻtmay Iso Shabbat kuni bugʻdoyzordan oʻtib borayotgan edi. Och qolgan shogirdlari boshoqlardan uzib, donlarini yeyardilar[115].

²Farziylar buni koʻrib, Isoga: — Qara, shogirdlaring Shabbat kuni qonunga xilof ish[116] qilyaptilar! — deyishdi.

³Iso ularga dedi: — Dovud hamrohlari bilan och qolganda nimalar qilganini[117] nahotki sizlar hech oʻqimagan boʻlsangizlar?!

⁴U Xudoning uyiga kirib, muqaddas nonlarni[118] yegan. Qonunga muvofiq esa bunday nonlarni faqat ruhoniylar yeyishga haqli edilar. Dovudga va uning hamrohlariga bunday nonlarni yeyish taqiqlangan edi!

⁵Yoki Shabbat kunida Ma’baddagi ruhoniylar Shabbat qonunini buzsalar ham, aybdor boʻlmasliklarini Tavrotda oʻqimaganmisizlar?[119]

⁶Sizlarga shuni aytay: bu yerda Ma’baddan ham ulugʻ bir Zot turibdi.

⁷Agar sizlar: “Men qurbonlikni emas, rahm — shafqatni istayman”[120] degan soʻzlarning ma’nosini tushunganingizda edi, aybsiz odamlarni hukm qilmagan boʻlar edingizlar.

⁸Zotan, Inson Oʻgʻli Shabbat kunining ham Hokimidir.

⁹Iso u yerdan ketib, sinagogaga bordi.

¹⁰U yerda qoʻli shol bir odam bor edi. Isoni ayblamoqchi boʻlgan ba’zi odamlar Unga shunday savol berdilar: — Qonunga koʻra, Shabbat kuni xastalarga shifo berish mumkinmi?

¹¹Iso ularga shunday javob berdi: — Agar bir dona qoʻyingiz boʻlsa — yu, oʻsha qoʻyingiz Shabbat kuni chuqurga tushib ketsa, uni chiqarib olmasmidingiz?!

¹²Odam esa qoʻydan ancha qadrliroq — ku! Shunga koʻra, Shabbat kuni yaxshilik qilish qonunga muvofiqdir.

¹³Qoʻli shol odamga Iso: — Qoʻlingni uzat! — dedi. U qoʻlini uzatishi bilanoq, qoʻli narigi qoʻliday soppa — sogʻ boʻlib qoldi.

¹⁴Farziylar esa tashqariga chiqib, Isoni halok qilish uchun til biriktirishdi. Iso farziylarning bu niyatini bilib, u yerdan ketdi.

¹⁵Bir talay olomon Isoga ergashdi. U xastalarning hammasiga shifo berib,

¹⁶“Mening kimligimni aytmanglar!” deb ularga buyurardi.

¹⁷Shu tariqa Ishayo paygʻambarning aytgan quyidagi soʻzlari bajo boʻldi:

¹⁸“Mana Mening Qulim, Oʻzim Uni tanlab olganman. U koʻnglimni mamnun etgan Suyukligimdir. Men Unga Oʻz Ruhimni beraman, U adolatni elatlarga e’lon qiladi.

¹⁹Janjallashmaydi, baqirmaydi, Koʻchalarda hech kim Uning ovozini eshitmaydi.

²⁰U ezilgan qamishni sindirmaydi, Tutayotgan pilikni oʻchirmaydi, Qat’iyat bilan adolat oʻrnatadi.

²¹Elatlar Uning ismiga umid bogʻlaydi.”[121]

²²Shundan keyin Isoning oldiga jin chalgan bir odamni olib kelishdi. U ham koʻr, ham soqov edi. Iso unga shifo bergach, u gapiradigan va koʻradigan boʻldi.

²³Butun xalq hayratda qolib: “Bu Dovudning Oʻgʻli[122] emasmikan?!” derdi.

²⁴Bu voqeani eshitgan farziylar esa shunday dedilar: “U ins — jinslar hukmdori Baalzabulning[123] kuchi bilan jinlarni quvib chiqaryapti.”

²⁵Iso ularning nima haqida oʻylayotganini bilib turardi. U shunday dedi: “Nizo tufayli oʻz ichidan boʻlinib ketgan har bir shohlik xarob boʻladi, nizo tufayli boʻlingan shahar ham, xonadon ham barbod boʻladi.

²⁶Agar shayton shaytonni quvib chiqarsa, uning shohligi oʻzaro boʻlingan boʻladi. Bunday shohlik qanday tura oladi?!

²⁷Agar Men jinlarni Baalzabulning kuchi bilan quvib chiqarayotgan boʻlsam, u holda oʻz sheriklaringiz kimning kuchi bilan jinlarni quvib chiqarishyapti? Shu sababdan ham ular sizlarni hukm qiladi.

²⁸Agar Men jinlarni Xudoning Ruhi bilan quvayotgan boʻlsam, demak, Uning Shohligi sizlarga ham kelgan.

²⁹Kim kuchli odamning uyiga bostirib kirib, uning mol — mulkini talon — taroj qila oladi? Avval u uyning egasini bogʻlab qoʻyishi kerak, keyingina uyini talon — taroj qila oladi.

³⁰Kim Men tomonda boʻlmasa, Menga qarshidir. Kim Men bilan birga yigʻmasa, sochadi.

³¹Shuning uchun sizlarga aytaman: insonlarning har qanday gunohi va kufrligi kechiriladi. Lekin Muqaddas Ruhga kufrlik qilganlar[124] kechirilmaydi.

³²Kim Inson Oʻgʻliga qarshi soʻz aytsa, kechiriladi. Lekin kim Muqaddas Ruhga qarshi soʻz aytsa, ikki dunyoda ham kechirilmaydi.

³³Yaxshi daraxt yaxshi meva beradi, yomon daraxt esa yomon meva beradi. Har bir daraxtning qandayligini mevasidan bilsa boʻladi.

³⁴Voy ilonlar zoti! Sizlar yovuz boʻla turib, yaxshi narsa gapira olarmidingiz?! Axir, odamning dili nimaga toʻlib — toshsa, oʻsha tiliga chiqadi!

³⁵Yaxshi odam yuragining ezgulik xazinasidan yaxshilik chiqaradi, yomon odam yuragining yomonlik xazinasidan yomonlik chiqaradi.

³⁶Yana shuni aytib qoʻyay: sizlar aytadigan har bir bema’ni soʻzingiz uchun qiyomat kunida hisob berasizlar.

³⁷Sizlar oʻz soʻzlaringiz asosida yo oqlanasizlar, yoki ayblanasizlar.”

³⁸Shunda Tavrot tafsirchilari va farziylardan ba’zilari Isoga: “Ustoz, bizga bir alomat koʻrsatishingizni xohlar edik”, dedilar.

³⁹Iso ularga javoban dedi: “Bu qabih va bevafo nasl alomat soʻrayapti, ammo ularga Yunus paygʻambarning alomatidan[125] boshqa alomat berilmaydi.

⁴⁰Yunus uch kechayu kunduz nahang baliqning qornida boʻlganiday, Inson Oʻgʻli ham uch kechayu kunduz yer bagʻrida boʻladi.

⁴¹Naynavo[126] aholisi qiyomat kunida oʻrnidan turib, bu naslni mahkum etadi. Chunki Naynavoliklar Yunusning va’zidan keyin tavba qilganlar. Bu yerda esa Yunusdan ham buyukroq bir Zot turibdi!

⁴²Janub malikasi[127] qiyomat kunida oʻrnidan turib, bu naslning odamlarini mahkum etadi. Chunki Sulaymonning dono ta’limotini tinglagani malika dunyoning u chetidan kelgan edi. Bu yerda esa Sulaymondan ham buyukroq bir Zot turibdi!

⁴³Yovuz ruh insondan chiqqandan keyin, huzur — halovat izlab, suvsiz yerlarni kezadi, lekin topmaydi.

⁴⁴Soʻng: «Chiqqan uyimga qaytib boraman», deydi. Uyiga kelganda, uyni kimsasiz, supurilgan va yigʻishtirilgan holda koʻradi.

⁴⁵Shunda borib, oʻzidan ham yovuzroq boshqa yetti ruhni ergashtirib keladi va ular bilan uyga kirib, joylashib oladi. Oxir — oqibat oʻsha odamning ahvoli oldingidan ham battar boʻladi. Bu yovuz nasl ham xuddi oʻsha koʻyga tushadi.”

⁴⁶Iso olomonga gapirayotganda, onasi bilan ukalari Uni tashqarida kutib turgan edilar. Ular Iso bilan gaplashmoqchi edilar.

⁴⁷Kimdir Isoga dedi: — Onangiz bilan ukalaringiz tashqarida turishibdi, ular Siz bilan gaplashmoqchi.

⁴⁸Iso esa bu gaplarni aytgan odamga shunday javob berdi: — Mening onam kim? Ukalarim kim?

⁴⁹Soʻng qoʻli bilan shogirdlarini koʻrsatib, dedi: — Mana, Mening onam va ukalarim!

⁵⁰Osmondagi Otamning irodasini bajo keltirganlar Mening ukam, singlim va onam boʻladi.