Read Uzbek Muqaddas Kitob Matto 14 Bible Online

Matto 14 - Uzbek Muqaddas Kitob bible

Matto 14

¹Shu orada viloyat hukmdori[133] Hirod[134] Iso toʻgʻrisidagi xabarlarni eshitib,

²amaldorlariga dedi: “Bu Yahyo choʻmdiruvchi ekanligi aniq! U tirilib kelgan, shuning uchun moʻjizalar koʻrsatish qudratiga ega.”

³Uning bu gapni aytishiga sabab shu edi: bundan ancha vaqt oldin Hirod Yahyoni hibsga olgandi. U oʻz ukasi Filipning xotini Hirodiya dastidan Yahyoni kishanlab, zindonga tashlagan edi.

⁴Chunki Yahyo unga: “Bu xotin bilan yashashingiz qonunga zid”, deb aytar edi.

⁵Hirod Yahyoni oʻldirishni xohlagan boʻlsa — da, xalqdan qoʻrqqan edi. Chunki odamlar Yahyoni paygʻambar deb bilishardi.

⁶Hirodning tugʻilgan kuni boʻlganda, Hirodiyaning qizi oʻrtaga chiqib raqsga tushdi. Qizning raqsi Hirodga shunchalik yoqdiki,

⁷Hirod unga: — Ont ichaman, soʻragan narsangni muhayyo qilaman, — deb va’da berdi.

⁸Qiz esa onasining gapiga kirib: — Menga Yahyo choʻmdiruvchining boshini laganda keltirib bering! — dedi.

⁹Shoh aytgan gapidan afsus chekdi, ammo mehmonlari oldida qasam ichgani uchun qizning iltimosini bajarishni buyurdi.

¹⁰U zindonga odam yuborib, Yahyoning boshini oldirdi.

¹¹Uning boshini laganda keltirib qizga berdilar, qiz esa onasiga olib borib berdi.

¹²Yahyoning shogirdlari kelib, ustozning jasadini oldilar, uni dafn etdilar. Soʻng borib, Isoga xabar berdilar.

¹³Yahyo haqidagi xabarni eshitgandan keyin, Iso qayiqqa tushib[135], yolgʻiz Oʻzi kimsasiz joyga suzib ketdi. Olomon esa bu haqda eshitib, shaharlardan piyoda Uning orqasidan ergashdi.

¹⁴Iso qayiqdan chiqqanda, katta bir olomonni koʻrdi. Ularga achinib ketib, xastalariga shifo berdi.

¹⁵Kech kirganda, shogirdlar Isoning oldiga kelib dedilar: — Bu joy kimsasiz ekan, buning ustiga, juda kech boʻlib qoldi. Xalqni joʻnatib yuboring, toki ular atrofdagi qishloqlarga borib, oʻzlariga yegulik sotib olishsin.

¹⁶Iso ularga dedi: — Ketishlariga hojat yoʻq, sizlar ularga ovqat beringlar.

¹⁷— Bizda bor — yoʻgʻi beshta non va ikkita baliq bor, — deb javob berdi shogirdlar.

¹⁸— Oʻsha narsalarni Menga olib kelinglar, — dedi Iso.

¹⁹U odamlarga maysalar ustiga oʻtirishni buyurdi. Soʻng beshta non bilan ikkita baliqni oldi — da, osmonga qarab shukrona duosini oʻqidi. U nonlarni sindirib, shogirdlariga berdi, shogirdlar nonlarni odamlarga tarqatishdi.

²⁰Hamma yeb toʻydi. Ortib qolgan non burdalarini yigʻib olishganda, toʻla oʻn ikki savat chiqdi.

²¹Ayollar va bolalarni hisobga olmaganda, taxminan besh mingga yaqin odam non yegan edi.

²²Iso vaqt oʻtkazmay, shogirdlarini qayiqqa tushirib, koʻlning narigi tomoniga[136] ketishga majbur qildi. Olomonni esa uylariga qaytarib joʻnatib yubordi.

²³U odamlarni ketkizib yuborgandan keyin, ibodat qilish uchun bir Oʻzi tepalikka chiqdi. Oqshom tushdi, U hamon oʻsha yerda yolgʻiz edi.

²⁴Qayiq esa qirgʻoqdan ancha uzoqlashib qolgandi. Shamol qayiqqa qarshi esayotgani uchun toʻlqinlar qayiqqa kelib urilardi.

²⁵Erta saharda Iso koʻl ustida yurib, shogirdlari yoniga keldi.

²⁶Shogirdlar esa koʻl yuzida yurib kelayotgan Isoni koʻrib, qattiq vahimaga tushishdi. Qoʻrqqanlaridan: — Bu arvoh — ku! — deb baqirib yuborishdi.

²⁷Lekin Iso oʻsha zahoti ularga: — Dadil boʻlinglar! Qoʻrqmanglar, bu Menman! — dedi.

²⁸Shunda Butrus: — Hazrat, agar haqiqatan bu Siz boʻlsangiz, amr bering, men suv ustida yurib Sizning oldingizga boray, — dedi.

²⁹Iso: — Kel! — dedi. Butrus qayiqdan chiqib, suv ustida yurganicha Iso tomon yoʻl oldi.

³⁰Ammo shamolning kuchli ekanligidan qoʻrqib ketdi. U suvga choʻka boshlab: — Hazrat, meni qutqaring! — deb baqirdi.

³¹Iso shu zahoti qoʻlini choʻzib, Butrusni ushladi — da: — Ey imoni sust, nega ikkilanding?! — dedi.

³²Ular qayiqqa tushganlaridan keyin, shamol tindi.

³³Qayiqdagilar Isoga sajda qilib: — Siz haqiqatan ham Xudoning Oʻgʻlisiz![137] — dedilar.

³⁴Ular koʻldan suzib oʻtib[138], Genisaret[139] oʻlkasiga keldilar.

³⁵U yerdagi odamlar Isoni tanidilar va atrofga xabar yuborib, hamma xastalarni Isoning oldiga olib keldilar.

³⁶Xastalar Isodan: “Hech boʻlmasa kiyimingizning etagiga qoʻl tekkizaylik”, deb iltimos qilishardi. Unga qoʻl tekkizganlarning hammasi shifo topishardi.