Read Uzbek Muqaddas Kitob Matto 16 Bible Online

Matto 16 - Uzbek Muqaddas Kitob bible

Matto 16

¹Farziy va sadduqiy mazhabidagilar Isoning oldiga kelib, Uni sinab koʻrish maqsadida: — Bizga bir moʻjizali alomat koʻrsating. Shunda Sizni Xudo yuborganini tan olamiz, — dedilar.

²Iso ularga shunday javob berdi: — Quyosh botganda, sizlar, osmon qizgʻish, havo yaxshi boʻladi, deysizlar.

³Ertalab esa, osmon qizil, havoning avzoyi buzuq, bugun boʻron boʻladi, deysizlar. Sizlar osmonning avzoyiga qarab, ob — havoni aniqlay olasizlar — ku! Nega zamon alomatlarini talqin qila olmaysizlar?!

⁴Bu qabih va bevafo nasl alomat soʻrayapti, ammo ularga Yunusning alomatidan[147] boshqa alomat berilmaydi. Iso ularni qoldirib ketdi.

⁵Narigi qirgʻoqqa[148] yetib kelgan shogirdlar oʻzlari bilan non olishni unutgan edilar.

⁶Iso ularga dedi: — Farziylar bilan sadduqiylarning xamirturushidan[149] ehtiyot boʻlinglar!

⁷Shogirdlar oʻzlaricha: “Biz non olib kelmaganimiz uchun U shunday deyapti”, deb muhokama qila boshladilar.

⁸Shogirdlar nimani muhokama qilayotganlarini Iso bilib, ularga dedi: — Ey imoni sustlar! Nega sizlar, nonimiz yoʻq, deb aytyapsizlar?

⁹Hali ham tushunmadingizlarmi? Besh mingta odamga beshta nonni boʻlib berganim esingizdami? Oʻshanda qolgan — qutgan nonlarga nechta savatni toʻldirib olgan edingizlar?

¹⁰Yoki yettita nonni toʻrt ming kishiga boʻlib berganim — chi? Oʻshanda, non burdalari bilan nechta savatni toʻldirib olgan edingizlar?

¹¹Men sizlarga non haqida gapirmaganimni hali ham anglamadingizlarmi? Men sizlarga: “Farziylar bilan sadduqiylarning xamirturushidan ehtiyot boʻlinglar!” deb aytyapman.

¹²Shundan keyin shogirdlar tushundilarki, Iso ularni nonga ishlatiladigan xamirturushdan saqlanish toʻgʻrisida emas, balki farziylar bilan sadduqiylarning ta’limotidan ehtiyot boʻlish toʻgʻrisida ogohlantirayotgan ekan.

¹³Iso Filip Qaysariyasi[150] atrofidagi hududga keldi. Oʻsha yerda U shogirdlaridan soʻradi: — Odamlar Inson Oʻgʻlini kim deb biladi?

¹⁴Shogirdlar Unga shunday javob berdilar: — Ba’zilar Yahyo choʻmdiruvchi, ba’zilar Ilyos, ba’zilar Yeremiyo[151], boshqalar esa, qadimgi paygʻambarlardan biri, deb aytib yuribdilar.

¹⁵Iso ulardan soʻradi: — Sizlar — chi, Meni kim deb bilasiz?

¹⁶Shimoʻn Butrus[152] javob berib dedi: — Siz Masihsiz[153], Barhayot Xudoning Oʻgʻlisiz![154]

¹⁷Shimoʻn Butrusga Iso dedi: — Sen baxtlisan, ey Yuhanno[155] oʻgʻli Shimoʻn! Axir, bu sirni senga inson emas, balki osmondagi Otam ochib bergan.

¹⁸Shimoʻn, senga shuni aytay: Butrus isming “qoya” degani — ku![156] Mana shu qoya ustiga Men Oʻzimning jamoatimni[157] quraman. Hatto oʻlim shohligi ham jamoatimga bas kela olmaydi.

¹⁹Osmon Shohligi kalitlarini Men senga beraman. Yer yuzida sen nimani taqiqlasang, samoda ham taqiqlanadi. Yer yuzida sen nimaga ijozat bersang, samoda ham ijozat beriladi.

²⁰Bundan soʻng Iso: “Masih ekanimni hech kimga aytmanglar”, deb shogirdlariga qat’iy buyurdi.

²¹Shu vaqtdan boshlab, Iso shogirdlariga quyidagilarni ochiqchasiga tushuntira boshladi: “Men Quddusga borib, yoʻlboshchilar, bosh ruhoniylar[158] va Tavrot tafsirchilari qoʻlida koʻp azob chekaman. Meni oʻldirishadi, lekin uchinchi kuni Men tirilaman.”

²²Shunda Butrus Isoni chetga tortib dedi: — Bunday deb aytmang, Hazratim! Xudo saqlasin! Boshingizga aslo bunday kunlar kelmasin!

²³Iso esa Butrusga qarab: — Yoʻqol koʻzimdan, shayton! — dedi. — Meni yoʻldan urma! Sen Xudoning ishlarini emas, inson ishlarini oʻylayapsan.

²⁴Keyin Iso Oʻz shogirdlariga dedi: — Kimda — kim Menga ergashishni istasa, oʻzidan kechsin va xochini koʻtarib[159], orqamdan yursin.

²⁵Kim oʻz jonini asrab qolmoqchi boʻlsa, uni yoʻqotadi. Kim Men uchun jonini bersa, uni asrab qoladi.

²⁶Agar inson butun dunyoni egallab olsa — yu, oʻz jonidan mahrum boʻlsa, bundan unga nima foyda?! Inson oʻz joni evaziga qanday toʻlov bera oladi?!

²⁷Inson Oʻgʻli samoviy Otasining ulugʻvorligida, farishtalari bilan kelganda, har kimni oʻz ishiga yarasha taqdirlaydi.

²⁸Sizlarga chinini aytayin: bu yerda turganlardan ba’zilari, Inson Oʻgʻlining Shoh boʻlib kelganini koʻrmaguncha, oʻlmaydilar.