Read Uzbek Muqaddas Kitob Matto 17 Bible Online

Matto 17 - Uzbek Muqaddas Kitob bible

Matto 17

¹Oradan olti kun oʻtdi. Iso yoniga faqat Butrus, Yoqub va Yoqubning ukasi Yuhannoni olib, baland bir toqqa chiqdi.

²U yerda, ularning koʻz oʻngida Isoning qiyofasi oʻzgardi: yuzi quyoshday porlab, kiyimlari koʻzni qamashtiradigan darajada oppoq boʻlib qoldi.

³Birdaniga ularga Muso bilan Ilyos zohir boʻlishdi. Ular Iso bilan gaplashdilar.

⁴Butrus Isoga dedi: — Hazrat, yaxshi ham shu yerda ekanmiz! Istasangiz, uchta chayla yasayman[160]: bittasi Sizga, bittasi Musoga, bittasi Ilyosga.

⁵U shu gapini tugatmagan ham ediki, birdaniga oppoq bulut paydo boʻlib, hammalariga soya soldi. Bulut orasidan shunday ovoz keldi: — Bu Mening sevikli Oʻgʻlimdir, Undan mamnunman[161]. Unga quloq solinglar!

⁶Shogirdlar ovozni eshitganlarida, shunchalik qoʻrqib ketdilarki, yerga yuz tuban yiqildilar.

⁷Iso esa kelib, ularga qoʻl tekkizdi — da: — Turinglar, qoʻrqmanglar! — dedi.

⁸Ular boshlarini koʻtarib, yolgʻiz Isodan boshqa hech kimni koʻrmadilar.

⁹Togʻdan tushayotganlarida Iso ularga buyurdi: — Inson Oʻgʻli oʻlib tirilmaguncha, bu koʻrganlaringizni hech kimga aytmanglar.

¹⁰Shogirdlari Undan soʻradilar: — Nega Tavrot tafsirchilari, Masihdan oldin Ilyos kelishi kerak[162], deb aytadilar?

¹¹Iso ularga shunday javob berdi: — Toʻgʻri, avvalo Ilyos kelib, hamma narsani tiklashi kerak.

¹²Biroq Men sizlarga shuni aytaman: Ilyos allaqachon kelgan[163]. Ammo odamlar uni tanimay, uni xohlaganicha xoʻrladilar[164]. Xuddi shunga oʻxshab, Inson Oʻgʻli ham odamlar qoʻlida koʻp azob chekadi.

¹³Shunda shogirdlar tushundilarki, Iso ularga Yahyo choʻmdiruvchi toʻgʻrisida gapirayotgan ekan.

¹⁴Iso shogirdlari bilan olomon oldiga kelganda, bir odam Isoning oldida tiz choʻkib:

¹⁵— Hazrat, — dedi, — oʻgʻlimga rahm qiling! Uning tutqanoq kasali bor, qattiq azob chekmoqda. U koʻpincha olovga yoki suvga yiqilib tushadi.

¹⁶Oʻgʻlimni shogirdlaringiz oldiga olib kelgandim, ammo ular davolay olmadilar.

¹⁷Iso shunday dedi: — Ey imonsiz va buzuq avlod! Qachongacha sizlar bilan birga boʻlishim kerak?! Sizlarga yana qancha toqat qilishim kerak?! Bolani bu yerga olib kelinglar!

¹⁸Iso jinga doʻq qildi. Jin bolaning ichidan chiqib ketdi, shu zahoti bola sogʻayib qoldi.

¹⁹Shogirdlar Iso bilan yolgʻiz qolganlarida, Undan: — Nega biz jinni quvib chiqara olmadik? — deb soʻradilar.

²⁰Iso javob berib dedi: — Yetarli imoningiz yoʻqligi uchun[165] shunday boʻldi. Sizlarga chinini aytayin: agar zigʻirday[166] imoningiz boʻlib, shu toqqa: “Bu yerdan u yerga koʻch”, — deb aytsangiz, togʻ koʻchadi. Sizlar uchun imkonsiz narsa boʻlmaydi[167].

²²Iso shogirdlari bilan Jalila hududiga qaytib kelgandan keyin, ularga dedi: — Inson Oʻgʻli odamlar qoʻliga tutib beriladi.

²³Uni oʻldirishadi, uchinchi kuni esa U tiriladi. Shogirdlar nihoyatda gʻamgin boʻlib qoldilar.

²⁴Iso bilan shogirdlari Kafarnahumga kelganlarida, Ma’bad soligʻini[168] yigʻuvchilar Butrusning oldiga kelib: — Ustozingiz Ma’bad soligʻini toʻlamaydimi? — deb soʻradilar.

²⁵— Toʻlaydi! — deb javob berdi Butrus. Butrus uyga kelgach, Iso birinchi boʻlib gapirdi: — Butrus[169], sening fikring qanday? Bu dunyo shohlari soliq va bojni kimdan yigʻadilar? Oʻzinikilardanmi yoki begonalardanmi?

²⁶— Begonalardan — da, — deb javob berdi Butrus. — Demak, oʻzinikilar soliqdan ozod ekan — da, — dedi Iso. —

²⁷Ammo ularni norozi qilmaylik. Koʻlga borib qarmoq tashla. Birinchi ilingan baliqni olib ogʻzini ochsang, kumush tangani[170] topasan. Tangani olib, ikkovimiz uchun soliq toʻla.