Read Uzbek Muqaddas Kitob Matto 18 Bible Online

Matto 18 - Uzbek Muqaddas Kitob bible

Matto 18

¹Shu payt shogirdlar Isoning oldiga kelib: “Osmon Shohligida eng kattasi kim boʻladi?” — deb soʻradilar.

²Iso yoniga bir bolani chaqirdi, uni oʻrtalarida turgʻizib,

³dedi: “Sizlarga chinini aytayin: agar sizlar oʻzgarmasangiz va bolalarday boʻlmasangiz, hech qachon Osmon Shohligiga kira olmaysizlar.

⁴Agar oʻzingizni mana shu bola singari, past tutsangiz, Osmon Shohligida eng kattasi boʻlasiz.

⁵Kim shunday bir bolani Mening nomimdan qabul qilsa, Meni qabul qilgan boʻladi.

⁶Menga ishongan shu kichiklarning birontasini[171] yoʻldan ozdirgan odamning holiga voy. Bunday qilgandan koʻra, oʻsha odamning boʻyniga tegirmon toshini osib, dengiz tubiga choʻktirilgani oʻzi uchun yaxshiroq boʻlar edi.

⁷Odamlarni yoʻldan ozdiradigan vasvasalar dastidan bu dunyoning holiga voy! Vasvasalar albatta keladi, lekin vasvasaga sababchi boʻlgan odamning holiga voy!

⁸Agar yoʻldan ozishingga qoʻling yoki oyogʻing sababchi boʻlsa, uni chopib tashlab, uloqtirib yubor. Ikki qoʻl yoki ikki oyoq bilan abadiy olovga tashlangandan koʻra, mayib yoki choʻloq boʻlib abadiy hayotdan bahramand boʻlganing yaxshiroqdir.

⁹Agar yoʻldan ozishingga koʻzing sababchi boʻlsa, uni oʻyib olib, uloqtirib yubor. Ikki koʻzing bilan doʻzax oloviga tushgandan koʻra, bir koʻzing bilan abadiy hayotdan bahramand boʻlganing yaxshiroqdir.

¹⁰Ehtiyot boʻlinglar, bu kichiklardan birontasini ham xor qilmanglar. Sizlarga shuni aytay: samoda ularning farishtalari doimo samoviy Otamning jamolini koʻrib turadi[172].

¹²Nima deb oʻylaysiz: agar bir odamning yuzta qoʻyi boʻlsa — yu, ulardan biri adashib qolsa, u toʻqson toʻqqiztasini togʻlarda qoldirib, adashib qolganini izlab ketmaydimi?!

¹³Agarda uni topib olsa, sizga chinini aytay: adashmagan toʻqson toʻqqiztasidan koʻra, shu bitta qoʻy uchun u koʻproq sevinadi.

¹⁴Shu singari osmondagi Otangiz ham bu kichiklardan birontasining yoʻqolib qolishini istamaydi.

¹⁵Agar birodaringiz sizga qarshi gunoh qilsa, uning oldiga boring. U bilan yakka holda gaplashib aybini yuziga ayting. Agar u sizga quloq solsa, siz orangizdagi birodarlik rishtalarini tiklagan boʻlasiz.

¹⁶Agar sizga quloq solmasa, oʻzingiz bilan yana bir yoki ikki kishini olib boring, chunki «har bir masala ikkita yoki uchta guvohning soʻzlari asosida koʻrib chiqiladi.»[173]

¹⁷Agar birodaringiz ularga ham quloq solmasa, imonlilar jamoatiga[174] ayting. Agar imonlilar jamoatiga ham quloq solmasa, uni butparast yoki soliqchi[175] deb hisoblab, u bilan aloqani uzing.

¹⁸Sizlarga chinini aytayin: yer yuzida sizlar nimani taqiqlasangizlar, samoda ham taqiqlanadi. Yer yuzida sizlar nimaga ijozat bersangizlar, samoda ham ijozat beriladi.

¹⁹Sizlarga yana shuni ham aytay: oralaringizdan ikkitangiz yakdil boʻlib biron narsa uchun ibodat qilsangizlar, osmondagi Otam tilagingizni bajaradi.

²⁰Qayerda ikki yoki uch kishi Mening nomim uchun yigʻilsa, Men oʻsha yerda ularning orasida boʻlaman.”

²¹Shundan keyin Butrus kelib Isoga dedi: “Hazrat, agar birodarim menga qarshi gunoh qilsa, uni necha marta kechiray? Yetti martami?”

²²“Sizlarga shuni aytay: yetti marta emas, — dedi Iso, — balki yetmish karra yetti marta[176].

²³Shu sababli Osmon Shohligini bir shohga qiyoslash mumkin. Shoh oʻz xizmatkorlari bilan hisob — kitob qilmoqchi boʻlibdi.

²⁴Hisob — kitobni boshlaganda, uning huzuriga ming — minglab tilla tanga[177] qarzdor boʻlgan xizmatkorini olib kelibdilar.

²⁵Lekin qarz toʻlashga qurbi yetmagani uchun shoh unga: — Oʻzingni, xotiningni, bolalaringni va butun mol — mulkingni sotib, qarzingni toʻlaysan, — deb buyuribdi.

²⁶Xizmatkor shohning oyogʻiga yiqilib: — Ozgina sabr qiling, hamma qarzimni toʻlayman, — debdi.

²⁷Xizmatkoriga shohning rahmi kelibdi. Shoh uni qoʻyib yuborib, qarzidan kechibdi.

²⁸Xizmatkor esa tashqariga chiqib, oʻzidan yuz kumush tanga[178] qarzdor boʻlgan bir sherigini uchratib qolibdi. Uni yoqasidan olib: — Qarzingni toʻla! — deb boʻgʻa boshlabdi.

²⁹Sherigi esa uning oyoqlariga yiqilib: — Ozgina sabr qiling, qarzimni toʻlayman, — deb yolvoribdi.

³⁰Ammo u koʻnmabdi: — Qarzingni toʻlamaguningcha zindonda yotasan, — deb sherigini qamatib qoʻyibdi.

³¹Boshqa xizmatkorlar yuz bergan voqeani koʻrib, xafa boʻlibdilar. Shohning huzuriga borib, hammasini aytib beribdilar.

³²Shunda shoh xizmatkorini huzuriga chaqirib: — Ey yaramas xizmatkor! — debdi. — Menga yolvorganing uchun barcha qarzingdan kechdim.

³³Men senga rahm qilganimday, sen ham sherigingga rahm qilsang boʻlmasmidi?!

³⁴Gʻazablangan shoh xizmatkorini zindonbonning qoʻliga topshirib: — Hamma qarzini toʻlamaguncha unga azob beringlar, — deb buyuribdi.

³⁵Xullas, agar sizlar birodaringizni chin dildan kechirmasangiz, osmondagi Otam sizlarni ham shu koʻyga soladi.”