Read Uzbek Muqaddas Kitob Matto 19 Bible Online

Matto 19 - Uzbek Muqaddas Kitob bible

Matto 19

¹Iso bu gaplarini tugatgandan keyin, Jalila hududini tark etdi. U Iordan daryosining sharq tomoniga, Yahudiya oʻlkasining narigi tomoniga bordi.

²Bir talay olomon Isoga ergashib borgan edi. Iso u yerda xastalarga shifo berdi.

³Bir necha farziylar Isoning oldiga keldilar va Uni sinamoqchi boʻlib soʻradilar: — Qonunga koʻra, erkak kishi har qanday sabab bilan oʻz xotinidan ajralishi mumkinmi?[179]

⁴Iso ularga shunday javob berdi: — Nahotki sizlar: azalda Yaratuvchi “odamlarni erkagu ayol qilib yaratdi”[180] degan soʻzlarni oʻqimagan boʻlsangizlar?

⁵“Shuning uchun erkak kishi ota — onasidan boʻlak boʻlib, xotiniga bogʻlanib qoladi, ikkalasi bir tan boʻladilar.”[181]

⁶Bunga koʻra, ular endi ikki emas, balki bir tan hisoblanadilar. Xudo birga qoʻshganni bandasi ajratmasin.

⁷Farziylar esa Isoga dedilar: — Unday boʻlsa, nima uchun Muso, erkak oʻz xotiniga taloq xatini yozib berib, joʻnatib yuborsin, deb amr bergan?[182]

⁸Iso ularga shunday javob berdi: — Sizlar bagʻri tosh boʻlganlaringiz uchun Muso xotinlaringiz bilan ajrashishga ijozat bergan, ammo azalda bunday boʻlmagan.

⁹Men sizlarga shuni aytayin: kim bevafolikdan boshqa sabab tufayli oʻz xotini bilan ajrashib, boshqasiga uylansa, zino qilgan boʻladi[183].

¹⁰Shogirdlar Isoga dedilar: — Agar erkakning xotiniga nisbatan shunday majburiyati boʻlsa, uylanmagan yaxshiroq ekan — da!

¹¹Iso esa shogirdlariga: — Ha, bu ta’limotimni hamma ham qabul qilavermaydi, — dedi. — Bu ta’limotim Xudo atagan odamlargagina tegishli.

¹²Ba’zi erkaklarning uylana olmasligiga ayrim sabablar bor: ba’zilarning erkakligi tugʻma zaifdir. Boshqalari esa odamlar tomonidan bichilgan. Yana boshqalari Osmon Shohligi yoʻlida uylanishdan voz kechadilar. Bu ta’limotni qabul qila oladigan qabul qilsin.

¹³Iso bolalarimizga qoʻl qoʻyib duo qilsin deb, odamlar Isoning oldiga bolalarni olib kelishdi. Shogirdlar esa bolalarni olib kelgan odamlarni koyidilar.

¹⁴Ammo Iso dedi: — Bolalarga yoʻl beringlar, Mening oldimga kelishlariga toʻsqinlik qilmanglar! Zero, Osmon Shohligi shundaylarnikidir.

¹⁵Iso bolalarning boshiga qoʻl qoʻyib, duo qildi, keyin Oʻz yoʻliga ketdi.

¹⁶Shu mahal bir odam Isoning yoniga kelib: — Ustoz![184] Abadiy hayotga ega boʻlishim uchun qanday yaxshi ish qilishim kerak? — deb soʻradi.

¹⁷Iso unga dedi: — Nega Mendan yaxshi ish toʻgʻrisida soʻrayapsan? Faqatgina Xudo yaxshi — ku![185] Abadiy hayotdan bahramand boʻlishni istasang, Xudoning amrlariga rioya qilgin.

¹⁸— Qaysilariga? — deb soʻradi u. Iso dedi: — “Qotillik qilma. Zino qilma. Oʻgʻrilik qilma. Yolgʻon guvohlik berma.

¹⁹Ota — onangni hurmat qil. Oʻzgani oʻzingni sevganday sevgin”[186] degan amrlarga.

²⁰Yigit Unga dedi: — Bularning hammasiga amal qilib kelaman. Yana nima qilishim kerak?

²¹Iso yigitga aytdi: — Agar komil boʻlishni istasang, borib, mol — mulkingni sotib, pulini kambagʻallarga tarqat. Shunda samoda xazinang boʻladi. Keyin kelib, Menga ergashgin.

²²Yigit bu soʻzlarni eshitib, gʻamgin boʻlib qaytib ketdi, chunki uning mol — mulki koʻp edi.

²³Iso shogirdlariga dedi: — Sizga chinini aytayin: boy odamning Osmon Shohligiga kirishi qiyin boʻladi.

²⁴Sizlarga yana shuni aytay: boyning Xudo Shohligiga kirishidan koʻra, tuyaning igna teshigidan oʻtishi osonroqdir.

²⁵Shogirdlar buni eshitib, gʻoyat ajablanishdi va: — Unday boʻlsa, kim najot topa olar ekan? — deyishdi.

²⁶Iso ularga koʻz tikib dedi: — Inson uchun bu imkonsizdir, lekin Xudo uchun hamma narsaning imkoni bor.

²⁷Shunda Butrus dedi: — Mana, biz uy — joyimizni tashlab, Sizning orqangizdan ergashib keldik. Buning evaziga nima olamiz?

²⁸Iso ularga shunday javob berdi: “Sizga chinini aytayin: hamma narsa yangilanganda[187] va Inson Oʻgʻli Oʻzining ulugʻvor taxtida oʻtirganda, Mening orqamdan ergashib kelgan sizlar ham oʻn ikkita taxtga oʻtirib, Isroilning oʻn ikki qabilasiga hukmronlik qilasizlar.

²⁹Men uchun uy — joyini, aka — ukalarini, opa — singillarini, ota — onasini, bolalarini yoki yer — mulkini tashlab ketgan har bir kishi bulardan yuz hissa ortiqrogʻini olib, abadiy hayotga ega boʻladi.

³⁰Ammo birinchi boʻlganlarning koʻplari oxirgi boʻladilar, oxirgilar esa birinchi boʻladilar.