Read Uzbek Muqaddas Kitob Matto 23 Bible Online

Matto 23 - Uzbek Muqaddas Kitob bible

Matto 23

¹Shundan keyin Iso olomonga va shogirdlariga gapirdi:

²“Qonunni izohlash huquqi Tavrot tafsirchilari va farziylarga berilgan.

³Shu bois ularga quloq solinglar, aytganini qilinglar, ammo qilganini qilmanglar! Chunki ular oʻzlari aytganlarni qilmaydilar.

⁴Ular koʻtarib boʻlmaydigan ogʻir yukni birovlarga yuklaydilar, oʻzlari esa yordam berish uchun hatto barmogʻini ham qimirlatmaydilar.

⁵Hamma ishlarini boshqalar koʻrsin deb qiladilar. Peshanalariga taqqan nishonalarini kattaroq, kiyimlarining popuklarini[226] uzunroq qiladilar.

⁶Shuningdek, ziyofatlarda toʻrga chiqishni va sinagogalarda yaxshi joylarda oʻtirishni yoqtiradilar.

⁷Bozorlarda odamlar ularga salom berishlarini, «ustoz» deb murojaat etishlarini yaxshi koʻradilar.

⁸Ammo sizlarni hech kim «ustoz» deb chaqirmasin, chunki hammangizning bitta Ustozingiz bor. Sizlar esa bir teng birodaru opa — singilsizlar.

⁹Yer yuzida hech kimni ota deb aytmang, chunki sizlarning samoda yagona Otangiz bor.

¹⁰Hech kim sizlarni «yoʻlboshchi» deb ham aytmasin, chunki sizlarning yakkayu yagona yoʻlboshchingiz Masihdir.

¹¹Orangizda kim bosh boʻlsa, sizlarga xizmat qilsin.

¹²Zotan, oʻzini oʻzi yuksaltirgan kamsitiladi, oʻzini past tutgan esa yuksaltiriladi.

¹³Holingizga voy, ey tafsirchilar va farziylar! Sizlar ikkiyuzlamachisizlar! Axir, sizlar odamlar kirmasin deb, Osmon Shohligi eshiklarini berkitib qoʻyyapsizlar. U yerga oʻzlaringiz ham kirmayapsizlar, kirmoqchi boʻlganlarni ham kirgizmayapsizlar[227].

¹⁵Holingizga voy, ey tafsirchilar va farziylar! Sizlar ikkiyuzlamachisizlar! Axir, sizlar hech boʻlmasa bir kishini oʻz diningizga kiritish uchun dengizu quruqlikni kezib chiqasizlar. Niyatingizga erishganingizda esa, uni oʻzingizdan besh battar doʻzaxi odam qilasizlar.

¹⁶Ey koʻr yetakchilar, holingizga voy! Sizlar: «Kim Ma’bad haqi deb qasam ichsa, u qasamini bajarmasa ham boʻladi, ammo kim Ma’bad oltini haqi deb qasam ichsa, oʻz qasamini bajarishi shart», deysiz.

¹⁷Hoy koʻr nodonlar! Qaysi biri buyukroq: Ma’badning oltinimi yoki oltinni muqaddas qilgan Ma’badning oʻzimi?!

¹⁸Yana sizlar shunday deb aytasizlar: «Kim qurbongoh haqi deb qasam ichsa, u qasamini bajarmasa ham boʻladi, ammo kim qurbongohdagi qurbonlik haqi deb qasam ichsa, qasamini bajarishi shart», deysizlar.

¹⁹Shu qadar koʻr boʻlmasangiz — a! Qaysi biri buyukroq: qurbonlikmi yoki qurbonlikni muqaddas qilgan qurbongohmi?

²⁰Axir, qurbongoh haqi deb qasam ichgan, ham qurbongohning oʻzi, ham undagi barcha qurbonliklar haqi qasam ichgan boʻladi — ku!

²¹Ma’bad haqi deb qasam ichgan esa, ham Ma’badning oʻzi, ham Ma’badda yashaydigan Xudo haqi qasam ichgan boʻladi.

²²Osmon haqi deb qasam ichgan esa, osmondagi Xudoning taxti va taxtda oʻtirgan Xudoning Oʻzi haqi qasam ichgan boʻladi.

²³Holingizga voy, ey tafsirchilar va farziylar! Sizlar ikkiyuzlamachisizlar! Sizlar yalpiz, ukrop va ziradan ushr[228] berasizlar, ammo qonunning adolat, shafqat va imon kabi eng muhim ta’limotlarini pisand qilmaysizlar. Bularning birini bajara turib, ikkinchisini ham tashlab qoʻymasligingiz kerak edi.

²⁴Hoy koʻr yetakchilar! Sizlar ichimligingizdan chivinni suzib olasizlar[229], ammo tuyani butunligicha yutib yuborasizlar!

²⁵Holingizga voy, ey tafsirchilar va farziylar! Sizlar ikkiyuzlamachisizlar! Sizlar piyolayu laganingizning sirtini tozalaysizlar — u, ammo ichi ochkoʻzlik va xudbinlikka toʻla.

²⁶Ey koʻr farziy! Sen, avvalo, piyola va laganning ichini tozalab ol, shunda ularning sirti ham toza boʻladi.

²⁷Holingizga voy, ey tafsirchilar va farziylar! Sizlar ikkiyuzlamachisizlar! Chunki sizlar ohaklangan qabrlarga[230] oʻxshaysizlar: qabrlarning tashqi tomoni chiroyli, ammo ichi murdalarning suyaklariga va har xil iflosliklarga toʻla.

²⁸Shu singari, sizlar ham tashqi tomondan boshqalarga taqvodor boʻlib koʻrinasiz, ammo ichingiz ikkiyuzlamachilikka va gunohga toʻla.

²⁹Holingizga voy, ey tafsirchilar va farziylar! Sizlar ikkiyuzlamachisizlar! Axir, sizlar paygʻambarlarga maqbaralar qurib, taqvodorlarning qabrlarini bezatib,

³⁰shunday deysizlar: «Agar ota — bobolarimiz davrida biz ham yashaganimizda edi, ularga qoʻshilishib paygʻambarlarning qonini toʻkmagan boʻlardik.»

³¹Bu bilan sizlar paygʻambarlarni qatl qilganlarning oʻgʻillari ekaningizni tan olyapsizlar.

³²Ota — bobolaringiz boshlagan ishni oxiriga yetkazinglar endi!

³³Hoy ilonlar, zaharli ilonlar zoti! Sizlar doʻzax jazosidan qanday qochib qutulasiz?!

³⁴Ana shu sababdan Men oldingizga paygʻambarlarni, donishmandu ustozlarni yuboraman. Ammo sizlar ularning ba’zilarini oʻldirasizlar, ba’zilarini xochga mixlaysizlar, boshqalarini esa sinagogalaringizda qamchilab, shaharma — shahar quvgʻin qilasizlar.

³⁵Natijada oʻldirilgan hamma begunoh odamlarning qoni uchun sizlar jazolanasizlar. Aybsiz Hobilning toʻkilgan qonidan tortib, qurbongoh bilan Ma’bad orasida siz oʻldirgan Barxiyo oʻgʻli Zakariyoning[231] qoni sizning gardaningizda boʻladi.

³⁶Ha, sizlarga chinini aytaman: bu nasl hamma qotilliklar uchun jazo oladi.

³⁷Eh Quddus, Quddus! Paygʻambarlarni qatl etib, huzuriga yuborilganlarni toshboʻron qiluvchi shahar! Tovuq oʻz joʻjalarini qanotlari ostiga qanday toʻplasa, Men ham sening xalqingni bir necha marta shunday toʻplamoqchi boʻldim. Lekin sen istamading.

³⁸Ey Quddus aholisi, sizning Ma’badingiz huvullab qoladi.

³⁹Sizga shuni aytay: «Egamiz nomidan keladigan Inson baraka topsin»[232], deb aytmaguningizcha, Meni koʻrmaysizlar.”