Read Uzbek Muqaddas Kitob Matto 28 Bible Online

Matto 28 - Uzbek Muqaddas Kitob bible

Matto 28

¹Shabbat kunining ertasiga, yakshanba kuni tongotarda Magdalalik[297] Maryam bilan boshqa Maryam[298] qabrni koʻrgani borishdi.

²Shunda toʻsatdan qattiq zilzila boʻldi, chunki Egamizning farishtasi osmondan tushib, qabr ogʻzidagi toshni agʻdarib yubordi. Farishta oʻsha tosh ustiga oʻtirdi.

³Uning qiyofasi yashinday porlardi, kiyimlari qorday oppoq edi.

⁴Uni koʻrib soqchilar shunchalik qoʻrqib ketdilarki, titrab, murdaday qotib qoldilar.

⁵Farishta ayollarga dedi: — Qoʻrqmanglar! Bilaman, sizlar xochga mixlangan Isoni qidiryapsizlar.

⁶U bu yerda yoʻq. Oʻzi aytganiday, U tirildi. Mana, kelib koʻringlar, U shu yerda yotgan edi.

⁷Endi tezroq borib, Uning shogirdlariga: “Iso oʻlikdan tirildi. U sizlarni Jalilada kutyapti. Uni oʻsha yerda koʻrasizlar”, — deb aytinglar. Sizlarga aytadigan gapim shu edi.

⁸Ayollar shosha — pisha qabr yonidan ketdilar. Qoʻrquv va cheksiz sevinchga toʻlib, Isoning shogirdlariga xabar bergani yugurib ketdilar.

⁹Birdaniga Isoning Oʻzi ularning qarshisidan chiqib: — Salom! — dedi. Ayollar Isoning oldiga borib, oyoqlariga yopishgancha Unga sajda qildilar.

¹⁰Iso ularga dedi: — Qoʻrqmanglar! Borib, birodarlarimga: “Jalilaga borar ekansizlar”, deb aytinglar. Ular Meni oʻsha yerda koʻradilar.

¹¹Ayollar ketganlaridan keyin, soqchilar boʻlinmasidan bir nechtasi shaharga kirib, yuz bergan voqea toʻgʻrisida bosh ruhoniylarga aytib berdilar.

¹²Bosh ruhoniylar bilan yoʻlboshchilar uchrashib, reja tuzdilar. Ular soqchilarga katta miqdorda pul berib,

¹³shunday dedilar: — Sizlar hammaga: “Isoning shogirdlari kechasi kelib, biz uxlab yotganimizda jasadni oʻgʻirlab ketishdi”, deb aytasizlar.

¹⁴Bordi — yu, bu xabar hokimning[299] qulogʻiga yetib borgudek boʻlsa, uni oʻzimiz ishontiramiz, sizlarni har qanday koʻngilsizlikdan xalos etamiz.

¹⁵Shunday qilib, soqchilar pulni olib, aytilganday qildilar. Voqeaning shu ta’rifi bugungi kungacha[300] yahudiylar orasida keng tarqalgan.

¹⁶Oʻn bir shogird Jalila hududiga, Iso ularga tayin etgan toqqa bordilar.

¹⁷Shogirdlar Isoni koʻrganlari zahoti, Unga sajda qildilar, ba’zilari esa ikkilanib qoldilar.

¹⁸Iso kelib, ularga dedi: “Yeru osmondagi butun hokimiyat Menga berilgan.

¹⁹Shuning uchun borib, barcha xalqlardan shogird orttiringlar. Ularni Ota, Oʻgʻil va Muqaddas Ruh nomi bilan suvga choʻmdiringlar.

²⁰Men sizlarga buyurgan hamma narsaga amal qilishni ularga oʻrgatinglar. Zotan, Men har doim, dunyoning oxirigacha sizlar bilan birga boʻlaman.”[301]