Read Uzbek Muqaddas Kitob Matto 3 Bible Online

Matto 3 - Uzbek Muqaddas Kitob bible

Matto 3

¹Oʻsha kunlarda[25] Yahyo choʻmdiruvchi Yahudiya choʻlida[26] va’z qila boshladi.

²U odamlarga: “Tavba qilinglar, chunki Osmon Shohligi[27] yaqinlashdi!” deb aytardi.

³Yahyo toʻgʻrisida Ishayo paygʻambar shunday degan edi: “Choʻlda bir ovoz yangramoqda: «Egamizga yoʻl hozirlang, Unga toʻgʻri yoʻl oching!»”[28]

⁴Yahyo tuya junidan toʻqilgan kiyim kiyib, charm kamar taqib yurardi[29]. Uning yeguligi chigirtka va yovvoyi asal edi.

⁵Uning oldiga Quddus shahri va Yahudiya oʻlkasining qolgan hamma joylaridan hamda Iordan daryosi atroflaridan odamlar kelardi.

⁶Ular gunohlarini e’tirof etishar, Yahyo esa ularni Iordan suviga choʻmdirardi.

⁷Farziy[30] va sadduqiy[31] mazhablaridan boʻlgan koʻp odamlar suvga choʻmdirilish uchun kelayotganlarini Yahyo koʻrib, dedi: “Hoy, ilonlar zoti! Boshingizga kelayotgan Xudo gʻazabidan qochib qutulasiz, deb sizlarga kim uqtirdi?

⁸Tavbaga yarasha ish tutinglar!

⁹Oʻzingizcha: «Biz Ibrohim naslidanmiz», deb aytishni xayolingizga ham keltirmanglar! Sizlarga shuni aytay: Xudo mana bu toshlardan Ibrohimga avlod tiklashga qodir.

¹⁰Hozirdanoq daraxtlar ildizida bolta yotibdi. Yaxshi meva bermagan har bir daraxt kesilib, olovga tashlanadi.

¹¹Tavba qilganingizni koʻrsatish uchun men sizlarni suvga choʻmdiryapman. Lekin mendan ham qudratliroq boʻlgan bir Zot ortimdan kelmoqda. Men Uning choriqlarini koʻtarib yurishga ham arzimayman. U sizlarni Muqaddas Ruhga va olovga[32] choʻmdiradi.

¹²Uning panshaxasi qoʻlida tayyor turibdi. U Oʻz xirmonini shopiradi: bugʻdoyini omborga toʻplab, somonni esa soʻnmas oʻtda yondirib yuboradi.”

¹³Shu orada Iso Jalila hududidan Iordan daryosi boʻyiga bordi. U Yahyo tomonidan suvga choʻmdirilmoqchi edi.

¹⁴Lekin Yahyo Isoni toʻxtatmoqchi boʻlib dedi: — Aslida Siz meni suvga choʻmdirishingiz kerak! Siz boʻlsangiz mening oldimga keldingiz!

¹⁵Iso unga dedi: — Keling, bu safar shunday boʻla qolsin. Axir, biz Xudoning irodasini toʻla bajarishimiz zarur. Shundan keyin Yahyo rozi boʻldi.

¹⁶Iso suvga choʻmdirildi. U suvdan chiqqan zahoti, osmon ochilib ketdi va Iso Oʻz ustiga Xudoning Ruhi kaptar shaklida tushib qoʻnganini koʻrdi.

¹⁷Shu payt osmondan: “Bu Mening sevikli Oʻgʻlimdir[33], Undan nihoyatda mamnunman[34]”, degan ovoz keldi.