Read Uzbek Muqaddas Kitob Matto 4 Bible Online

Matto 4 - Uzbek Muqaddas Kitob bible

Matto 4

¹Iblisning sinovidan oʻtishi uchun Muqaddas Ruh Isoni sahroga boshlab ketdi.

²Iso qirq kun va qirq kecha roʻza tutdi, oxiri och qoldi.

³Shunda iblis[35] kelib, Isoni vasvasaga solmoqchi boʻlib dedi: — Agar Sen Xudoning Oʻgʻli[36] boʻlsang, bu toshlarga buyur, nonga aylansin!

⁴Iso unga javoban dedi: — Yozilganki: “Inson faqat non bilan emas, balki Xudoning ogʻzidan chiqqan har bir soʻz bilan yashaydi.”[37]

⁵Keyin iblis Isoni muqaddas shahar Quddusga olib bordi. Uni Ma’badning eng yuqori joyiga chiqarib,

⁶shunday dedi: — Agar Sen Xudoning Oʻgʻli boʻlsang, Oʻzingni pastga tashla. Axir, yozilgan — ku: “U Sen toʻgʻringda farishtalariga amr beradi, Oyogʻing toshga qoqilib ketmasin deya, Farishtalar qoʻllarida Seni koʻtarib boradi.”[38]

⁷Iblisga Iso dedi: — “Egang Xudoni sinama”[39], deb ham yozilgan.

⁸Soʻng Isoni iblis baland bir toqqa olib chiqdi. Unga olamning barcha shohliklarini hamda ularning hashamatini koʻrsatib,

⁹dedi: — Agar tiz choʻkib menga sajda qilsang, bularning hammasini Senga beraman.

¹⁰Shunda Iso dedi: — Yoʻqol koʻzimdan, shayton! Axir: “Egang Xudoga sajda qil, faqat Unga xizmat qil”[40], deb yozilgan — ku!

¹¹Shundan keyin Isoni iblis tark etdi. Farishtalar kelib, Isoga xizmat qildilar.

¹²Iso Yahyoning hibsga olinganini[41] eshitgach, Jalila hududiga qaytib bordi.

¹³U Nosira shahrida qolmay, Kafarnahumga borib oʻrnashdi. Kafarnahum shahri Zabulun va Naftali hududidagi[42] Jalila koʻli boʻyida joylashgan edi.

¹⁴Shunday qilib, Ishayo paygʻambarning aytgan quyidagi soʻzlari bajo boʻldi:

¹⁵“Ey Zabulun va Naftali yurti! Ey dengiz boʻyidagi yerlar va Iordanning narigi tomonidagi oʻlka! Ey gʻayriyahudiylar Jalilasi!

¹⁶Zulmatda yurgan xalq yorqin ziyoni koʻrdi, Oʻlim soya solgan yurt aholisi ustiga nur sochildi.”[43]

¹⁷Shu kundan boshlab Iso: “Tavba qilinglar, chunki Osmon Shohligi yaqinlashdi”, deb va’z qiladigan boʻldi.

¹⁸Iso Jalila koʻli boʻylab ketayotgan edi, ikki aka — ukani koʻrib qoldi. Birining ismi Butrus deb ataluvchi Shimoʻn, ukasiniki Endrus edi. Ular baliqchi boʻlib, koʻlga toʻr tashlayotgan edilar.

¹⁹Iso ularga dedi: “Ortimdan yuringlar, Men sizlarga odamlarni ovlashni oʻrgataman.”

²⁰Ular oʻsha zahotiyoq toʻrlarini tashlab, Isoga ergashdilar.

²¹Iso bir oz yurgandan keyin, Yoqub va Yuhanno degan ikki aka — ukani koʻrib qoldi. Ular otasi Zabadiyo bilan birga qayiqda toʻr yamayotgan edilar. Iso ularni ham chaqirdi.

²²Ular ham darhol qayiqni va otasini qoldirib, Isoning orqasidan ergashdilar.

²³Iso butun Jalila hududini kezib yurardi. U sinagogalarda ta’lim berib, Osmon Shohligi toʻgʻrisidagi Xushxabarni e’lon qilardi, odamlarning har xil xastaliklari va dardlariga shifo berar edi.

²⁴Iso haqidagi xabar butun Suriyaga[44] yoyildi. Turli — tuman dardu illatlardan qiynalib yurganlarni, jinga chalinganlarni, tutqanoq va shol kasaliga yoʻliqqanlarning hammasini Isoning oldiga keltirishardi. Iso ularning hammasiga shifo berardi.

²⁵Jaliladan, Dekapolis hududidan[45], Quddusdan, Yahudiyadan va Iordanning narigi tomonidagi yerlardan koʻplab odamlar Isoga ergashib kelardi.