Read Uzbek Muqaddas Kitob Matto 5 Bible Online

Matto 5 - Uzbek Muqaddas Kitob bible

Matto 5

¹Iso katta bir olomonni koʻrib, toqqa chiqib oʻtirdi. Shogirdlari Uning oldiga kelishdi.

²Iso shogirdlariga ta’lim berib, gap boshladi:

³“Ruhan kambagʻal boʻlganlar baxtlidir, Chunki Osmon Shohligi ularnikidir.

⁴Yigʻlayotganlar baxtlidir, Chunki ular tasalli topadilar.

⁵Kamtarin boʻlganlar baxtlidir, Chunki ular yer yuziga ega boʻladilar.

⁶Adolatga tashna boʻlganlar baxtlidir, Chunki Xudo ularni qondiradi.

⁷Rahmdil boʻlganlar baxtlidir, Chunki ular rahm — shafqat topadilar.

⁸Pokdil boʻlganlar baxtlidir, Chunki ular Xudoni koʻradilar.

⁹Tinchlik oʻrnatuvchilar baxtlidir, Chunki ular Xudoning farzandlari deb ataladilar.

¹⁰Xudoning yoʻlidan yurgani uchun Quvgʻin boʻlganlar baxtlidir, Chunki Osmon Shohligi ularnikidir.

¹¹Odamlar Men tufayli sizlarni haqoratlab quvgʻin qilganlarida, sizlar haqingizda yolgʻon gapirib tuhmat qilganlarida, baxtlisizlar!

¹²Sevininglar, xursand boʻlinglar. Sizlarni osmonda buyuk mukofot kutmoqda. Axir, sizdan avval oʻtgan paygʻambarlar ham xuddi shunday quvgʻin boʻlganlar.

¹³Sizlar yerning tuzisizlar. Lekin tuz oʻz ta’mini yoʻqotsa, uni yana qanday shoʻr qilib boʻladi?! Bunday tuz boshqa hech narsaga yaramaydi, uni oyoq ostiga tashlab yuborishadi.

¹⁴Sizlar dunyoning nurisizlar. Tepalikka qurilgan shaharni koʻzdan pinhon tutib boʻlmaydi.

¹⁵Hech kim chiroqni yoqib, ustini idish bilan yopib qoʻymaydi. Aksincha, uni chiroqpoyaga qoʻyishadi, shunda chiroq uydagilarning hammasiga yorugʻlik beradi.

¹⁶Sizning nuringiz ham insonlar oldida shunday porlasinki, ular yaxshi ishlaringizni koʻrib, osmondagi Otangizni[46] ulugʻlasinlar.

¹⁷Meni, Tavrot yoki paygʻambarlarning bitiklarini[47] bekor qilgani kelgan, deb oʻylamanglar. Men bekor qilgani emas, balki bajo keltirgani keldim.

¹⁸Sizga chinini aytayin: yeru osmon yoʻq boʻlib ketishi mumkin. Ammo Tavrotdagi na bir harf, na bir nuqta oʻchadi. Unda yozilgan hamma narsa amalga oshadi.

¹⁹Shu bois kim bu amrlarning eng kichigiga ham rioya qilmay, uni boshqalarga buzib oʻrgatsa, Osmon Shohligida eng kichik boʻladi. Lekin kim bu amrlarni bajarib, boshqalarga oʻrgatsa, Osmon Shohligida buyuk boʻladi.

²⁰Sizlarga aytib qoʻyay: agar sizlarning solihligingiz Tavrot tafsirchilari va farziylarning solihligidan ustun kelmasa, sizlar hech qachon Osmon Shohligiga kirolmaysizlar.

²¹Ajdodlarimizga shunday aytilganini eshitgansizlar: «Qotillik qilma[48]. Qotillik qilgan odam hukm qilinadi.»

²²Lekin Men sizlarga aytaman: oʻz yaqinidan hatto gʻazablangan odam[49] ham hukm qilinadi. Yaqinini haqoratlagan odam oliy mahkamada javob beradi. Yaqiniga: «Ahmoqsan» degan odam esa, doʻzax oloviga tashlanadi.

²³Shunday ekan, siz ehsoningizni qurbongohga olib kelganingizda, yaqiningiz nimadandir sizdan xafa ekanligi yodingizga tushsa,

²⁴ehsoningizni qurbongoh oldida qoldiring. Birinchi navbatda borib, yaqiningiz bilan yarashing, keyin kelib, ehsoningizni nazr qiling.

²⁵Birov sizni ayblab qozixonaga olib borsa, vaqtni boy bermay, yoʻldayoq ayblovchingiz bilan kelishib oling. Aks holda, ayblovchingiz sizni qozi oldiga olib boradi, qozi esa sizni mirshabga topshiradi. Sizni zindonga tashlashadi.

²⁶Sizlarga chinini aytay: oxirgi tiyiningizni toʻlamaguningizcha, u yerdan chiqolmaysiz.

²⁷«Zino qilma»[50], — deb aytilganini ham eshitgansizlar.

²⁸Lekin Men sizlarga aytaman: agar siz ayolga shahvat bilan qarasangiz, xayolingizda u bilan zino qilgan boʻlasiz.

²⁹Bordi — yu, oʻng koʻzingiz gunoh qilishingizga sababchi boʻlsa, uni oʻyib olib, uloqtirib yuboring. Butun badaningiz doʻzaxga tashlangandan koʻra, a’zolaringizdan bittasi yoʻq boʻlgani siz uchun yaxshiroqdir.

³⁰Agar oʻng qoʻlingiz gunoh qilishingizga sababchi boʻlsa, uni kesib tashlab, uloqtirib yuboring. Butun badaningiz doʻzaxga yoʻliqqandan koʻra, a’zolaringizdan bittasi yoʻq boʻlgani siz uchun yaxshiroqdir.

³¹Yana deyilganki: «Kim xotini bilan ajrashmoqchi boʻlsa, unga taloq xatini yozib bersin.»[51]

³²Lekin Men sizlarga aytaman[52]: kim bevafolik aybidan boshqa sabab tufayli oʻz xotini bilan ajrashsa, unga zino qilishga sabab topib beradi. Shuningdek, kim ajrashgan xotinga uylansa, zino qilgan boʻladi.

³³Ajdodlarimizga: «Ichgan qasamingdan qaytma. Egamizga bergan va’dalaringni bajargin»[53], deb aytilganini ham eshitgansizlar.

³⁴Lekin Men sizlarga aytaman: umuman qasam ichmanglar. «Osmon haqi», deya qasam ichmanglar, chunki osmon Xudoning taxtidir.

³⁵«Yer haqi», deya qasam ichmanglar, chunki yer Xudoning poyandozidir. «Quddus haqi», deya ham qasam ichmanglar, chunki Quddus buyuk Shohning[54] shahridir.

³⁶Boshingiz haqi ham qasam ichmanglar, chunki oʻzlaringiz sochingizning bir tolasini ham oq yoki qora qila olmaysiz.

³⁷Sizlarning soʻzingiz faqat «ha» yoki «yoʻq» boʻlsin. Bundan ortigʻi esa yovuz shaytondandir.

³⁸Sizlar: «Koʻz evaziga koʻz, tish evaziga tish»[55], — deb aytilganini ham eshitgansizlar.

³⁹Lekin Men sizlarga aytaman: sizga yomonlik qilgan odamga qarshilik koʻrsatmang. Agar kimdir oʻng chakkangizga ursa, unga chapini ham tuting.

⁴⁰Kim siz bilan da’volashib, koʻylagingizni olmoqchi boʻlsa, unga toʻningizni ham berib yuboring.

⁴¹Birov[56] sizni bir chaqirim[57] yoʻl yurishga majbur qilsa, u bilan birga ikki chaqirim yuring.

⁴²Sizdan soʻraganga bering, sizdan qarz olmoqchi boʻlgandan yuz oʻgirmang.

⁴³«Yaqiningni sevgin[58], dushmaningdan nafratlan», deb aytilganini ham eshitgansizlar.

⁴⁴Lekin Men sizlarga aytyapman: dushmanlaringizni yaxshi koʻringlar. Sizlarni quvgʻin qilganlar uchun ibodat qilinglar[59].

⁴⁵Shunda siz osmondagi Otangizning farzandlari boʻlasizlar. Chunki U Oʻz quyoshini yovuzlar ustida ham, yaxshilar ustida ham balqitadi, yomgʻirini solihlar ustiga ham, fosiqlar ustiga ham yogʻdiradi.

⁴⁶Agar sizni sevganlarnigina yaxshi koʻrsangiz, sizlarga qanday mukofot boʻladi? Axir, soliqchilar[60] ham shunday qilishmaydimi?

⁴⁷Agar siz faqat oʻz yaqinlaringiz bilan salomlashsangiz, boshqalardan nima farqingiz qoladi?! Axir, butparastlar ham xuddi shunday qilishmaydimi?!

⁴⁸Osmondagi Otangiz barkamol boʻlgani kabi, sizlar ham barkamol boʻlinglar.