Read Uzbek Muqaddas Kitob Matto 7 Bible Online

Matto 7 - Uzbek Muqaddas Kitob bible

Matto 7

¹Boshqalarni hukm qilishni bas qilinglar, shunda Xudo ham sizlarni hukm qilmaydi.

²Sizlar boshqalarni qanday hukm qilsangizlar, Xudo ham sizlarni xuddi shunday hukm qiladi. Sizlar boshqalarni hukm qilganda qanday oʻlchovdan foydalansangizlar, Xudo ham sizni hukm qilganda xuddi oʻshanday oʻlchovdan foydalanadi.

³Nega sen birodaringning koʻzidagi zirapchani koʻrasan — u, oʻz koʻzingdagi xodani sezmaysan?

⁴Oʻz koʻzingda xoda boʻla turib, qanday qilib birodaringga: «Kel, koʻzingdagi zirapchani olib tashlay», deb aytasan?

⁵Hoy, ikkiyuzlamachi! Oldin koʻzingdagi xodani chiqarib ol, shunda koʻzing tiniq koʻradi va birodaringning koʻzidan zirapchani chiqara olasan.

⁶Muqaddas boʻlgan narsani koʻppaklarga bermang, marvaridlaringizni choʻchqalar oldiga tashlamang. Aks holda, ular muqaddas narsalaringizni oyoq osti qilib, oʻzingizni ham tilka — pora qiladilar!

⁷Soʻrang, sizga beriladi. Izlang, topasizlar. Taqillating, eshik ochiladi.

⁸Chunki soʻragan har bir odam oladi, izlagan topadi, taqillatganga eshik ochiladi.

⁹Orangizdan qaysi bir ota oʻgʻli non soʻraganda, unga non oʻrniga tosh beradi?

¹⁰Yoki baliq soʻraganda, unga baliq oʻrniga ilon beradi?

¹¹Sizlar gunohkor boʻla turib bolalaringizga yaxshi hadyalar bera olar ekansiz, osmondagi Otangiz ham Undan soʻraganlarga a’lo ne’matlar berishga qanchalar tayyor!

¹²Odamlar sizlarga nima qilishlarini istasangiz, sizlar ham ularga oʻshani qilinglar. Tavrot va paygʻambarlar ta’limotining[68] magʻzi shundadir.

¹³Tor eshikdan kiringlar! Chunki halokatga olib boradigan darvoza enli, yoʻli ham kengdir. Bu yoʻldan yurayotganlar koʻp.

¹⁴Hayotga olib boradigan eshik esa juda tor, yoʻli ensizdir. Bu yoʻlni topadiganlar oz.

¹⁵Soxta paygʻambarlardan ehtiyot boʻlinglar! Ular sizning oldingizga qoʻy poʻstinida keladilar, lekin ichlaridan yirtqich boʻrilardir.

¹⁶Ularning kimligini qilgan ishlaridan bilib olasiz. Axir, tikanzordan uzumni, yantoqdan anjirni terib boʻlmaydi — ku!

¹⁷Har bir yaxshi daraxt yaxshi meva beradi, yomon daraxt esa yomon meva beradi.

¹⁸Yaxshi daraxt yomon meva berolmaydi, yomon daraxt ham yaxshi meva berolmaydi.

¹⁹Yaxshi meva bermaydigan har bir daraxt esa kesilib, olovga tashlanadi.

²⁰Shunday qilib, soxta paygʻambarlarni mevalaridan bilib olasiz.

²¹Meni «Yo Rabbiy, yo Rabbiy!» deb chaqirgan har kim Osmon Shohligiga kiravermaydi. U yerga faqat osmondagi Otamning irodasini bajargan odamlargina kiradi.

²²Qiyomat kunida koʻplar Menga shunday deydilar: «Yo Rabbiy, yo Rabbiy, biz Sening noming bilan va’z qilgan edik! Sening noming bilan jinlarni quvib chiqargandik! Sening noming bilan koʻp moʻjizalar qilgan edik — ku!»

²³Men esa ularga deyman: «Men sizlarni aslo tanimayman! Yoʻqolinglar, ey badkirdorlar!»

²⁴Kim Mening bu soʻzlarimni eshitib, ularga amal qilsa, uyini tosh ustiga qurgan dono odamga oʻxshaydi.

²⁵Yomgʻir yogʻib, sellar toshib, shamollar esib, oʻsha uyni bosib qolibdi. Lekin tosh ustiga oʻrnatilgani uchun uy qulamabdi.

²⁶Biroq kim Mening bu soʻzlarimni eshitib, ularga amal qilmasa, oʻz uyini qum ustiga qurgan ahmoq odamga oʻxshaydi.

²⁷Yomgʻir yogʻib, sellar toshib, shamollar esib, oʻsha uyni bosib qolibdi. Uy qulab, butunlay vayron boʻlibdi!”

²⁸Iso bu gaplarini aytib boʻlgandan keyin, olomon Uning ta’limotidan hayratga tushdi.

²⁹Chunki Iso Tavrot tafsirchilariday[69] emas[70], balki hokimiyat egasi kabi ta’lim berar edi.