Read Uzbek Muqaddas Kitob Mark 11 Bible Online

Mark 11 - Uzbek Muqaddas Kitob bible

Mark 11

¹Iso shogirdlari bilan Quddusga yaqinlashib qolgan edilar. Ular Zaytun togʻi[122] etagidagi Baytfagiya va Baytaniya qishloqlariga yetib kelayotganlarida, Iso shogirdlaridan ikkitasiga dedi:

²— Anavi qishloqqa[123] boringlar. U yerga kirishingiz bilanoq, bogʻliq turgan va hech qachon minilmagan xoʻtikni koʻrasizlar. Oʻsha xoʻtikni yechib, bu yerga olib kelinglar.

³Agar kimdir sizlardan: “Nima qilyapsizlar?” deb soʻrab qolsa, “Bu xoʻtik Rabbimiz Masihga kerak, xoʻtikni U darhol bu yerga qaytarib yuboradi”, deb javob beringlar.

⁴Ular borib, koʻchada darvoza yonida bogʻlab qoʻyilgan xoʻtikni koʻrib, yechib olishdi.

⁵U yerda turgan bir necha kishi ularga: — Nima qilyapsizlar? Nega xoʻtikni yechyapsizlar? — deb soʻrashdi.

⁶Shogirdlar Iso buyurganidek javob berishdi, odamlar ularni qoʻyib yuborishdi.

⁷Shogirdlar xoʻtikni Isoning oldiga olib kelishdi. Xoʻtik ustiga toʻnlarini tashlashdi, Iso xoʻtikka mindi.

⁸Koʻpchilik toʻnlarini yoʻlga poyandoz qilib yoydi. Boshqalar esa dashtdagi yashil novdalarni kesib, yoʻlga toʻshadilar.

⁹Oldinda va orqada yurayotganlar shunday deb hayqirishardi: “Tasanno! Egamiz nomidan kelayotgan Inson baraka topsin![124]

¹⁰Bobomiz Dovudning yaqinlashgan shohligi muborak boʻlsin! Falak toqida Unga tasanno oʻqilsin!”

¹¹Iso Quddusga kirib, Ma’badga bordi, hamma narsani koʻzdan kechirdi. Kun kech boʻlib qolganidan, Iso oʻn ikki shogirdi bilan Baytaniya qishlogʻiga qaytib ketdi.

¹²Ertasi kuni ular Baytaniyadan chiqqanlarida, Isoning qorni och edi.

¹³U uzoqdan barglar bilan qoplangan bir anjir daraxtini koʻrib qoldi, daraxtdan biron anjir topa olarmikanman, deb bordi. Daraxtning yoniga kelib, bargdan boshqa hech narsa topolmadi, chunki hali anjir terish vaqti emas edi.

¹⁴Iso daraxtga qarab: — Bundan keyin to abad sening mevangni hech kim yemasin! — dedi. Shogirdlari ham bu gapni eshitishdi.

¹⁵Soʻng ular Quddusga kelishdi. Iso Ma’badga kirib, ichkarida oldi — sotdi qilayotganlarni quvib chiqara boshladi. Sarroflarning[125] xontaxtalarini, kaptar sotuvchilarning kursilarini agʻdarib yubordi.

¹⁶Sotiladigan molni Ma’bad ichidan olib oʻtishga[126] hech kimga ijozat bermadi.

¹⁷Iso xalqqa ta’lim berayotib dedi: — Tavrotda yozilgan — ku: “Mening uyim barcha xalqlarning ibodat uyi deb ataladi.”[127] Sizlar esa Xudoning uyini qaroqchilar uyasiga[128] aylantirib yuboribsizlar!

¹⁸Bosh ruhoniylar va Tavrot tafsirchilari buni eshitib, Isoni halok qilish payiga tushdilar. Butun xalq Isoning ta’limotiga mahliyo boʻlgani uchun bosh ruhoniylar bilan tafsirchilar Undan qoʻrqib qoldilar.

¹⁹Kech kirgach, Iso shogirdlari bilan shahardan tashqariga chiqib ketdi.

²⁰Erta bilan ular yana anjir daraxti yonidan oʻtib qarashsa, daraxt ildizigacha qurib qolgan ekan.

²¹Butrus boʻlgan hodisani eslab, Isoga dedi: — Ustoz! Qarang, Siz la’natlagan anjir daraxti qurib qolibdi.

²²Iso bunga javoban dedi:

²³— Xudoga ishonchingiz boʻlsin. Sizlarga chinini aytayin: agar kimki bu toqqa: “Qoʻporilib dengizga otil”, desa — yu, oʻz qalbida shubhalanmay, aytgani bajo kelishiga qattiq ishonsa, aytgani boʻladi.

²⁴Binobarin, sizlarga aytaman: siz ibodatda nimaiki soʻrasangiz, oldim, deb ishoninglar va sizga beriladi.

²⁵Ibodat qilib turganingizda birovda ginangiz boʻlsa, uni kechirib yuboring, toki osmondagi Otangiz ham sizlarning gunohlaringizni kechirsin[129].

²⁷Ular yana Quddusga keldilar. Iso Ma’badda aylanib yurgan edi, bosh ruhoniylar, Tavrot tafsirchilari va yoʻlboshchilar Uning oldiga kelib

²⁸soʻradilar: — Siz bu ishlarni qanday hokimiyat bilan qilyapsiz? Bularni qilish uchun Sizga kim hokimiyat bergan?

²⁹Iso ularga shunday javob berdi: — Men sizlarga bir savol beray. Menga javob bersangizlar, Men ham bu ishlarni qanday hokimiyat bilan qilayotganimni sizlarga aytaman.

³⁰Yahyo xalqni suvga choʻmdirish huquqini Xudodan olganmidi yoki insondanmi? Javob beringlar Menga.

³¹Ular oʻzlaricha mulohaza yurita boshladilar: — Agar: “Xudodan”, — desak, U: “Nega Yahyoga ishonmadingizlar?” — deydi.

³²Agar: “Insondan”, — desak — chi? Vaholanki, ular olomondan qoʻrqardilar, chunki hamma Yahyoni haqiqiy paygʻambar deb hisoblardi.

³³Xullas, ular Isoga: — Bilmaymiz, — deb javob berdilar. Iso ularga dedi: — Unday boʻlsa, Men ham bu ishlarni qaysi hokimiyat bilan qilayotganimni sizlarga aytmayman.