Read Uzbek Muqaddas Kitob Mark 12 Bible Online

Mark 12 - Uzbek Muqaddas Kitob bible

Mark 12

¹Iso xalqqa masallar orqali soʻzlay boshladi: “Bir odam uzumzor barpo qilibdi. Atrof — tevaragini devor bilan oʻrab, uzum siqish chuqurini[130] qazibdi, kuzatuv minorasini quribdi. Keyin uzumzorni bogʻbonlarga ijaraga berib, oʻzi safarga ketibdi.

²Yigʻim — terim mavsumida, uzumzor hosilidan tegishli ulushini olish uchun oʻsha odam xizmatkorini bogʻbonlar oldiga yuboribdi.

³Bogʻbonlar esa uni tutib olishibdi, kaltaklab, qup — quruq qaytarib yuborishibdi.

⁴Uzumzor egasi yana boshqa bir xizmatkorini ularning oldiga yuboribdi. Ular bunisini ham boshiga urib, haqorat qilibdilar[131].

⁵Yana boshqasini yoʻllabdi, unisini esa oʻldirishibdi. U yana xizmatkorlarini yuboraveribdi, ammo bogʻbonlar ularning ba’zilarini urib, ba’zilarini oʻldirishibdi.

⁶Uzumzor egasining endi birgina odami qolibdi, u ham boʻlsa, sevikli oʻgʻli ekan. U: «Oʻgʻlimni hurmat etarlar» deb, bogʻbonlar oldiga uni yuboribdi.

⁷Lekin ular bir — biriga: — Bu merosxoʻr — ku! Uni oʻldiraylik, shunda merosi bizga qoladi, — deyishibdi.

⁸Oʻgʻlini ushlab, oʻldirib, jasadini uzumzordan chiqarib tashlashibdi.

⁹Xoʻsh, sizningcha, endi uzumzor egasi nima qilar ekan? U kelib bogʻbonlarni oʻldiradi, uzumzorni esa boshqalarga ijaraga beradi.

¹⁰Nahotki sizlar Muqaddas bitiklardagi ushbu soʻzlarni hech oʻqimagan boʻlsangiz: «Binokorlar rad etgan tosh Binoning tamal toshi[132] boʻldi.

¹¹Bu Egamizning qilgan ishidir, Koʻz oldimizdagi ajoyibotdir.»”[133]

¹²Iso aytgan bu masal yahudiy yoʻlboshchilarga qarshi qaratilgan edi. Ular buni anglab yetdilar — u, Isoni qoʻlga olmoqchi boʻldilar. Ammo xalqdan qoʻrqqanlari uchun Unga qoʻl tekkizmay ketib qoldilar.

¹³Isoni tilidan ilintirish uchun Uning oldiga farziylardan va Hirod tarafdorlaridan[134] ba’zilarini yubordilar.

¹⁴Ular kelib dedilar: — Ustoz, odil ekaningizni bilamiz. Siz biror kishiga xushomadgoʻylik qilmaysiz. Odamlarga yuz — xotir qilmasdan, Xudoning yoʻlini toʻgʻri oʻrgatasiz. Ayting — chi, Qaysarga[135] soliq toʻlashimiz[136] toʻgʻrimi yoki yoʻqmi? Biz soliq toʻlaylikmi yoki toʻlamaylikmi?

¹⁵Iso ularning ikkiyuzlamachiligini bilar edi. — Nima, Meni sinab koʻrmoqchimisizlar? Menga bir dinor[137] olib kelinglar, uni bir koʻrayin, — dedi.

¹⁶Ular olib kelgach, Iso soʻradi: — Bu tangadagi surat va yozuv kimniki? — Qaysarniki, — dedi ular.

¹⁷Iso ularga: — Qaysarning haqini Qaysarga, Xudoning haqini Xudoga beringlar, — dedi. Buni eshitganlar hayratda qoldilar.

¹⁸Sadduqiylar[138] oʻliklarning tirilishini inkor etardilar. Ularning ba’zilari Isoning oldiga kelib, xalq oldida Unga shunday savol berdilar:

¹⁹— Ustoz! Muso bizga shunday yozib qoldirgan[139]: agar birovning akasi farzand koʻrmay oʻtib ketsa, ukasi akasining xotiniga uylanib, akasi uchun farzandni dunyoga keltirsin.

²⁰Xoʻsh, yetti aka — uka boʻlgan ekan. Birinchisi uylanibdi, soʻng nasl qoldirmay oʻlib ketibdi.

²¹Ikkinchisi ham oʻsha xotinni olib, farzand koʻrmay olamdan oʻtibdi. Uchinchisi ham shu koʻyga tushibdi.

²²Shuningdek, aka — ukalarning yettovi ham farzand koʻrmay olamdan oʻtibdi. Oxirida xotin ham qazo qilibdi.

²³Ayting — chi, Xudo odamlarni tiriltirganda xotin qaysi birining xotini hisoblanadi? Yettovi ham unga uylangan edilar — ku!

²⁴Iso ularga shunday javob berdi: — Sizlar Muqaddas bitiklarni[140] ham, Xudoning qudratini ham bilmaysizlar, ana shu sababdan adashyapsizlar.

²⁵Oʻliklar tirilganda uylanmaydilar, erga ham tegmaydilar, balki bamisoli samodagi farishtalarday boʻladilar.

²⁶Oʻliklarning tirilishi haqidagi masalaga kelsak: nahotki sizlar hech qachon Musoning kitobini oʻqimagan boʻlsangizlar?! Yonayotgan buta toʻgʻrisidagi voqeada[141] Xudo Musoga: “Men Ibrohim, Is’hoq va Yoqubning Xudosiman”, — degan — ku!

²⁷Axir, Xudo oʻliklarning emas, tiriklarning Xudosidir. Sizlar nihoyatda adashyapsizlar.

²⁸Tavrot tafsirchilaridan biri ularning munozara qilayotganini eshitib, Isoning ularga yaxshi javob berib turganini koʻrdi. U Isoning oldiga kelib: — Amrlarning eng muhimi qaysi biri? — deb soʻradi.

²⁹Iso unga javob berib dedi: — Eng muhim amr shudir: “Ey Isroil, quloq sol! Egamiz Xudo tanho Egadir[142].

³⁰Egangiz Xudoni butun qalbingiz bilan, jonu dilingiz bilan, butun ongingiz bilan, kuchingiz boricha seving.”[143]

³¹Eng muhim amrlardan ikkinchisi: “Oʻzgani oʻzingizni sevganday seving.”[144] Bulardan buyukroq amr yoʻq.

³²— Yaxshi gapirdingiz, Ustoz, — dedi Isoga tafsirchi. — Xudo tanhodir, Undan boshqa Xudo yoʻq, deb toʻgʻri aytdingiz.

³³Uni butun qalbimiz, butun idrokimiz bilan, kuchimiz boricha[145] sevishimiz kerak. Oʻzgani ham oʻzimizni sevganday sevishimiz kerak. Kuydiriladigan va boshqa qurbonliklar keltirishdan bu a’loroqdir.

³⁴Iso uning oqilona javob berganini koʻrib: — Siz Xudoning Shohligidan uzoqda emassiz, — dedi. Shundan keyin hech kim Isoga savol berishga jur’at etmadi.

³⁵Iso Ma’badda ta’lim berayotib, shunday savol berdi: — Qanday qilib Tavrot tafsirchilari Masihni Dovudning Oʻgʻli[146] deydilar?

³⁶Dovudning oʻzi Muqaddas Ruh ilhomi bilan deganki: “Egamiz aytmoqda Rabbimga: Dushmanlaringni oyoqlaring ostiga yiqitmagunimcha, Sen Mening oʻng tomonimda[147] oʻtirgin.”[148]

³⁷Demak, Dovudning oʻzi Masihni Rabbim deb atagan boʻlsa, qanday qilib Masih Dovudning Oʻgʻli boʻladi?! Bir talay olomon Isoni ishtiyoq bilan tinglar edi.

³⁸Iso xalqqa nasihat qilib, yana shunday dedi: — Tavrot tafsirchilaridan ehtiyot boʻlinglar! Ular uzun kiyimlar kiyishni yaxshi koʻradilar, bozorlarda yurganda ularga salom berishlarini,

³⁹sinagogalarda yaxshi joylarda oʻtirishni, ziyofatlarda toʻrda oʻtirishni yoqtiradilar.

⁴⁰Ammo beva ayollarning uy — joylarini tortib oladilar, xoʻja koʻrsinga uzoq duo oʻqiydilar. Bunday odamlar nihoyatda qattiq jazoga mubtalo boʻladilar.

⁴¹Iso Ma’bad xazinasi qarshisida oʻtirib, ehson qutisiga pul solayotgan odamlarni kuzatib turdi. Koʻp boylar anchagina pul tashladilar.

⁴²Bir kambagʻal beva ayol ham kelib, qiymati bir tiyinga toʻgʻri keladigan ikki chaqa[149] tashladi.

⁴³Shunda Iso shogirdlarini yoniga chaqirib dedi: — Sizlarga chinini aytayin, bu kambagʻal beva ayol xazinaga pul tashlaganlarning hammasidan ham koʻproq tashladi.

⁴⁴Chunki boylarning hammasi oʻzlarining ortiqcha pullaridan ehson qildilar. Bu ayol esa kambagʻalligiga qaramasdan, oʻzining bor — yoʻgʻini, roʻzgʻoriga ishlatiladigan hamma pulini tashladi.