Read Uzbek Muqaddas Kitob Mark 15 Bible Online

Mark 15 - Uzbek Muqaddas Kitob bible

Mark 15

¹Tong otar — otmas, bosh ruhoniylar, yoʻlboshchilar, Tavrot tafsirchilari va Oliy kengashning qolgan a’zolari bir qarorga kelishdi. Ular Isoni bogʻlatib, hokim Pilatga[184] olib borib topshirishdi.

²Pilat Isodan: — Sen yahudiylarning Shohimisan? — deb soʻradi. — Siz shunaqa deysiz, — deb javob berdi Iso.

³Bosh ruhoniylar Uni koʻp masalada ayblayotgan edilar.

⁴Pilat yana Unga: — Sen hech narsaga javob bermaysanmi? Koʻryapsan — ku, ular Seni koʻp jinoyatlarda ayblashyapti! — dedi.

⁵Lekin Iso boshqa hech javob bermadi. Pilat bunga qoyil qoldi.

⁶Har Fisih bayramida[185] Pilat xalqning iltimosiga binoan bir mahbusni ozod qilar edi.

⁷Isyon[186] vaqtida qotillik qilgan Barabbas ismli bir kishi oʻz sheriklari bilan oʻshanda qamoqda edi.

⁸Xalq yana kelib, Pilatdan odatdagiday bir mahbusni ozod qilishni soʻray boshladi.

⁹Bosh ruhoniylar Isoni hasad tufayli qoʻlga tushirishganini bilgan Pilat olomondan: — Sizlar uchun yahudiylarning Shohini ozod qilishimni istaysizlarmi? — deb soʻradi.

¹⁰

¹¹Ammo bosh ruhoniylar: “Uning oʻrniga Barabbasni ozod qilishni Pilatdan soʻranglar”, deb olomonni qoʻzgʻadilar.

¹²Pilat ularga yana dedi: — Aytinglar xohishingizni! Sizlar “Yahudiylar Shohi” deb ataydigan Kishini nima qilay?

¹³— Xochga mixlansin! — deb shovqin soldi olomon.

¹⁴Pilat ulardan: — Nimaga? U nima yomonlik qildi? — deb soʻradi. Lekin olomon: — Xochga mixlansin! — deb battar baqirardi.

¹⁵Shundan keyin Pilat xalqni mamnun qilay deb, Barabbasni ozod etdi. Isoni esa qamchilatib, xochga mixlashni buyurdi.

¹⁶Rim askarlari Isoni hukumat saroyining hovlisiga olib borib, butun boʻlinmani Uning oldiga toʻplashdi.

¹⁷Unga safsar toʻn kiydirishdi va tikanlardan toj oʻrib boshiga qoʻyishdi.

¹⁸— Yashavor, ey yahudiylarning Shohi! — deb Uni qutlay boshlashdi.

¹⁹Qamish bilan Uning boshiga qayta — qayta urib, tupurishdi. Uning oldida tiz choʻkib, ta’zim qilishdi.

²⁰Uni shunday masxara qilganlaridan keyin, ustidan safsar toʻnni yechib olib, Oʻzining kiyimlarini kiydirishdi. Soʻng Uni xochga mixlash uchun olib ketishdi.

²¹Askarlar yoʻlda Shimoʻn degan odamni uchratib qoldilar. U daladan qaytib kelayotgan edi. Ular Shimoʻnni Isoning xochini[187] koʻtarib borishga majbur qildilar. Shimoʻn Kirineyalik[188] boʻlib, Iskandar va Rufusning otasi edi.

²²Askarlar Isoni Goʻlgota degan joyga olib kelishdi. Goʻlgota “bosh suyagi” ma’nosini beradi.

²³Isoga mirra aralashtirilgan sharob[189] berishdi, lekin U ichmadi.

²⁴Bundan soʻng Isoni xochga mixlab qoʻyishdi. Uning kiyimlarini esa oʻzaro boʻlishib, kim nima oladi, deb qur’a tashlashdi[190].

²⁵Uni xochga mixlaganlarida ertalab soat toʻqqiz[191] edi.

²⁶Bosh tomonida: “Yahudiylarning Shohi” deb yozilgan aybnoma bor edi.

²⁷Iso bilan birga ikkita qaroqchini ham mixlagan edilar. Ularning biri Isoning oʻng tomonida, ikkinchisi esa chap tomonida edi[192].

²⁸

²⁹Oʻtib ketayotganlar boshlarini chayqab, Isoni haqoratlashardi[193]: — Ey Ma’badni buzib, uch kun ichida tiklaydigan!

³⁰Oʻzingni Oʻzing qutqarib, xochdan tushib koʻr — chi!

³¹Bosh ruhoniylar va Tavrot tafsirchilari ham ularga qoʻshilib, Isoni masxaralay ketishdi. Ular bir — biriga: — U boshqalarni qutqarardi, Oʻzini esa qutqara olmaydi!

³²Isroilning Shohi Masih endi xochdan tushsin, toki biz buni koʻrib Unga ishonaylik! — deyishardi. Iso bilan birga xochga mixlanganlar ham Uni haqoratlar edilar.

³³Tush payti butun yurtni zulmat qopladi. Soat uchga[194] qadar hamma yoq zulmatga choʻmdi.

³⁴Soat uchda Iso baland ovoz bilan: — Elohi, Elohi, lamo shavaqtani?[195] — deb faryod qildi. Bu soʻzning tarjimasi: “Ey Xudoyim! Ey Xudoyim! Nega Meni tark etding?!”[196] demakdir.

³⁵U yerda turgan ba’zilar buni eshitib: — Qarang, U Ilyosni[197] chaqiryapti, — deyishdi.

³⁶Shunda bir odam yugurib borib, shimgichni arzon sharobga[198] botirib, qamishning uchiga ilib qoʻydi — da, Isoga ichish uchun uzatdi. Soʻng dedi: — Qani, koʻraylik — chi, Ilyos kelib[199], Uni xochdan tushirarmikan?

³⁷Ammo Iso qattiq faryod qildi — yu, jon berdi.

³⁸Shu zahoti Ma’baddagi parda[200] yuqoridan pastgacha yirtilib, ikkiga boʻlinib ketdi.

³⁹Isoning qarshisida turgan Rim yuzboshisi Uning shu tarzda jon berganini koʻrib: — Haqiqatan ham bu Odam Xudoning Oʻgʻli[201] ekan! — dedi.

⁴⁰U yerda uzoqdan qarab turgan ayollar bor edi. Ular orasida Magdalalik[202] Maryam, kichik Yoqub bilan Yusufning onasi Maryam hamda Salomiya bor edilar.

⁴¹Iso Jalilada ekanligida, ular Unga xizmat qilib, ergashib kelgan edilar. U yerda Iso bilan birga Quddusga kelgan boshqa koʻp ayollar ham bor edi.

⁴²Juma kuni kech kirishiga oz qolgan[203], Shabbat kuniga tayyorgarlik qilish vaqti tugayotgan edi.

⁴³Shunda Oliy kengashning obroʻli a’zosi, Xudoning Shohligini intizorlik bilan kutib yurgan Arimateyalik[204] Yusuf jur’at etib, Pilatning huzuriga bordi va Isoning jasadini soʻradi.

⁴⁴Pilat Isoning darrov oʻlganiga hayron boʻldi. Yuzboshini chaqirib: — Uning joni uzilib boʻldimi? — deb soʻradi.

⁴⁵Pilat Isoning oʻlganini yuzboshidan bilib olgach, Uning jasadini Yusufga berdi.

⁴⁶Yusuf zigʻir matosi sotib oldi. Jasadni xochdan tushirib olib, zigʻir matosi bilan kafanladi. Jasadni qoyada oʻyilgan qabrga qoʻydi. Keyin qabrning ogʻziga bir toshni yumalatib keltirib, qoʻyib ketdi.

⁴⁷Isoning jasadi qayerga dafn qilinganini Magdalalik Maryam bilan Yusufning[205] onasi Maryam koʻrdi.