Read Uzbek Muqaddas Kitob Mark 16 Bible Online

Mark 16 - Uzbek Muqaddas Kitob bible

Mark 16

¹Shabbat kuni tugagach[206], Magdalalik[207] Maryam, Yoqubning onasi Maryam va Salomiya Isoning jasadiga surtish uchun xushboʻy moylar sotib oldilar[208].

²Yakshanba kuni juda barvaqt turib, tong yorishganda qabrga bordilar.

³Ular bir — biriga: — Qabr ogʻzidagi toshni biz uchun kim agʻdarib berar ekan — a? — deb aytishardi.

⁴Qabrga yetib kelganlarida qarashsa, tosh allaqachon agʻdarilgan ekan. Tosh juda katta edi.

⁵Ular qabr ichiga kirib, oʻng tomonda oʻtirgan oq libosli bir yigitni koʻrdilar — u, choʻchib ketdilar.

⁶Yigit ularga: — Qoʻrqmanglar! — dedi. — Sizlar xochga mixlangan Nosiralik Isoni izlayapsizlar. Iso tirildi! U bu yerda yoʻq. Mana Uning qoʻyilgan joyi!

⁷Endi borib, Uning shogirdlari va Butrusga: “Iso sizlarni Jalilada kutyapti. Oʻzi sizlarga aytganidek[209], Uni oʻsha yerda koʻrasizlar”, deb aytinglar.

⁸Dahshatga tushib, qaltiragan ayollar qabrdan chiqib, qochdilar. Ular qoʻrqqanlaridan hech kimga biron narsa aytmadilar[210].

⁹Yakshanba kuni erta saharda tirilgan Iso birinchi boʻlib Magdalalik Maryamga zohir boʻldi. Bu ayoldan U yettita jinni quvib chiqargan edi.

¹⁰Maryam borib, Isoning aza tutib yigʻlayotgan shogirdlariga xabar yetkazdi.

¹¹Biroq ular Isoning tirik ekanligini va Maryam Uni koʻrganligini eshitsalar ham, ishonmadilar.

¹²Shundan keyin Iso yoʻlda bir qishloq tomon ketayotgan ikkita shogirdiga boshqacharoq qiyofada koʻrindi.

¹³Ular esa qaytib kelib, boshqalarga xabar yetkazishdi, lekin ularga ham ishonmadilar.

¹⁴Nihoyat, Iso Oʻzining yeb — ichib oʻtirgan oʻn bir shogirdiga zohir boʻldi. Iso shogirdlarini imonlari zaifligi va qaysarligi uchun koyidi, chunki ular Isoni tirilgan holda koʻrgan odamlarga ishonmagan edilar.

¹⁵Iso shogirdlariga dedi: — Butun jahon boʻylab yuringlar va hamma tirik jonga Xushxabarni e’lon qilinglar.

¹⁶Kimki Xushxabarga ishonib, suvga choʻmdirilsa, najot topadi. Ishonmagan esa mahkum boʻladi.

¹⁷Quyidagi alomatlar imonlilarga hamroh boʻladi: Mening nomim bilan jinlarni quvib chiqaradilar. Yangi tillarda soʻzlaydilar.

¹⁸Qoʻllariga ilon olsalar ham, zahar ichsalar ham, ularga zarar yetmaydi. Xastalarga qoʻllarini qoʻyganda, ular sogʻayib ketadi.

¹⁹Rabbimiz Iso shogirdlariga bularni aytib boʻlgach, osmonga koʻtarildi. U Xudoning oʻng tomoniga oʻtirdi[211].

²⁰Shogirdlar esa ketib, hamma yoqda Xushxabarni va’z qilib yurdilar. Rabbimiz shogirdlariga kuch ato qilib, alomatlar orqali ularning soʻzlarini tasdiqlar edi[212].