Read Uzbek Muqaddas Kitob Mark 3 Bible Online

Mark 3 - Uzbek Muqaddas Kitob bible

Mark 3

¹Boshqa bir kuni Iso sinagogaga kirdi. U yerda qoʻli shol bir odam bor edi.

²Isoni ayblamoqchi boʻlgan ba’zi odamlar[32]: “Iso Shabbat kuni ham bu odamga shifo berarmikan”, deb Uni kuzatib turardilar.

³Qoʻli shol odamga Iso: — Oldinga chiq! — dedi.

⁴Soʻng xaloyiqdan soʻradi: — Qonunga muvofiq Shabbat kuni yaxshilik qilish kerakmi yoki yomonlikmi? Jonni xalos qilish kerakmi yoki halok qilishmi? Ular esa indamay turaverdilar.

⁵Iso odamlarning bunday bagʻri toshligidan ranjib, atrofga gʻazab bilan qaradi. Soʻngra oʻsha odamga: — Qoʻlingni uzat! — dedi. U odam qoʻlini uzatishi bilanoq, qoʻli soppa — sogʻ boʻlib qoldi.

⁶Farziylar esa darrov tashqariga chiqib: “Isoni qanday qilib oʻldirsak ekan?” deb Hirod tarafdorlari[33] bilan til biriktirishdi.

⁷Iso shogirdlari bilan Jalila koʻli tomonga ketdi. Unga bir talay olomon ergashdi. Uning qilgan ishlari toʻgʻrisida eshitgan bu odamlar Jaliladan, Yahudiyadan, Quddusdan, Idumeya hududidan, Iordan daryosining sharqidagi yerlardan, shuningdek, Tir va Sidon atrofidagi hududlardan kelgan edilar.

⁹Odam koʻpligidan oyoq ostida qolib ketmay deb, Iso shogirdlariga qayiq tayyorlab qoʻyishni buyurdi.

¹⁰Iso koʻpchilikka shifo bergani uchun, hamma xastalar Isoga qoʻllarini tekkizmoqchi boʻlib, U tomon yopirilishardi.

¹¹Yovuz ruhga chalingan odamlar esa Isoni koʻrgan zahoti, Uning oyoqlariga yiqilib: “Sen Xudoning Oʻgʻlisan[34]”, — deb baqirib yuborishardi.

¹²Ammo Iso: “Mening kimligimni aytmanglar!” deb ularga qat’iy buyurardi.

¹³Shundan soʻng Iso toqqa chiqib, Oʻzi xohlagan odamlarni yoniga chaqirdi. Ular kelgach,

¹⁴Iso oʻn ikki odamni tanlab olib, ularga havoriylar deb nom berdi[35]. Soʻngra dedi: — Men bilan birga boʻlishlaringiz uchun sizlarni tanlab oldim. Men sizlarni va’z aytishga yuboraman.

¹⁵Sizlarga jinlarni haydash[36] hokimiyatini beraman.

¹⁶Iso tanlab olgan oʻn ikki havoriy quyidagilardir: Shimoʻn (Iso unga Butrus deb ism berdi),

¹⁷Zabadiyo oʻgʻillari Yoqub va Yuhanno (Iso ularga Baniragash, ya’ni “momaqaldiroq oʻgʻillari” deb nom berdi),

¹⁸yana Endrus, Filip, Bartolomey, Matto, Toʻma, Xalfey oʻgʻli Yoqub, Taddeyus[37], vatanparvar[38] Shimoʻn

¹⁹va Isoga xiyonat qilgan Yahudo Ishqariyot.

²⁰Shundan soʻng Iso uyga[39] ketdi. Ammo yana koʻp xaloyiq toʻplangani uchun Iso va shogirdlarining hatto non yeyishga ham vaqtlari boʻlmadi.

²¹Isoning qilgan ishlari toʻgʻrisida oila a’zolari[40] eshitib: “Iso aqldan ozib qolibdi”, deb Uni olib ketgani keldilar.

²²Quddusdan kelgan Tavrot tafsirchilari esa: — Uning ichiga Baalzabul kirib olgan. U Baalzabulning — ins — jinslar hukmdorining[41] kuchi bilan jinlarni quvib chiqaryapti, — deyishdi.

²³Shunda Iso ularni yoniga chaqirib, masal bilan soʻzlay boshladi: — Qanday qilib shayton shaytonni quvib chiqara oladi?!

²⁴Agar bir shohlik nizo tufayli oʻz ichidan boʻlinib ketsa, bunday shohlik xarob boʻladi.

²⁵Agar bir xonadon nizo tufayli oʻz ichidan boʻlinib ketsa, u xonadon barbod boʻladi.

²⁶Bordi — yu, shaytonning shohligi oʻz — oʻziga qarshi chiqib, boʻlinib ketsa, u barbod boʻlib, kuni bitadi.

²⁷Hech kim kuchli odamning uyiga bostirib kirib, uning mol — mulkini talon — taroj qilib olib keta olmaydi. Uyning egasini oʻgʻri bogʻlab qoʻysagina, uyini talon — taroj qila oladi.

²⁸Sizlarga chinini aytayin: odamlarning qilgan gunohlari, aytgan har qanday kufrliklari kechiriladi.

²⁹Ammo kim Muqaddas Ruhga kufrlik qilsa[42], hech qachon kechirilmaydi, chunki bu abadiy gunohdir.

³⁰Iso bu soʻzni, “Uni yovuz ruh chalgan” deganlari sababli aytdi.

³¹Isoning onasi bilan ukalari kelib qolishdi. Ular Isoni chaqirib kelish uchun odam yuborib, oʻzlari uyning tashqarisida kutib turishdi.

³²Isoning atrofida olomon oʻtirgan edi. Ular Isoga: — Ana, onangiz va ukalaringiz[43] tashqarida Sizni soʻrayaptilar, — deyishdi.

³³Iso ularga javoban: — Mening onam va ukalarim kim? — dedi.

³⁴Soʻngra atrofida oʻtirganlarga nazar solib dedi: — Mana, Mening onam va ukalarim!

³⁵Kimda — kim Xudoning irodasini bajo qilsa, u Mening ukam, singlim, onam boʻladi.