Read Uzbek Muqaddas Kitob Luqo 14 Bible Online

Luqo 14 - Uzbek Muqaddas Kitob bible

Luqo 14

¹Bir Shabbat kuni Iso farziylar rahnamolaridan birining uyiga mehmonga bordi. Uni diqqat bilan kuzatib oʻtirishardi.

²Isoning oldiga istisqo dardidan qoʻl — oyoqlari shishib ketgan bir odam kelib qoldi.

³Iso Tavrot tafsirchilaridan va farziylardan soʻradi: — Qonunimizga koʻra, Shabbat kuni odamga shifo berish mumkinmi yoki yoʻqmi?

⁴Ular esa indamadilar. Iso xasta odamga qoʻl tekkizib, shifo berdi va uni joʻnatib yubordi.

⁵Soʻng ularga dedi: — Birortangizning farzandingiz[184] yoki molingiz quduqqa tushib ketsa, Shabbat kuni boʻlishiga qaramay, uni darhol chiqarib olmaysizlarmi?!

⁶Ular esa bu gapga biron javob topa olmadilar.

⁷Mehmonlar toʻrdan joy tanlashga intilayotgan edilar. Iso buni koʻrib, shunday masal aytdi:

⁸“Sizni toʻy ziyofatiga taklif qilishganda, toʻrga chiqib olmang. Mehmonga chaqirilganlar orasida sizdan ham hurmatliroq boshqasi boʻlishi mumkin.

⁹Ikkovingizni taklif qilgan mezbon kelib, sizga: — Joyingizni bu odamga boʻshatib bering, — deb aytishi mumkin. Shunda siz xijolat tortib, poygakda oʻtirishga majbur boʻlasiz.

¹⁰Shuning uchun taklif etilganingizda, poygakda oʻtiring, toki mezbonning oʻzi kelib sizga: — Doʻstim, iltimos toʻrga chiqing, — deb aytsin. Shunda boshqa mehmonlar koʻzida sizning hurmatingiz oshadi.

¹¹Zotan, oʻzini oʻzi yuksaltirgan kamsitiladi, oʻzini past tutgan esa yuksaltiriladi.”

¹²Iso Oʻzini taklif qilgan xonadon sohibiga aytdi: — Tushki yo kechki ziyofat berganingizda, doʻstlaringizni yoki aka — ukalaringizni, qarindosh — urugʻlaringizni yo boʻlmasa, boy qoʻshnilaringizni taklif qilmang. Aks holda, ular ham sizni mehmonga chaqirib, qilgan yaxshiligingizni qaytaradilar.

¹³Aksincha, ziyofat berganingizda, kambagʻal — qashshoqlarni, choʻloq, shollarni, koʻrlarni taklif qiling.

¹⁴Shunda baxtli boʻlasiz. Chunki ular qilgan yaxshiligingizni qaytara olmasalar — da, solihlar tirilgan zamonda buning savobini koʻrasiz.

¹⁵Dasturxon atrofida oʻtirgan mehmonlardan biri Isoning bu soʻzlarini eshitib, Unga dedi: — Xudoning Shohligida ziyofat yeydigan kishi baxtlidir!

¹⁶Iso oʻsha odamga shunday dedi: “Bir odam katta ziyofat tayyorlab, koʻpchilikni taklif etibdi.

¹⁷Ziyofat vaqti boʻlganda: — Kelinglar, dasturxon tayyor boʻldi, — deb mehmonlarni chaqirgani xizmatkorini yuboribdi.

¹⁸Ammo taklif qilinganlarning hammasi birday uzr soʻray boshlabdilar. Birinchisi unga debdi: — Men yer sotib olgan edim, oʻsha yerni koʻrgani borishim kerak. Iltimos, meni kechiring.

¹⁹Boshqasi esa: — Men besh juft hoʻkiz sotib oldim, ularni sinagani ketyapman. Iltimos, meni kechiring, — debdi.

²⁰Yana boshqasi: — Men yangi uylandim, shuning uchun bora olmayman, — debdi.

²¹Xizmatkor qaytib kelib, xoʻjayiniga axborot beribdi. Shunda uy sohibi gʻazablanib, xizmatkoriga buyuribdi: — Hoziroq shahar koʻchalarini, yoʻlaklarini aylanib chiq. Qashshoq, choʻloq, koʻr va shollarni bu yerga olib kel.

²²Bir oz vaqtdan keyin xizmatkor shunday deb keldi: — Xoʻjayin, buyurganlaringizni bajardim, lekin yana boʻsh joy qoldi.

²³Shunda xoʻjayin xizmatkoriga aytibdi: — Yoʻllarga, yoʻlaklarga bor, odamlarni koʻndirib olib kel, toki uyim toʻlsin.

²⁴Sizlarga aytay: taklif qilinganlarning birortasi ham ziyofat taomlaridan aslo totib koʻrmaydi[185].”

²⁵Katta bir olomon Isoga ergashib ketayotgan edi. Iso ularga qarab dedi:

²⁶“Menga ergashgan odam Meni ota — onasidan, aka — uka va opa — singillaridan, hatto oʻz jonidan ortiq sevishi kerak[186], aks holda, u Mening shogirdim boʻlolmaydi.

²⁷Oʻz xochini koʻtarib[187], ortimdan yurmagan odam ham Mening shogirdim boʻlolmaydi.

²⁸Sizlardan birortangiz minora qurmoqchi boʻlsangiz, uni bitirish uchun mablagʻ yetarlimi, deb oldindan xarajatini hisoblab chiqmaysizmi?

²⁹Aks holda, siz poydevor yotqizasiz — u, minorani bitkaza olmaysiz. Buni koʻrganlarning hammasi ustingizdan kulib, shunday deb aytishadi:

³⁰«Bu odam qurilishni boshladi, ammo bitira olmadi.»

³¹Yoki qaysi shoh boshqa bir shohga qarshi urushga chiqishdan avval oʻtirib: «Dushman yigirma ming askari bilan menga qarshi kelyapti, men oʻn ming askarim bilan unga bas kela olamanmi?» deb oʻylamaydimi?!

³²Kuchi yetmasa, dushman hali uzoqdaligida uning oldiga elchi yuborib, sulh tuzaylik, deb iltimos qiladi.

³³Xuddi shu singari, bor mol — mulkingizdan kechmasangiz, birontangiz ham Mening shogirdim boʻla olmaysiz.

³⁴Tuz — yaxshi narsa. Lekin tuz oʻz ta’mini yoʻqotsa, uni yana qanday shoʻr qilib boʻladi?!

³⁵Bunday tuz yerga ham, goʻngga ham yaramaydi, uni tashlab yuboradilar. Kimning eshitar qulogʻi boʻlsa, eshitsin!”