Read Uzbek Muqaddas Kitob Luqo 16 Bible Online

Luqo 16 - Uzbek Muqaddas Kitob bible

Luqo 16

¹Iso shogirdlariga shunday dedi: “Bir boy odamning ish boshqaruvchisi bor ekan. Boyga, ish boshqaruvchingiz mol — mulkingizni sovurib yuribdi degan xabar yetib keldi.

²Boy odam ish boshqaruvchisini chaqirib, unga shunday debdi: — Sen haqingda ba’zi gaplarni eshitdim. Bu nimasi?! Menga boshqaruving toʻgʻrisida hisobot ber, endi ishlarimni sen boshqarmaysan.

³Shunda ish boshqaruvchi oʻziga oʻzi debdi: — Xoʻjayinim meni ishdan boʻshatyapti. Endi nima qilaman? Yer chopishga kuchim yetmaydi, sadaqa soʻrashga uyalaman.

⁴Eha, topdim! Bir ish qilaman, shunda boʻshatilganimdan keyin odamlar uylarining eshiklarini men uchun ochib berishadi.

⁵U vaqtni boy bermay, xoʻjayinning qarzdorlarini birma — bir chaqiribdi. Birinchisidan soʻrabdi: — Xoʻjayinimdan qancha qarzing bor?

⁶— Ikki yuz koʻza zaytun moyi, — deb javob beribdi u. — Tilxatingni ol, tezda oʻtirib yuz koʻza[191] deb yoz! — debdi unga ish boshqaruvchi.

⁷Keyin boshqasidan ham soʻrabdi: — Sening qancha qarzing bor? — Ming togʻora bugʻdoy, — deb javob beribdi u. Unga ham: — Tilxatingni ol, sakkiz yuz togʻora[192] deb yoz! — debdi ish boshqaruvchi.

⁸Ha, ayyor ish boshqaruvchi ishini boplab bajardi! Chindan ham bu dunyoning odamlari zamondoshlari orasida nur ahliga[193] qaraganda oʻz ishiga ancha pishiqdirlar.

⁹Men sizlarga aytaman: bu dunyoning boyligidan foydalanib doʻst orttiringlar, toki bu boylik tugagach, Xudo sizni abadiy maskaniga qabul qilsin.

¹⁰Kichik ishda sadoqatli boʻlgan odam katta ishda ham sadoqatli boʻladi. Kichik ishda sadoqatsiz boʻlgan esa katta ishda ham sadoqatsiz boʻladi.

¹¹Agar sizga bu dunyoning boyligini ishonib topshirib boʻlmasa, kim sizga haqiqiy boylikni ishonib topshiradi?!

¹²Agar sizga boshqalarning narsasini ishonib topshirib boʻlmasa, oʻzingizga atalgan narsani sizga kim beradi?!

¹³Hech qanday xizmatkor ikki xoʻjayinga xizmat qilolmaydi. U yo birini yomon koʻrib, boshqasini yaxshi koʻradi, yoki biriga bagʻishlanib, boshqasini mensimaydi. Sizlar ham Xudoga, ham boylikka birdek xizmat qila olmaysizlar.”

¹⁴Pulparast farziylar bularni eshitib, Isoni mazax qildilar.

¹⁵Iso ularga dedi: “Sizlar odamlar oldida oʻzingizni taqvodor qilib koʻrsatasizlar, lekin Xudo yuragingizni biladi. Odamzod koʻkka koʻtargan narsalar Xudoning nazarida jirkanchdir.

¹⁶Yahyo va undan oldin kelganlar Tavrot va Paygʻambarlar bitiklarini[194] e’lon qilganlar. Endi esa Xudoning Shohligi toʻgʻrisidagi Xushxabar e’lon qilinmoqda va har bir odam bu Shohlikka kirishga undalmoqda.

¹⁷Biroq Tavrotdan bir nuqtaning yoʻqolishidan koʻra, yeru osmonning yoʻqolishi osonroqdir.

¹⁸Kim oʻz xotini bilan ajrashib boshqasiga uylansa, zino qilgan boʻladi. Shuningdek, eri bilan ajrashgan xotinga uylangan kishi ham zino qilgan boʻladi.

¹⁹Bir boy odam bor ekan. U qimmatbaho liboslar kiyib yurar, har kuni dabdabali hayot kechirar ekan.

²⁰Boyning darvozasi oldida butun badaniga yara toshgan Lazar ismli bir qashshoq gadoy yotar ekan.

²¹U boy dasturxonidan toʻkilgan ushoqlar bilan qorin toʻydirishni orzu qilar ekan. Itlar kelib uning yaralarini yalab ketar ekan.

²²Bir kuni gadoy oʻlib qolibdi, farishtalar uni Ibrohimning yoniga olib ketibdilar. Keyin boy ham oʻlib, dafn qilinibdi.

²³Jahannamda azob chekayotgan boy boshini koʻtarib, uzoqda Ibrohimni va uning yonidagi Lazarni koʻribdi.

²⁴Soʻng shunday deb faryod qilibdi: — Ey Ibrohim ota! Menga rahm qilib Lazarni yuboring. U barmogʻining uchini suvga botirib, tilimga tomizsin. Bu alanga ichida azob chekyapman!

²⁵Ibrohim unga shunday deb javob beribdi: — Unutma, oʻgʻlim, sen hayotligingda hamma yaxshi narsalaringni olib boʻlding, Lazar esa faqat yomonlik koʻrdi. Endi u bu yerda tasalli topyapti, sen boʻlsang, azob chekyapsan.

²⁶Bundan tashqari, sen bilan bizning oramizda tubsiz jarlik bor. Bu yerdan siz tomonga oʻtmoqchi boʻlganlar oʻta olmaydilar va u yerdan biz tomonga ham oʻtmaydilar.

²⁷Shunda boy aytibdi: — Unday boʻlsa, ey ota, sizdan oʻtinib soʻrayman, Lazarni otamning uyiga yuboring.

²⁸Mening beshta ukam bor. Ular ham bu azobli joyga kelmasliklari uchun ularni ogohlantirib qoʻysin.

²⁹Ibrohim javob beribdi: — Ularda Musoning va paygʻambarlarning bitiklari[195] bor — ku, oʻshalarga quloq solishsin.

³⁰Boy esa: — Yoʻq, Ibrohim ota, ular quloq solmaydilar. Ammo oʻliklardan biri ularning oldiga borsa, oʻshanda tavba qiladilar, — debdi.

³¹Ibrohim shunday debdi: — Agar Muso va boshqa paygʻambarlarning soʻzlariga quloq solmagan boʻlsalar, oʻliklardan biri tirilib borsa ham ishonmaydilar.”