Read Uzbek Muqaddas Kitob Luqo 21 Bible Online

Luqo 21 - Uzbek Muqaddas Kitob bible

Luqo 21

¹Iso Ma’badning ehson qutisiga nazar solar ekan, ehson tashlab turgan boy odamlarni koʻrdi.

²Shuningdek, ikki chaqa[237] tashlagan bir kambagʻal beva ayolni ham koʻrdi.

³Shunda Iso dedi: — Sizlarga chinini aytayin, bu kambagʻal beva hammadan koʻproq ehson berdi.

⁴Chunki boylarning hammasi oʻzlarining ortiqcha pullaridan ehson qildilar. Ammo bu ayol kambagʻalligiga qaramasdan, oʻzining bor — yoʻgʻini tashladi.

⁵Shogirdlardan ba’zilari Ma’badni tomosha qilib, uning goʻzal toshlar va Xudoga nazr qilingan in’omlar bilan bezatilgani toʻgʻrisida gaplashayotgan edilar. Iso esa dedi:

⁶— Shunday kunlar keladiki, siz koʻrib turganlarning hammasi vayron boʻladi[238]. Bu yerda tosh ustida turgan bironta tosh qolmaydi.

⁷Ular Isodan soʻradilar: — Ustoz, bu hodisalar qachon yuz beradi? Tez orada yuz berishini nimadan bilsak boʻladi?

⁸Iso dedi: — Ehtiyot boʻlinglar, yoʻldan ozmanglar, chunki koʻp kishilar oʻzlarini Mening nomim bilan atab: “Men Oʻshaman”, “Vaqt yaqin”, — deb aytadi. Ularga ergashmanglar.

⁹Sizlar urush va isyonlar toʻgʻrisida xabarlarni eshitganingizda, vahimaga tushmanglar, chunki bu hodisalar birinchi boʻlib sodir boʻlishi kerak. Ammo bu hali soʻnggi nihoya emas.

¹⁰Keyin Iso ularga dedi: “Xalq xalqqa qarshi, shohlik shohlikka qarshi koʻtariladi.

¹¹Ayrim joylarda shiddatli zilzilalar, qahatchiliklar, oʻlatlar boʻladi. Osmonda vahimali hodisalar, buyuk alomatlar yuz beradi.

¹²Lekin bularning hammasidan oldin sizlarni hibsga oladilar, quvgʻin qiladilar, sinagogalarga topshirib, qamoqlarga tashlaydilar. Mening nomim tufayli sizlarni shohlar va hokimlar oldiga olib boradilar.

¹³Bular Xushxabarni aytishingiz uchun imkoniyat boʻladi.

¹⁴Oʻzimizni qanday himoya qilamiz, deb oldindan qaygʻurmaslikka qaror qilinglar.

¹⁵Men Oʻzim sizlarga soʻz, donolik ato qilamanki, raqiblaringizdan birontasi aytganlaringizni rad qila olmaydilar yoki e’tiroz bildira olmaydilar.

¹⁶Sizlarni hatto ota — onangiz, aka — ukalaringiz, qarindosh — urugʻlaringiz, doʻstlaringiz tutib berishadi. Ular ba’zilaringizni oʻldirishadi.

¹⁷Mening nomim tufayli hamma sizlardan nafratlanadi.

¹⁸Biroq boshingizdan bir tola soch ham tushmaydi.

¹⁹Qat’iyatli boʻlinglar, shunda hayotga erishasiz.

²⁰Quddusni dushman lashkarlari oʻrab olganini koʻrganingizda, bilingki, shahar yaqin orada vayron qilinadi.

²¹Shunda Yahudiyada boʻlganlar togʻlarga qochsin, shaharning ichida boʻlganlar tashqariga chiqsin, dalalarda boʻlganlar shaharga kirmasin.

²²Chunki Xudoning qasos oladigan kunlari keldi. Oʻsha kunlarda hamma bashoratlar amalga oshadi.

²³U kunlarda homilador va emizikli ayollarning holiga voy! Chunki yer yuzini katta musibat chulgʻab oladi, bu xalqning boshiga Xudoning gʻazabi yogʻiladi.

²⁴Ba’zilari qilichdan oʻtkaziladi, boshqalari barcha yurtlarga asir qilib olib ketiladi. Gʻayriyahudiylarning davru davroni tugamaguncha, ular Quddusni oyoq osti qiladilar.

²⁵Quyosh, oy va yulduzlarda alomatlar paydo boʻladi. Dengizlar va toʻlqinlar shovqinidan xalqlar sarosimaga tushib, iztirob chekadi.

²⁶Odamlar dunyoga keladigan falokatlarni koʻrib, qoʻrquvdan hushidan ketadilar. Chunki oʻshanda samoviy kuchlar larzaga keladi.

²⁷Shunda hamma odam Inson Oʻgʻlini koʻradi. Inson Oʻgʻli qudratga va buyuk ulugʻvorlikka burkanib, bulutlarda keladi[239].

²⁸Bu hodisalar yuz bera boshlaganda, turib, boshingizni baland koʻtaring. Chunki qutqariladigan vaqtingiz yaqinlashmoqda.”

²⁹Iso shogirdlariga bir masalni aytib berdi: “Anjir daraxtiga va boshqa hamma daraxtlarga qaranglar.

³⁰Daraxtlar barg yozayotganini koʻrganingizda, yoz yaqinlashib qolganini bilasiz.

³¹Shu singari, mana bu voqealar sodir boʻlganda, bilingki, Xudoning Shohligi yaqin.

³²Sizlarga chinini aytayin, bu nasl oʻtmasdanoq, bularning hammasi sodir boʻladi.

³³Yeru osmon yoʻq boʻlib ketadi, ammo Mening soʻzlarim kuchda qoladi.

³⁴Hushyor boʻlinglar! Kayfu safoga, bu hayotning tashvishlariga berilib ketmanglar. Tagʻin oʻsha kun kelib qolganda sizlar toʻsatdan toʻrga tushgan odamlarga oʻxshab qolmanglar!

³⁵Chunki u kun butun yer yuzida yashovchilarning boshiga tushadi.

³⁶Doim hushyor boʻlinglar. Yuz beradigan bu hamma musibatlardan qutula olishingiz va Inson Oʻgʻli oldida munosib tura olishingiz uchun doimo ibodatda boʻlinglar.”

³⁷Har kuni Iso Ma’badda ta’lim berardi, kechalari esa shahardan chiqib, tunni Zaytun togʻida[240] oʻtkazar edi.

³⁸Xalq sahardan Isoni tinglagani Ma’badga kelardi.