Read Uzbek Muqaddas Kitob Qonunlar 10 Bible Online

Qonunlar 10 - Uzbek Muqaddas Kitob bible

Qonunlar 10

¹Shundan keyin Egamiz menga dedi: “Ikkita tosh lavhani kesib ol. Ular oldingilariga oʻxshagan boʻlsin. Keyin toqqa Mening oldimga chiq. Yana yogʻochdan bir Sandiq yasa.

²Men oʻsha tosh lavhalarga sen sindirgan lavhalardagi amrlarni yozaman. Sen lavhalarni Sandiqqa solib qoʻyasan.”

³Shunday qilib, men akas yogʻochidan[73] Sandiq yasadim, oldingisiga oʻxshagan ikkita tosh lavhani kesib oldim. Keyin ikkala toshni koʻtarib, toqqa chiqdim.

⁴Egamiz tosh lavhalarga oldingiday oʻnta amrni yozdi. Sizlar togʻda yigʻilganingizda oʻsha amrlar Egamiz olov ichidan sizga aytgan soʻzlarning oʻzginasi edi. Egamiz oʻsha lavhalarni menga berdi.

⁵Men togʻdan qaytib tushdim. Egamizning amriga koʻra, lavhalarni Sandiqqa soldim. Lavhalar hali ham oʻsha Sandiqda turibdi.

⁶(Isroil xalqi Yaqon urugʻiga qarashli quduqlardan[74] Mosaraxga yoʻl oldi. Horun oʻsha yerda vafot etib[75], dafn qilindi. Oʻrniga oʻgʻli Elazar ruhoniy boʻldi.

⁷Isroil xalqi u yerdan Gudgodaxga, Gudgodaxdan oqar suvlar oʻlkasi Yotbotoga borishdi.

⁸Egamiz: “Mening Ahd sandigʻimni koʻtarib yursin, Mening huzurimda xizmat qilsin, Mening ismim bilan odamlarni duo qilsin”, deb oʻshanda Levi qabilasini tanlab olgan edi. Ular bugungacha[76] ham shu xizmatni ado etib kelmoqdalar.

⁹Shuning uchun Levi qabilasiga birodarlari orasidan ulush ham, mulk ham berilmagan. Zotan, Levi qabilasining ulushi Egamizning Oʻzidir. Bu gapni Egangiz Xudoning Oʻzi aytdi.)

¹⁰Men yana oldingiday togʻda qirq kechayu qirq kunduz qoldim. Egamiz bu safar ham mening iltijoimni eshitib, sizlarni halok qilmaydigan boʻldi.

¹¹U menga shunday dedi: “Qani, xalqni boshla. Ularni Men ota — bobolariga qasam ichib va’da bergan yurtga olib bor. Ular oʻsha yurtga borib, uni qoʻlga kiritishsin.”

¹²Ey Isroil xalqi! Egangiz Xudo sizlardan bitta narsani talab qiladi: Egangiz Xudodan qoʻrqing, Uning yoʻlidan yuring, Egangiz Xudoni seving, butun qalbingiz bilan, jonu dilingiz bilan Unga xizmat qiling.

¹³Men bugun sizlarga berayotgan Egamizning amru farmonlariga rioya qiling, shunda baxtiyor boʻlasiz.

¹⁴Osmon va falak toqi, yer yuzi va undagi hamma narsa Egangiz Xudonikidir.

¹⁵Ammo Egamiz faqatgina ota — bobolaringizga qattiq muhabbat qoʻydi. Mana bugun koʻrib turganingizday, ularning avlodini, sizlarni barcha xalqlar orasidan tanlab oldi.

¹⁶Yuraklaringizni sunnat qilinglar[77], bundan keyin oʻjar boʻlmanglar.

¹⁷Egangiz Xudo xudolarning Xudosidir, egalarning Egasidir[78], buyuk qudratli, qoʻrqinchli Xudodir. U tarafkashlik qilmaydi, pora olmaydi.

¹⁸Yetim va bevalarga adolat qiladi, musofirga mehribonlik qiladi, ularga non va kiyim beradi.

¹⁹Sizlar ham musofirlarga mehribon boʻlinglar, oʻzlaringiz ham Misrda musofir edingizlar.

²⁰Egangiz Xudodan qoʻrqinglar. Yolgʻiz Unga sajda qilinglar, Unga sodiq boʻlib, Uning nomi bilan qasam ichinglar.

²¹Faqat Unga hamdlar aytinglar, chunki U sizlarning Xudoyingizdir. Sizlar oʻz koʻzingiz bilan Uning buyuk va qoʻrqinchli alomatlarini koʻrdingiz.

²²Misrga borgan ota — bobolaringiz yetmish kishi[79] edi, xolos. Endi esa Egangiz Xudo sizlarni osmondagi yulduzlar kabi son — sanoqsiz qildi.