Read Uzbek Muqaddas Kitob Qonunlar 18 Bible Online

Qonunlar 18 - Uzbek Muqaddas Kitob bible

Qonunlar 18

¹Levi ruhoniylari, butun Levi qabilasi qatorida, Isroilda ulush ham, mulk ham olmaydilar. Ular Egamizga keltirilgan nazr va qurbonliklardan yeydilar.

²Birodarlari orasida ularning ulushi boʻlmaydi. Egamiz Levi qabilasiga: “Men Oʻzim sizlarning ulushingiz boʻlaman”[104], deb va’da bergan edi.

³Qurbonlik qilingan mol yoki qoʻyning yelka, jagʻ va ichak — chovoqlari ruhoniylarga berilsin.

⁴Gʻallangizning ilk hosilini, eng birinchi tayyorlagan sharobingizni va zaytun moyingizni, qoʻylaringizning birinchi qirqilgan yungini ruhoniylarga beringlar.

⁵Chunki Egangiz Xudo, Levi qabilasi va ularning avlodlari har doim Menga xizmat qilishsin, deb ularni qabilalaringiz orasidan tanlab oldi.

⁶Agar biror levi Isroildagi oʻzi yashab turgan shahardan Egamiz tanlagan joyga oʻz xohishi bilan borsa,

⁷u yerda Egamizga xizmat qilgan levi birodarlari singari, Egasi Xudo nomidan xizmat qila oladi.

⁸Oilasining mulkini sotishdan kelgan daromadi boʻlsa ham, boshqa levilar qatori bir xil ulush yesin.

⁹Egangiz Xudo beradigan yurtga kirganingizda, u yer xalqlarining jirkanch odatlarini oʻrganmanglar.

¹⁰Oʻgʻli yoki qizini olovda qurbon qiladigan[105], folbin, bashoratgoʻy, romchi, sehrgar,

¹¹issiq — sovuq qiladigan, arvoh chaqiruvchi, oʻliklardan maslahat soʻraydiganlar orangizda boʻlmasin.

¹²Egamiz bundaylardan jirkanadi. Mana shu jirkanch odatlari uchun Egangiz Xudo oʻsha xalqlarni sizning oldingizdan haydab chiqaryapti.

¹³Egangiz Xudoga butunlay sodiq qoling.

¹⁴Sizlar yurtini olayotgan oʻsha xalqlar bashoratgoʻylar va folbinlarning gapiga quloq soladilar. Sizlarning bunday qilishingizga esa Egangiz Xudo ruxsat bermaydi.

¹⁵Egangiz Xudo sizlar uchun oʻz xalqingiz orasidan menga oʻxshagan bir paygʻambar chiqaradi. Unga quloq solinglar.

¹⁶Siz Sinay togʻida[106] yigʻilgan kuningizda Egangiz Xudodan oʻzingiz uni tilab olgandingiz, zotan, siz shunday degan edingiz: “Egamiz Xudoning ovozini endi eshitmaylik, mana shu buyuk olovni ham boshqa koʻrmaylik, aks holda, oʻlamiz.”

¹⁷Oʻshanda Egamiz menga shunday dedi: “Ularning aytganlari toʻgʻri.

¹⁸Ular uchun oʻz xalqi orasidan senga oʻxshagan bir paygʻambar chiqaraman, Men unga nima aytishni oʻrgataman. Oʻsha paygʻambar bergan amrlarimning hammasini ularga aytadi.

¹⁹U Mening nomimdan gapiradi, unga quloq solmagan odamni Men Oʻzim jazolayman.

²⁰Ammo biror paygʻambar Men buyurmagan soʻzni Mening nomimdan gapirishga jur’at qilsa yoki boshqa xudolar nomidan gapirsa, u paygʻambar oʻlishi kerak.”

²¹Koʻnglingizda: “Bu soʻzlar Egamizdanmi yoki yoʻqmi, biz qanday qilib bilamiz?” deb oʻylashingiz mumkin.

²²Agar biror paygʻambar Egamizning nomidan gapirsa — yu, oʻsha voqea yuz bermasa, demak, bu soʻzni Egamiz aytmagan boʻladi. Paygʻambar oʻzicha gapirgan, undan qoʻrqmanglar.