Read Uzbek Muqaddas Kitob Qonunlar 22 Bible Online

Qonunlar 22 - Uzbek Muqaddas Kitob bible

Qonunlar 22

¹Birodaringizning adashib qolgan molini yoki qoʻyini koʻrib qolganingizda, oʻzingizni koʻrmaganga olmang, uni albatta egasiga qaytarib olib boring.

²Agar hayvonning egasi sizdan uzoqda yashasa yoki siz egasini tanimasangiz, uyingizga olib boring. Egasi kelib olib ketmaguncha unga qarab turing, keyin qaytarib bering.

³Birodaringizning eshagiga ham, kiyimiga ham, siz topib olgan har qanday narsasiga shunday munosabatda boʻling. Oʻzingizni koʻrmaganga olmang.

⁴Birodaringizning eshagi yoki hoʻkizi yoʻlda yotib qolganini koʻrsangiz, oʻzingizni koʻrmaganga olmang, ularni turgʻizishga yordam bering.

⁵Ayol erkakning kiyimini kiymasin, erkak esa ayolning libosini kiymasin. Bunday ish qiladiganlarning hammasidan Egangiz Xudo jirkanadi.

⁶Yoʻlda ketayotganingizda daraxtdagi yoki yerdagi qush iniga duch kelsangiz, qush tuxum bosgan yoki polaponlari bilan oʻtirgan boʻlsa, onasini bolalari bilan olmang.

⁷Oʻzingizga faqat polaponlarini olishingiz mumkin, onasini esa qoʻyib yuboring. Shunda baxtiyor boʻlib, umringiz uzoq boʻladi.

⁸Yangi uy qursangiz, tomingiz atrofida toʻsiq quring. Shunda birortasi tomingizdan yiqilib oʻlsa[109], oilangiz javobgar boʻlmaydi.

⁹Uzumzoringiz egatlariga boshqa turdagi urugʻ ekmang. Aks holda, uzumzoringizdan va ekkan urugʻingizdan olgan jamiki hosilni Egamizga bagʻishlashingizga toʻgʻri keladi.

¹⁰Hoʻkiz bilan eshakni birga qoʻshga qoʻshmang.

¹¹Ustingizga jun va zigʻirpoyadan aralashtirib toʻqilgan kiyimni kiymang.

¹²Toʻningizning etagiga popuk qilib osib yuring.

¹³Birortasi uylanib, qiz bilan yotgandan soʻng uni yoqtirmay qolsa,

¹⁴qizni yomon otliq qilib, men bu qizga uylandim, u esa qiz chiqmadi, deb bahona qilsa,

¹⁵qizning ota — onasi qizlik belgilarini oqsoqollarga koʻrsatish uchun shahar darvozasiga olib borsin.

¹⁶Qizning otasi oqsoqollarga shunday aytsin: “Qizimni mana bu kishiga uzatgan edim. Endi u qizimni yoqtirmay qolibdi.

¹⁷Qizingiz qiz chiqmadi, deb bahona qilyapti. Mana qizimning qizlik belgilari”, deb shahar oqsoqollari oldiga oʻsha matoni yoysin.

¹⁸Shahar oqsoqollari oʻsha kishini olib kelib, jazolasin.

¹⁹Oqsoqollar unga yuz boʻlak kumush[110] jarima solsinlar. U Isroil xalqining bokira qizini yomon otliqqa chiqargani uchun kumushni qizning otasiga bersinlar. Qiz u odamning xotini boʻlib qolaversin, u odam qizdan umri boʻyi ajralishi mumkin emas.

²⁰Lekin u odamning aytganlari toʻgʻri boʻlib, qiz bokira boʻlmasa,

²¹qizni otasining eshigi oldiga olib kelishsin. Shahar erkaklari u qizni toshboʻron qilib oʻldirsin. U otasining uyida yashagan paytda fohishalik qilib, Isroil xalqi orasida sharmandalarcha ish qildi. Shu tariqa orangizdan yomonlikni yoʻq qiling.

²²Agar biror erkak oilali xotin bilan yotsa va bu ma’lum boʻlib qolsa, ikkovi — xotin ham, xotin bilan yotgan erkak ham oʻldirilsin. Shu tariqa Isroildan yomonlikni yoʻq qiling.

²³Agar biron qiz unashtirilgan boʻlsa — yu, shaharda birortasi oʻsha qizni uchratib qolib, u bilan yotsa,

²⁴ikkovini ham oʻsha shaharning darvozasi oldiga olib kelishsin. Qiz shaharda boʻla turib, baqirmagani uchun jazolansin. Erkak esa birovning xotinini[111] sharmanda qilgani uchun jazolansin. Ikkovini ham toshboʻron qilib oʻldiring. Shu tariqa orangizdan yomonlikni yoʻq qiling.

²⁵Agar birorta erkak unashtirilgan qizni dalada uchratib qolib, uni ushlab zoʻrlasa, oʻsha qiz bilan yotgan erkaknigina oʻldirish kerak.

²⁶Qizga hech narsa qilmanglar. U qizning oʻlimga loyiq aybi yoʻq, bu xuddi birorta odam boshqasiga hujum qilib oʻldirgani kabidir.

²⁷Chunki oʻsha erkak qizni dalada ushlab olgan, qiz yordam soʻrab baqirgan boʻlishi mumkin. Ammo uni qutqaradigan hech kim boʻlmagan.

²⁸Agar birortasi unashtirilmagan qizni uchratib qolsa, qizni ushlab, u bilan yotsa, ammo ikkovini ushlab olishsa,

²⁹oʻsha qiz bilan yotgan kishi qizning otasiga ellik boʻlak kumush[112] berishi kerak. Qiz esa uning xotini boʻlsin. Oʻsha odam qizni sharmanda qilgani uchun umri boʻyi u qizdan ajralishi mumkin emas.

³⁰Hech kim otasining xotiniga uylanmasin, bunday qilib otasini sharmanda qilmasin.