Read Uzbek Muqaddas Kitob Qonunlar 25 Bible Online

Qonunlar 25 - Uzbek Muqaddas Kitob bible

Qonunlar 25

¹Ikki kishi janjallashganda, ular hakamlar oldiga kelsin. Hakamlar da’voga qarab, ulardan birini haq, ikkinchisini nohaq deb e’lon qilsin.

²Agar nohaq deb topilgan kishi kaltaklanishga loyiq boʻlsa, hakam aybdorni yotqizsin. Oʻz oldida aybiga koʻra, unga darra urdirsin.

³Aybdorga qirq darradan ortigʻi urilmasin. Aks holda, birodaringiz koʻzingiz oldida xoʻrlanadi.

⁴Gʻalla yanchayotgan[119] hoʻkizning ogʻzini toʻsmang.

⁵Agar birga yashayotgan aka — ukalarning bittasi oʻlsa — yu, uning oʻgʻli boʻlmasa, marhumning xotini begonaga turmushga chiqmasin. Marhumning akasi yoki ukasi bevani oʻziga xotin qilib olsin. Uning oldida qaynagʻalik vazifasini bajarsin.

⁶Oʻsha ayol tuqqan toʻngʻich oʻgʻil marhum aka yoki ukaning nomini olib yuradi. Shunda marhumning nomi Isroildan oʻchib ketmaydi.

⁷Agar oʻsha odam marhum akasi yoki ukasining bevasiga uylanishni xohlamasa, beva ayol shahar darvozasiga borib, oqsoqollarga aytsin: “Qaynagʻam tugʻishganining nomini Isroil xalqi orasida tiklashni rad qilyapti, men uchun qaynagʻalik vazifasini bajarishni istamayapti.”

⁸Shunda shahar oqsoqollari oʻsha odamni chaqirib, u bilan suhbatlashsin. Agar oʻsha odam: “Men bu ayolga uylanishni xohlamayman”, deb turib olsa,

⁹beva ayol qaynagʻasining yoniga borsin. Shahar oqsoqollari oldida uning chorigʻini yechsin, soʻng uning yuziga tupurib, aytsin: “Birodarining naslini tiklashni xohlamagan odamga shunday qilinadi.”

¹⁰Isroil xalqi orasida u odamning xonadoni “chorigʻi yechilgan” deb nom oladi.

¹¹Ikki kishi bir — biri bilan urishayotganda, ulardan birining xotini kelib, erini qutqarish maqsadida narigi erkakning nozik joyidan ushlasa,

¹²oʻsha ayolning qoʻli kesib tashlansin. Unga rahm qilmanglar.

¹³Qadoq toshlaringiz toʻgʻri boʻlsin, biri ogʻir, biri yengil boʻlmasin.

¹⁴Uyingizdagi oʻlchov kosalarning hajmi toʻgʻri boʻlsin, biri katta, biri kichik boʻlmasin.

¹⁵Toshlaringiz halol va toʻgʻri boʻlsin, oʻlchovlaringiz ham halol va toʻgʻri boʻlsin. Shunda Egangiz Xudo sizlarga beradigan yurtda umringiz uzoq boʻladi.

¹⁶Gʻirromlik qiladiganlarning hammasidan Egangiz Xudo jirkanadi.

¹⁷Misrdan chiqayotganingizda yoʻlda Omolek xalqi sizlarga nima qilganini[120] esingizdan chiqarmang.

¹⁸Sizlar charchab, holsizlanib qolganingizda, ular Xudodan qoʻrqmay sizlarga hujum qilgan edilar. Orqangizda kelayotgan hamma holdan toyganlarni oʻldirgan edilar.

¹⁹Egangiz Xudo sizlarga yurtni mulk qilib berganda, dushmanlaringizni yengib, har tarafdan osoyishtalik ato qilganda, Omolek xalqini halok qilib, ularning nomini yer yuzidan oʻchiringlar. Bunday qilishni unutmanglar!