Read Uzbek Muqaddas Kitob Qonunlar 27 Bible Online

Qonunlar 27 - Uzbek Muqaddas Kitob bible

Qonunlar 27

¹Muso va Isroil oqsoqollari xalqqa shunday buyruq berishdi: — Bugun men sizlarga berayotgan barcha amrlarga rioya qilinglar.

²Koʻp oʻtmay sizlar Egangiz Xudo beradigan yurtga kirasizlar. Sut va asal oqib yotgan bu yurtni[124] ota — bobolaringizning Xudosi sizlarga va’da qilgan. Sizlar Iordan daryosidan kechib oʻtganingizdan keyin, Ebal togʻiga[125] boringlar. Oʻsha yerga katta toshlarni oʻrnashtiringlar. Ularni suvab, bu qonunlarning nusxasini yozinglar.

⁵Oʻsha yerda Egangiz Xudoga atab, tosh qurbongoh quringlar. Qurbongohga temir asbob tekkizmanglar.

⁶Egangiz Xudoning bu qurbongohini yoʻnilmagan toshlardan quringlar. Qurbongoh ustida Egangiz Xudoga kuydiriladigan qurbonliklar keltiringlar.

⁷Tinchlik qurbonliklarini ham shu yerda keltirib, tanovul qilinglar. Egangiz Xudo oldida xursandchilik qilinglar.

⁸Oʻrnatadigan toshlarga bu qonunning hamma soʻzlarini yozishni unutmanglar. Ularni oʻqish oson boʻlsin.

⁹Shundan keyin Muso bilan levi ruhoniylari butun Isroil xalqiga aytdilar: — Tinchlaning, quloq soling, ey Isroil xalqi! Bugun sizlar Egangiz Xudoning xalqi boʻldingiz[126].

¹⁰Egangiz Xudoga quloq solinglar. Bugun men sizlarga berayotgan Uning amrlariga va farmonlariga rioya qilinglar.

¹¹Oʻsha kuni Muso xalqqa quyidagi buyruqni berdi:

¹²Iordandan oʻtganlaringizdan keyin, xalqni duo qilish uchun quyidagi qabilalar Garizim togʻida tursinlar: Shimoʻn, Levi, Yahudo, Issaxor, Yusuf, Benyamin.

¹³La’natlar oʻqish uchun esa quyidagi qabilalar Ebal togʻida[127] tursin: Ruben, Gad, Osher, Zabulun, Dan, Naftali.

¹⁴Levilar jamiki Isroil xalqiga baland ovoz bilan shunday desin:

¹⁵“Oʻyma yoki quyma but yasagan, uni yashirincha oʻrnatgan har qanday odam la’nati boʻlsin. Hunarmandlar qilgan bu butlardan Egamiz jirkanadi.” Butun xalq: “Omin”, deb aytsin.

¹⁶“Otasini yoki onasini hurmat qilmagan la’nati boʻlsin.” Butun xalq: “Omin”, deb aytsin.

¹⁷“Oʻz qoʻshnisining chegarasini surgan la’nati boʻlsin.” Butun xalq: “Omin”, deb aytsin.

¹⁸“Koʻr odamni yoʻldan adashtirgan la’nati boʻlsin.” Butun xalq: “Omin”, deb aytsin.

¹⁹“Musofir, yetim va bevalarga nohaqlik qilgan la’nati boʻlsin.” Butun xalq: “Omin”, deb aytsin.

²⁰“Otasini sharmanda qilib, uning xotini bilan yotgan la’nati boʻlsin.” Butun xalq: “Omin”, deb aytsin.

²¹“Birorta hayvon bilan jinsiy aloqa qilgan la’nati boʻlsin.” Butun xalq: “Omin”, deb aytsin.

²²“Otasining yoki onasining qizi bilan yotgan, oʻz opasi yoki singlisi bilan yotgan la’nati boʻlsin.” Butun xalq: “Omin”, deb aytsin.

²³“Qaynanasi bilan yotgan la’nati boʻlsin.” Butun xalq: “Omin”, deb aytsin.

²⁴“Odamni yashirincha oʻldirgan la’nati boʻlsin.” Butun xalq: “Omin”, deb aytsin.

²⁵“Begunohni oʻldirmoq uchun pora olgan la’nati boʻlsin.” Butun xalq: “Omin”, deb aytsin.

²⁶“Mana shu qonunga rioya qilmagan va uni bajarmagan la’nati boʻlsin.” Butun xalq: “Omin”, deb aytsin.