Read Uzbek Muqaddas Kitob Qonunlar 29 Bible Online

Qonunlar 29 - Uzbek Muqaddas Kitob bible

Qonunlar 29

¹Egamiz Isroil xalqi bilan Sinay togʻida[129] qilgan ahdidan tashqari, Musoga Moʻabda Isroil xalqi bilan ahd qilishni amr etgan edi. Muso butun Isroil xalqini yigʻib, oʻsha ahd shartlarini ularga quyidagicha tushuntirdi: Egamiz Misrda fir’avnni, uning a’yonlarini, butun yurtini koʻz oldingizda nimalar qilganini koʻrdingizlar.

³Ogʻir sinovlarning, dahshatli alomatu moʻjizalarning guvohi boʻldingizlar.

⁴Lekin shu paytgacha Egamiz sizlarga anglaydigan ong, koʻradigan koʻz, eshitadigan quloq bermadi.

⁵U sizlarni qirq yil sahroda olib yurdi. Shu davrda kiyimingiz eskirmadi, oyogʻingizdagi chorigʻingiz toʻzimadi.

⁶Non yemadingiz, sharob, oʻtkir ichimlik ichmadingiz. Bularning hammasini U Egangiz Xudo ekanligini bilishingiz uchun qildi.

⁷Mana shu yerga kelganimizda Xashbon shohi Sixoʻn bilan Bashan shohi Oʻg bizga hujum qilishdi. Biz jang qilib ularni yengdik.

⁸Ularning yerini tortib olib, Ruben va Gad qabilasiga hamda Manashe qabilasining yarmiga[130] mulk qilib berdik.

⁹Shunday ekan, qiladigan ishlaringiz oʻngidan kelishi uchun mana shu ahd shartlarini bitta qoldirmay bajaringlar.

¹⁰Bugun hammangiz — qabila boshliqlari, oqsoqollar, nazoratchilar, barcha Isroil erkaklari, bolalar, xotinlar, orangizdagi musofirlar, oʻtin yoruvchidan tortib, suv tortuvchilargacha Egangiz Xudo oldida turibsizlar.

¹²Bugun Egangiz Xudo bilan ahd qilasizlar. Bu ahdni Egangiz Xudo Oʻz qasami bilan muhrlaydi,

¹³toki bugundan boshlab sizlar Uning xalqi, U esa sizning Xudoyingiz boʻlsin. U bunday qilishini sizlarga va ota — bobolaringiz Ibrohim, Is’hoq va Yoqubga qasam ichib va’da qilgan edi.

¹⁴Mana, bugun sizlar biz bilan birga Egamiz Xudoning huzurida turibsizlar. Bu ahd va qasamyodni Xudo nafaqat biz bilan, balki hali dunyoga kelmagan avlodlarimiz bilan qilyapti.

¹⁶Misrda qanday turmush kechirganimizni, boshqa xalqlarning hududidan qanday qilib oʻtib kelganimizni sizlar bilasizlar.

¹⁷Ularning toshdan, yogʻochdan, kumushdan va oltindan yasalgan jirkanch butlarini koʻrdingizlar.

¹⁸Ehtiyot boʻling, oralaringizda Egamiz Xudodan yuragi sovigan, oʻsha xalqlarning xudolariga xizmat qiladigan erkak, ayol, nasl yoki qabila boʻlmasin. Oralaringizda zaharli, achchiq ildiz oʻsmasin.

¹⁹Bordi — yu, orangizdagi biror odam bu ahd shartlarini eshitib, koʻnglida: “Oʻzim xohlagan ishni qilsam ham, menga hech narsa qilmaydi”, deb oʻylasa, u hammaning boshiga birday kulfat keltiradi[131].

²⁰Egamiz bunday odamdan qattiq gʻazablanadi, uni kechirmaydi. Mana shu kitobda yozilgan ahdning la’natlari uning boshiga keladi, Egamiz uning nomini yer yuzidan oʻchiradi.

²¹Egamiz uni Isroil qabilalari orasidan ajratib oladi — da, mana shu kitobda yozilgan ahdning barcha la’natlarini uning ustiga yogʻdiradi.

²²Sizlardan keyingi avlod, sizlarning farzandlaringiz, uzoq yurtdan kelgan musofirlar Egamiz shu yurtga keltirgan ofatlar va xastaliklarni koʻradi.

²³Butun yurtni oltingugurt va tuz kuydirib tashlagan boʻladi. U yerga hech nima ekib boʻlmaydi, hech narsa unmaydi, hech qanday oʻt oʻsmaydi. Yurtingiz Egamiz gʻazab ustida yoʻq qilgan Sadoʻm, Gʻamoʻra, Adma va Zavoʻyim shaharlariga[132] oʻxshab qoladi.

²⁴Barcha xalqlar shunday deydi: “Nima uchun bu xalqning Egasi bu yurtni shunday ahvolga soldi ekan — a? Bunday gʻazab sochishning sababi nima ekan — a?”

²⁵Keyin ular shunday aytishadi: “Eh — ha, bu xalq ota — bobolarining Xudosi bilan qilgan ahdidan kechdi. Egasi ularni Misrdan olib chiqqanda ular bilan bu ahdni tuzgan edi.

²⁶Ular Oʻz Egasidan yuz oʻgirib, begona xudolarga xizmat qilishdi. Bunday qilishni Egasi ularga qat’iyan man etsa — da, ular hech foydasi tegmaydigan bu soxta xudolarga sajda etishdi.

²⁷Shu sababdan Egasi gʻazabini sochdi. Mana shu kitobda yozilgan la’natlarning hammasini bu yurtga yogʻdirdi.

²⁸U qattiq jahl bilan, kuchli qahr — gʻazab bilan xalqini oʻz yurtidan sugʻurib olib, boshqa yurtga uloqtirib yubordi. Ular bugungacha oʻsha yurtlardadir.”

²⁹Sirlar Egamiz Xudoga tegishlidir. Ammo U qonunni bizga ayon qildi, toki biz farzandlarimiz bilan bu qonun shartlariga to abad amal qilaylik.