Read Uzbek Muqaddas Kitob Qonunlar 31 Bible Online

Qonunlar 31 - Uzbek Muqaddas Kitob bible

Qonunlar 31

¹Muso butun Isroil xalqiga yuqoridagi soʻzlarni aytib boʻlgandan keyin,

²shunday dedi[134]: — Hozir 120 yoshdaman, men sizlarni janglarga boshlab bora olmayman. Egamiz menga: “Sen Iordanning narigi tomoniga oʻtmaysan”, deb aytgan.

³Sizlar Egangiz Xudoning boshchiligida Iordanning narigi tomoniga oʻtasizlar. Egangiz u yerda yashaydigan xalqlarni yoʻq qiladi. Sizlar ularning yurtiga egalik qilasizlar. Egamizning va’dasiga koʻra, Yoshua sizlarning yoʻlboshchingiz boʻladi.

⁴Egamiz Amor xalqining shohlari Oʻg bilan Sixoʻnni magʻlub qilib, ularning yurtini yoʻq qilganday, bu xalqlarni ham xuddi shunday yoʻq qiladi.

⁵Egamiz bu xalqlarni sizlarning qoʻlingizga topshiradi. Ularni xuddi men buyurganimday qilishingiz shart.

⁶Dadil va botir boʻlinglar, ulardan qoʻrqmanglar, vahimaga tushmanglar. Egangiz Xudoning Oʻzi sizlar bilan birga boradi, sizlarni tashlab ketmaydi, sizlarni tark etmaydi.

⁷Muso Yoshuani chaqirib, butun Isroil xalqi oldida unga shunday dedi: — Dadil va botir boʻl. Egamiz, bu yurtni ota — bobolaringizga, avlodlaringizga beraman, deb qasam ichib va’da qilgan. Bu xalq bilan oʻsha yurtga sen kirasan. Sen orqali ular oʻsha yurtni mulk qilib olishadi[135].

⁸Egamizning Oʻzi sening oldingda boradi, Uning Oʻzi sen bilan birga boʻladi, seni tashlab ketmaydi, tark etmaydi. Qoʻrqma, vahimaga tushma.

⁹Muso mana shu qonunni yozib, uni Egamizning Ahd sandigʻini olib yuradigan Levi avlodidan boʻlgan ruhoniylarga va Isroilning hamma oqsoqollariga berdi.

¹⁰Soʻngra Muso ularga shunday amr qildi: — Har yettinchi yilning oxirida, qarzlaringizdan kechish yili Chayla bayramini nishonlaganingizda[136] mana shu qonunni oʻqinglar.

¹¹Egangiz Xudoning tanlagan joyiga, Uning huzuriga yigʻiladigan jamiki Isroil xalqiga bu qonunni baland ovoz bilan oʻqib beringlar.

¹²Buning uchun erkagu ayolni, bola — chaqani, shahringizdagi musofirlarni, boringki, butun xalqni yigʻinglar. Ular eshitib oʻrganishsin, Egangiz Xudodan qoʻrqishsin. Mana shu qonunning barcha soʻzlarini bitta qoldirmay bajarishsin.

¹³Sizlar Iordanni kechib, mulk qilib oladigan yurtda yashar ekansiz, umringiz davomida shunday qilinglar. Toki qonunni bilmaydigan bolalaringiz qonunni eshitib, Egangiz Xudodan qoʻrqishni oʻrganishsin.

¹⁴Egamiz Musoga dedi: — Oʻliming yaqinlashib qoldi, Yoshuani chaqir, ikkovingiz Uchrashuv chodiriga kelinglar. Men unga koʻrsatmalarimni beraman. Muso bilan Yoshua Uchrashuv chodiriga borib turishdi.

¹⁵Keyin Egamiz chodirning kirish joyida, ustun shaklidagi bulut ichida koʻrindi.

¹⁶Egamiz Musoga aytdi: “Sening vaqti — soating yaqinlashib qoldi. Bu xalq esa boradigan yurtda Menga bevafolik qiladi, oʻsha yurtning begona xudolariga sajda qiladi. Ular Meni tark etadilar, ular bilan qilgan ahdimni buzadilar.

¹⁷Shunda ularga gʻazabimni sochaman, ularni tark etib, yuzimni oʻgiraman. Ular oson olinadigan oʻljaday boʻlib qolishadi, koʻp kulfat va ofatlar boshlariga kelgan kuni: «Xudoyimiz oramizda boʻlmagani uchun shu kulfatlar boshimizga tushmadimikin?!» deyishadi.

¹⁸Ular boshqa xudolarga ergashib, qilgan qabihliklari uchun, Men albatta ulardan yuzimni oʻgiraman.

¹⁹Endi quyidagi qoʻshiq soʻzlarini yozib ol. Uni butun Isroil xalqiga oʻrgat. Bu qoʻshiq doimo ularning ogʻzida boʻlsin, Isroil xalqiga qarshi Mening guvohim boʻlsin.

²⁰Men ularni, ota — bobolariga qasam ichib va’da berganimday, sut va asal oqib yotgan yurtga[137] olib kiraman. Ular yeb toʻyib semiradilar, keyin boshqa xudolarga yuz buradilar, oʻsha xudolarga xizmat qiladilar. Mendan yuz oʻgirib, ahdimni buzadilar.

²¹Boshlariga koʻp kulfat va ofatlar kelganda, bu qoʻshiq ularga qarshi guvoh boʻladi. Chunki ularning avlodlari bu qoʻshiqni ogʻzilaridan tushirmaydi. Men qasam ichib, va’da bergan yurtga ularni olib kirmasimdan oldin, hozirdanoq niyatlarini bilib turibman.”

²²Muso oʻsha kuni qoʻshiqni yozib, Isroil xalqiga oʻrgatdi[138].

²³Egamiz Nun oʻgʻli Yoshuaga shunday amr qildi: — Dadil va botir boʻl. Sen Isroil xalqini Men ularga va’da qilgan yurtga olib kirasan. Men sen bilan birga boʻlaman.

²⁴Muso qonunlarning hamma soʻzlarini oxirigacha yozib boʻlgach,

²⁵Egamizning Ahd sandigʻini olib yuradigan levilarga shunday buyruq berdi:

²⁶— Bu qonunlarni Egangiz Xudoning Ahd sandigʻi yoniga qoʻyinglar, oʻsha yerda sizlarga qarshi guvoh boʻlib tursin.

²⁷Men sizlarning itoatsizligingizni, oʻjarligingizni yaxshi bilaman. Borligimda Egamizga boʻysunmaysizlar — u, men oʻlganimdan keyin battar boʻlasizlar!

²⁸Qani, barcha qabila oqsoqollaringizni va nazoratchilaringizni oldimga yigʻib kelinglar. Men ularga shu soʻzlarni aytayin. Yer va osmon ularga qarshi guvoh boʻlsin.

²⁹Oʻlimimdan keyin sizlar buzilib ketishingizni, men koʻrsatgan yoʻldan chiqib ketishingizni bilaman. Boshingizga kulfatlar tushadi, chunki Egamizning oldida qabihliklar qilasizlar. Qilgan ishlaringiz bilan Uni gʻazablantirasizlar.

³⁰Muso jamiki Isroil jamoasi oldida quyidagi qoʻshiqni boshdan oxirgacha aytdi: