Read Uzbek Muqaddas Kitob Qonunlar 32 Bible Online

Qonunlar 32 - Uzbek Muqaddas Kitob bible

Qonunlar 32

¹Ey samo, quloq sol, men gapiraman. Ey zamin, ogʻzimdan chiqqan soʻzlarni eshit.

²Ta’limotim yomgʻir kabi yogʻsin, Soʻzlarim shudring kabi tushsin, Maysalarni siypalaydigan yomgʻir tomchilariday, Oʻtlar ustiga yogʻadigan moʻl yomgʻirday boʻlsin.

³Egamizning nomini ulugʻlayman! Xudoyimizning buyukligiga hamdlar oʻqing!

⁴U suyangan Qoyam, Uning ishlari komil, Hamma yoʻllari adolatlidir. Xudo sadoqatlidir, Unda yolgʻon yoʻq, U haq va odildir.

⁵Ammo sizlar Unga sodiq qolmadingiz! Ey buzuq va egri nasl, Endi sizlar Uning farzandlari deb atalmaysiz, Bu sizlarning isnodingizdir.

⁶Egamizga shunday qaytarasizmi, Ey ahmoq, nodon xalq?! U sizlarni yaratgan Otangiz — ku! Sizga shakl bergan Yaratuvchingiz — ku!

⁷Qadimgi kunlarni eslang, Uzoq oʻtmishni oʻylang. Otangizdan soʻrang, u sizlarga aytib beradi, Oqsoqollardan soʻrang, sizlarga gapirib berishadi.

⁸Xudoyi Taolo xalqlarga yerni boʻlib berganda, Odamzodni yer yuziga tarqatganda, Xalqlarning chegaralarini, Ilohiy zotlar[139] soniga koʻra, belgilagandi.

⁹Yoqub naslini esa Egamiz Oʻziga ulush qilib oldi, Isroilni Oʻz nasibasi qildi.

¹⁰Egamiz Isroilni sahrodan, Uvullaydigan dashtdan topib oldi. Uni Oʻz bagʻriga oldi, Unga gʻamxoʻrlik qilib, Koʻz qorachigʻiday saqladi.

¹¹Goʻyo burgut inidagilarni uygʻotib, Oʻz polaponlari uzra aylanganday, Qanotlarini yoyib, polaponlarini koʻtarganday, Qanotlari ustida ularni olib yurganday,

¹²Egamizning yolgʻiz Oʻzi Isroilni olib yurdi, Yonida boshqa xudo yoʻq edi.

¹³Yerning choʻqqilariga Isroilni hukmdor qildi, Dalaning hosili bilan uni toʻydirdi. Toshdan chiqqan asal bilan, Toshloq yerda oʻsgan zaytunlarning moyi bilan boqdi.

¹⁴Sigir qatigʻiyu echki suti bilan, Qoʻzichoq va qoʻy dumbasi bilan, Bashan qoʻchqoriyu buzoqlari goʻshti, A’lo bugʻdoy bilan boqdi. Uzumdan qilingan a’lo sharobdan ichirdi.

¹⁵Azizim Isroil[140] semirib, oʻjar boʻldi. U semirib, shishib ketdi, oxiri boʻkib qoldi. Oʻzini yaratgan Xudodan yuz oʻgirib, Oʻz najot Qoyasini xor qildi.

¹⁶Boshqa xudolarga sajda qilib, Uning rashkini keltirdi. Jirkanchli butlar bilan Uning gʻazabini qoʻzgʻatdi.

¹⁷Xudoga emas, jinlarga qurbonlik keltirdi. Bu xudolarni oʻzlari bilmas edi, Bu xudolar yaqinda paydo boʻlgan, Ota — bobolari ulardan qoʻrqmagan edi.

¹⁸Evoh, ey Isroil, seni tuqqan Xudoni eslamading, Seni dunyoga keltirgan Qoyani unutding.

¹⁹Egamiz bularni koʻrib, ularni rad etdi, Oʻz oʻgʻil — qizlari Uning gʻazabini keltirgandi.

²⁰U shunday dedi: “Bu xalqdan yuzimni oʻgiraman, Ularning ahvoli nima boʻlishini koʻraman. Axir, ular egri nasl, sadoqatsiz farzandlardir.

²¹Ular Xudo boʻlmagan butlar bilan rashkimni keltirdilar, Betayin xudolari bilan gʻazabimni qoʻzgʻatdilar. Men ham xalq boʻlmaganlar bilan ularning rashkini keltiraman, Aqlsiz bir xalq bilan gʻazabini qoʻzgʻataman.

²²Mening gʻazabimdan olov chiqadi, Oʻliklar diyorining[141] eng chuqur joyigacha yondiradi, Yerni, hosilini kuydiradi, Togʻ poydevorini kul qiladi.

²³Ularga kulfat ketidan kulfat keltiraman, Oʻqlarimni bitta qoʻymay ularga otaman:

²⁴Ochlik ularning sillasini quritadi, Isitma yondirib kuydiradi, Ofat jonlarini oladi. Yovvoyi hayvonlar ularni tilka — pora qiladi, Yerda sudraladigan ilonlar zahrini sochadi.

²⁵Koʻchalarda yigitu qizlarni qilich halok qiladi, Uylarda esa chaqalogʻu oq sochli keksalarni vahima oʻldiradi.

²⁶Ha, Men ularni sochib tashlagan boʻlardim, Odamlar orasidan ularning xotirasini oʻchirib yuborgan boʻlardim,

²⁷Ammo dushmanning mazaxidan hayiqdim, Gʻanimlar notoʻgʻri tushunmasin, dedim. «Isroilni Egasi emas, biz magʻlub qildik», deb Oʻylamasin dedim.”

²⁸Isroil aqlini yoʻqotgan, idroksiz xalqdir.

²⁹Agar ularda aql boʻlsa edi, tushunardi, Oqibati nima boʻlishini bilardi.

³⁰Ana, Egasi Isroilni tark etdi, Suyangan Qoyasi ularni dushmanga berib qoʻydi. Aks holda, bir kishi Isroilning mingtasini ta’qib qila olarmidi?! Ikki kishi Isroilning oʻn mingtasini hayday olarmidi?!

³¹Hatto dushmanlari tan oladi, Isroil xalqining Xudosi Qudratli Qoya ekanligini.

³²Isroilning dushmanlari uzum tokiga oʻxshar, Sadoʻm va Gʻamoʻra[142] dalalarida oʻsar, Uzumzorlarining mevasi zaharli, Uzumlari ogʻu singari achchiqdir.

³³Ularning sharobi ajdarho zahri, Ilonlarning qoʻrqinchli ogʻusidir.

³⁴Egamiz shunday deydi: “Men Isroil dushmanlarini Nimalar qilishni dilimda tutaman, Oʻshalarni xazinamda saqlayman.

³⁵Ularning oyoqlari chalishganda Men Oʻzim qasos va oʻch olaman. Ularning halokat kuni yaqindir, Ularning qismati hal boʻladi.”

³⁶Egamizning xalqi kuchdan qolganda, Erkinu erksizlar nobud boʻlganda, Egamiz Oʻz xalqini oqlaydi, Oʻz qullariga rahm — shafqat qiladi.

³⁷Shunda Egamiz Oʻz xalqidan soʻraydi: “Ishongan xudolaringiz qani?! Siz panoh olgan qoyangiz qani?!

³⁸Sizlar oʻshalarga qurbonlik yogʻidan yedirdingiz, Nazr sharobidan ichirdingiz. Endi ular kelib, sizlarga yordam bersin! Oʻshalar sizga qalqon boʻlib koʻrsin!

³⁹Bilib qoʻying, Men yagonaman! Mendan boshqa Xudo yoʻqdir. Oʻldiradigan Menman, Hayot beradigan ham Menman, Jarohat yetkazadigan Menman, Shifo beradigan ham Menman. Mening qoʻlimdan hech kim qutula olmaydi.

⁴⁰Men barhayot Xudo boʻlganim haqi, Qoʻlimni osmonga koʻtarib, ont ichib aytamanki,

⁴¹Men yaltiroq qilichimni charxlayman, Adolat oʻrnata boshlayman. Dushmanlarimdan qasos olaman, Mendan nafratlanganlarga qaytaraman.

⁴²Halok boʻlganlar va asirlarning qoni bilan Oʻqlarimni mast qilaman, Yov lashkarboshilarining kallalari bilan Qilichimni etga toʻydiraman.”

⁴³Ey ellar, Uning xalqi bilan birga shodlaning, U qullarining oʻlimi uchun oʻch oladi. Dushmanlaridan qasos olib, Yurti va xalqini gunohdan poklaydi.

⁴⁴Muso Nun oʻgʻli Yoshua[143] bilan birga bu qoʻshiqning barcha soʻzlarini ovoz chiqarib, xalqqa aytib berdi.

⁴⁵Muso mana shu soʻzlarning hammasini butun Isroil xalqiga aytib bergandan keyin,

⁴⁶ularga shunday dedi: — Bugun men sizlarni ogohlantirib, aytgan soʻzlarning hammasini yuragingizda saqlang. Bolalaringizga ham buyuring, mana shu qonunning soʻzlarini bitta qoldirmay bajarishsin.

⁴⁷Bu shunchaki quruq soʻzlar emas, balki sizlarning hayotingizdir. Mana shu soʻzlar tufayli sizlar mulk qilib oladigan Iordanning narigi tomonidagi yurtda uzoq yashaysizlar.

⁴⁸Egamiz oʻsha kuni Musoga shunday dedi:

⁴⁹— Aborim tizmasidagi Navo togʻiga chiq. Bu togʻ Yerixo shahri roʻparasidagi Moʻab yurtida joylashgan. U yerdan Men Isroil xalqiga mulk qilib berayotgan Kan’on yurtiga qara.

⁵⁰Akang Horun Xoʻr togʻida olamdan oʻtganday, sen ham oʻzing chiqadigan togʻda olamdan oʻtasan.

⁵¹Ikkovingiz Isroil xalqining oldida Menga sadoqatsizlik qilgan edingiz. Sizlar Zin choʻlida, Mariva suvlari boʻyidagi Kadesh yonida Isroil xalqiga muqaddasligimni namoyon qilmagan edingiz[144].

⁵²Shuning uchun sen oʻsha yurtni uzoqdan koʻrasan. Men Isroil xalqiga berayotgan oʻsha yerga sen kirmaysan.