Read Uzbek Muqaddas Kitob Qonunlar 34 Bible Online

Qonunlar 34 - Uzbek Muqaddas Kitob bible

Qonunlar 34

¹Muso Moʻab tekisligidan Navo togʻining choʻqqisiga chiqdi[157]. Navo togʻi Yerixo shahrining sharqida joylashgan Fisgax togʻ tizmasining[158] eng baland joyi edi. U yerdan Musoga Egamiz butun oʻlkani koʻrsatdi: shimoldagi Dan shahrigacha choʻzilgan butun Gilad oʻlkasini[159],

²hamma Naftali yerlarini, Efrayim va Manashe yerlarini, Oʻrta yer dengizigacha choʻzilgan butun Yahudo yerlarini,

³Nagav choʻli[160] va tekislikni. Bu tekislik Zoʻvar shahridan[161] to palmalar shahri boʻlmish Yerixogacha choʻzilgan edi.

⁴Egamiz Musoga dedi: — Men Ibrohim, Is’hoq, Yoqubga, sening avlodingga beraman, deb qasam ichib aytgan yurt mana shudir. Mana, bu yurtni oʻz koʻzing bilan koʻrding, lekin u yurtga kirmaysan.

⁵Egamiz aytganiday, Uning quli Muso oʻsha yerda, Moʻab yurtida vafot etdi.

⁶Egamiz uni Moʻabda, Bayt — Piyor shahrining yaqinidagi bir vodiyda dafn qildi. Muso dafn qilingan joyni hozirgacha hech kim bilmaydi.

⁷Muso vafot etganda 120 yoshda edi. Lekin koʻzlarining nuri hali soʻnmagan edi, gʻayrati yoʻqolmagan edi.

⁸Isroil xalqi Moʻab tekisligida Muso uchun oʻttiz kun aza tutdi. Muso uchun aza kunlari tamom boʻldi.

⁹Muso oʻlimidan oldin Yoshuaga qoʻl qoʻyib, uni yoʻlboshchi qilib tayinlagan edi. Nun oʻgʻli Yoshuani Xudo donolik ruhi bilan toʻldirdi. Isroil xalqi Yoshuaga boʻysundi, Egamiz Musoga buyurganlarning hammasini ular qildi.

¹⁰Isroilda Musoga oʻxshagan paygʻambar boshqa chiqmadi. Egamiz Muso bilan yuzma — yuz gaplashar edi.

¹¹Egamiz uni Misr yurtida fir’avnga, uning a’yonlari va butun xalqiga alomatu moʻjizalar koʻrsatish uchun yuborgan edi.

¹²Muso butun Isroil xalqi oldida buyuk qudratu haybatli ishlarni namoyon qilgandi.