Read Uzbek Muqaddas Kitob Qonunlar 8 Bible Online

Qonunlar 8 - Uzbek Muqaddas Kitob bible

Qonunlar 8

¹Bugun men sizlarga berayotgan amrlarni bitta qoldirmay bajaringlar, shunda yashaysizlar, koʻpayasizlar. Egamiz ota — bobolaringizga qasam ichib, beraman, deb va’da qilgan yurtga kirasizlar. Oʻsha yurtni mulk qilib olasizlar.

²Egangiz Xudo qirq yil davomida sizni sahrodan olib yurdi, oʻsha uzoq safarni yodingizda tutinglar. Egamiz yuragingizda nima borligini, Uning amrlarini bajarishingizni yoki bajarmasligingizni bilishi uchun sizlarni qiyinchiliklarga duchor qilib, sinadi.

³U sizlarni och qoldirdi, soʻng oʻzlaringiz koʻrmagan, ota — bobolaringiz ham koʻrmagan manna[62] bilan qorningizni toʻydirdi. U sizlarga inson faqat non bilan emas, balki Egamizning ogʻzidan chiqqan har bir soʻz bilan hayot ekanini oʻrgatish uchun shunday qildi.

⁴Mana shu qirq yil davomida kiyimlaringiz eskirib ketmadi, oyogʻingiz ham shishmadi.

⁵Endi shuni bilinglarki, inson farzandini qanday tarbiyalasa, Egangiz Xudo ham sizlarni shunday tarbiyalaydi.

⁶Egangiz Xudoning amrlariga rioya qilinglar. U koʻrsatgan yoʻldan yuringlar. Undan qoʻrqinglar.

⁷U sizlarni hosildor yurtga olib boradi, u yerda irmoqlar, buloqlar, vodiy va qirlarda yer ostidan chiqadigan suvlar bor.

⁸Bugʻdoy, arpa, uzum, anjir, anor, zaytun moyi va asal oʻsha yurtda moʻldir.

⁹U yerda toʻyib non yeysizlar, hech narsaga muhtoj boʻlmaysizlar. U yer shunday bir yurtki, qoyalardan temir, qirlaridan mis chiqarasizlar.

¹⁰Oʻsha yerda yeb toʻyganingizda, sizlarga bergan hosildor yurt uchun Egangiz Xudoni olqishlanglar.

¹¹Hushyor boʻlinglar, men bugun sizlarga aytayotgan Egamizning amrlarini, farmonlar va qonun — qoidalarini bajarmay qoʻymanglar. Egangiz Xudoni esingizdan chiqarmanglar.

¹²Yeb, toʻyganingizda, chiroyli uylar qurib, joylashganingizda,

¹³mol, qoʻylaringiz, oltin — kumushingiz va barcha mulkingiz koʻpayganda,

¹⁴gerdayib ketmanglar. Sizlarni Misrdagi qullikdan olib chiqqan Egangiz Xudoni esingizdan chiqarmanglar.

¹⁵U sizlarni zaharli ilonlar, chayonlarga toʻla oʻsha bahaybat va qoʻrqinchli sahrodan, suvsiz, taqir joylardan olib oʻtdi. U yerda sizlar uchun qoyadan suv chiqardi[63].

¹⁶Ota — bobolaringiz bilmagan manna bilan sahroda qorningizni toʻygʻizdi. Oqibatda sizlarga yaxshilik keltirish uchun sizlarni qiyinchiliklarga duchor qilib, sinadi.

¹⁷Xayolingizda: “Oʻz kuch — qudratim bilan mana shu boylikni topdim”, demanglar.

¹⁸Ammo Egangiz Xudoni doimo yodingizda tutinglar. Zero, boylikni topishga kuch bergan Egangizdir. Shunday qilib, U ota — bobolaringiz bilan qasam ichib, qilgan ahdini bugun bajarmoqda.

¹⁹Bugun men sizlarni jiddiy ogohlantiryapman. Agar Egangiz Xudoni unutib boshqa xudolarga ergashsangizlar, ularga xizmat qilib, sigʻinsangizlar, sizlar albatta yoʻq boʻlasizlar.

²⁰Egangiz Xudo boshqa xalqlarni oldingizdan yoʻq qilgani kabi, Uning amrlariga quloq solmaganingiz uchun sizlarni ham yoʻq qiladi.