Read Uzbek Muqaddas Kitob Yuhanno 10 Bible Online

Yuhanno 10 - Uzbek Muqaddas Kitob bible

Yuhanno 10

¹Iso dedi: “Sizlarga chinini aytayin: kim qoʻy qoʻrasiga eshikdan kirmay, boshqa yoʻldan oshib tushsa, u oʻgʻri va bosqinchidir.

²Eshikdan kirgan odam esa qoʻylarning choʻponidir.

³Qorovul unga eshikni ochib beradi. Qoʻylar uning ovoziga quloq soladi. U esa oʻz qoʻylarini nomma — nom chaqirib, tashqariga olib chiqadi.

⁴U oʻz qoʻylarini qoʻradan olib chiqqanda, ularning oldida boraveradi. Qoʻylar esa unga ergashadi, chunki ular choʻponning ovozini biladilar.

⁵Begona kishiga esa ergashmaydilar. Aksincha, begonaning ovozini tanimay, undan qochadilar.”

⁶Iso bu matalni aytib berganda, tinglovchilar U nima demoqchi ekanligini tushunmadilar.

⁷Shu sababdan Iso yana dedi: “Sizlarga chinini aytay: Men qoʻylar uchun eshikman.

⁸Mendan oldin kelganlarning hammasi oʻgʻri va bosqinchi edilar. Lekin qoʻylar ularga quloq solmadilar.

⁹Men eshikman. Kim Men orqali kirsa, najot topadi. U kirib chiqib, yaylov ham topadi.

¹⁰Oʻgʻri faqat oʻgʻirlash, boʻgʻizlash, barbod qilish uchun keladi. Men esa ularga hayot, farovon hayot berish uchun kelganman.

¹¹Men yaxshi choʻponman. Yaxshi choʻpon qoʻylari uchun jonini fido qiladi.

¹²Yollangan odam esa qoʻylarning na choʻponi, na egasidir. U boʻrining kelganini koʻrgach, qoʻylarni tashlab qochadi. Boʻri esa qoʻylarni talab, tumtaraqay qiladi.

¹³Yollangan odam shunchaki yollangan boʻlgani uchun va qoʻylar haqida qaygʻurmagani uchun qochadi.

¹⁴Men yaxshi choʻponman. Osmondagi Otam Meni va Men Otamni bilganimday, Men qoʻylarimni bilaman, ular ham Meni biladilar. Men qoʻylarim uchun jonimni fido qilaman.

¹⁶Bu qoʻrada boʻlmagan boshqa qoʻylarim ham bor. Ularni ham olib kelishim kerak. Ular ham Mening ovozimga quloq soladi, shunda bir suruv, bir choʻpon boʻladi.

¹⁷Men jonimni qaytib olish uchun uni fido qilaman, shu bois Otam Meni yaxshi koʻradi.

¹⁸Hech kim jonimni Mendan tortib ololmaydi. Men Oʻz ixtiyorim bilan uni fido qilaman. Jonimni berishga va uni qaytarib olishga hokimiyatim bor. Buni Menga Otam buyurgan.”

¹⁹Isoning bu soʻzlari tufayli, yahudiylar orasida yana kelishmovchilik kelib chiqdi.

²⁰Oralaridan koʻpchilik: — Uni jin uribdi, U aqldan ozgan! Nega Unga quloq solyapsizlar? — der edilar.

²¹Boshqalari esa: — Bu jin urganning soʻzlari emas. Jin koʻr odamning koʻzlarini ocha olarmidi?! — deb aytishardi.

²²Oʻsha vaqtda Quddusda Ma’badni bagʻishlash bayrami[97] nishonlanayotgan edi. Qish fasli edi.

²³Iso Ma’badda Sulaymon ayvoni[98] degan joyda aylanib yurar edi.

²⁴Yahudiylar Uning atrofini oʻrab oldilar. — Qachongacha bizni ikkilantirasiz? Agar Masih boʻlsangiz, bizga ochigʻini ayting, — deyishdi.

²⁵Iso ularga javob berdi: — Men sizlarga aytdim, ammo sizlar ishonmayapsizlar. Osmondagi Otam nomidan qilayotgan ishlarim kimligimni koʻrsatib turibdi.

²⁶Sizlar esa ishonmayapsizlar, chunki sizlar Mening qoʻylarimdan emassizlar.

²⁷Mening qoʻylarim ovozimga quloq soladi. Men ularni taniyman, ular esa Menga ergashib yurishadi.

²⁸Men ularga abadiy hayot beraman, ular hech qachon halok boʻlmaydilar. Hech kim ularni Mening qoʻlimdan tortib ololmaydi.

²⁹Ularni Menga bergan Otam hammadan buyukdir. Otamning qoʻlidan ularni tortib olishga hech kimning kuchi yetmaydi.

³⁰Men va Otam birmiz.

³¹Yahudiylar yana Isoni toshboʻron qilmoqchi boʻldilar.

³²— Men sizlarga Ota buyurgan koʻp xayrli ishlarni koʻrsatdim, ularning qaysi biri uchun Meni toshboʻron qilmoqchisizlar? — deb soʻradi Iso.

³³Yahudiylar Unga shunday deyishdi: — Xayrli ishingiz uchun emas, kufrligingiz uchun Sizni toshboʻron qilmoqchimiz. Siz odam boʻla turib Oʻzingizni Xudo deyapsiz!

³⁴Iso shunday javob qaytardi: — Sizlar oʻzlaringiz doim oʻqiydigan Muqaddas bitiklarda[99]: “Aytdimki, hammangiz xudolarsiz”[100], deb yozilgan emasmi?!

³⁵Oʻzlaringiz bilasizlar: Muqaddas bitiklarni oʻzgartirib boʻlmaydi. Xudoning kalomini olgan odamlar “xudolar” deb atalgan — ku!

³⁶Meni esa Otam Oʻzi uchun ajratib olib, dunyoga yuborgan. Men “Xudoning Oʻgʻliman[101]” deganim uchun kufrlik qilgan boʻlamanmi?!

³⁷Agar Men Otamning ishlarini qilmayotgan boʻlsam, Menga ishonmay qoʻya qolinglar.

³⁸Bordi — yu, Uning ishlarini qilayotgan boʻlsam, Menga ishonmasangiz ham, qilayotgan ishlarimga ishoninglar. Shunda Ota Menda va Men Otada ekanimni bilib, anglab olasizlar.

³⁹Ular yana Isoni ushlab olishga harakat qildilar, ammo Iso ularning changalidan qutulib qoldi.

⁴⁰Soʻng Iso Iordan daryosining sharq tomoniga, ilgari Yahyo odamlarni choʻmdirib yurgan joyga qaytib borib, u yerda qoldi.

⁴¹Uning oldiga koʻp odamlar kelishardi. Ular shunday deb aytishardi: “Yahyo hech qanday moʻjizali alomat koʻrsatmagan edi, lekin Yahyoning bu Odam haqida aytgan hamma gapi toʻgʻri chiqdi.”

⁴²Shunday qilib, oʻsha yerdagi koʻp odamlar Isoga ishondilar.