Read Uzbek Muqaddas Kitob Yuhanno 12 Bible Online

Yuhanno 12 - Uzbek Muqaddas Kitob bible

Yuhanno 12

¹Fisih bayramidan olti kun oldin Iso Lazarning qishlogʻi Baytaniyaga[111] bordi. Iso oʻsha Lazarni oʻlikdan tiriltirgan edi.

²Oʻsha yerda Isoga ziyofat hozirladilar. Marta xizmat qilib yurgan edi, Lazar esa Iso va mehmonlar bilan birga dasturxon oldida yonboshlagan edi.

³Shu payt Maryam bir shisha[112] toza, qimmatbaho sunbul moyini[113] olib kelib, Isoning oyoqlariga surtdi, soʻng sochlari bilan artdi. Uy atir moyning xushboʻy hidiga toʻlib ketdi.

⁴Isoning shogirdlaridan biri, Unga xiyonat qiladigan Yahudo Ishqariyot dedi:

⁵— Bu moyni uch yuz kumush tangaga[114] sotib, kambagʻallarga boʻlib bersa boʻlmasmidi?!

⁶U shu gapni kambagʻallarga qaygʻurgani uchun emas, balki oʻgʻri boʻlgani uchun aytdi. Pul qutisi Yahudoning nazoratida edi, qutiga solinadigan puldan u oʻgʻirlab turardi.

⁷Iso shunday dedi: — Maryamni tinch qoʻyinglar! Zotan, u Meni dafn kunimga tayyorladi[115].

⁸Kambagʻallar har doim sizlar bilan birga boʻladi. Men esa har doim ham sizlar bilan birga boʻlmayman.

⁹Bir talay yahudiylar Isoning Baytaniyada ekanligini bilib kelishdi. Ular nafaqat Isoni, balki Iso oʻlikdan tiriltirgan Lazarni ham koʻrishni istardilar.

¹⁰Bosh ruhoniylar Lazarni ham oʻldirishni rejalashtirgan edilar.

¹¹Chunki koʻp yahudiylar Lazar tufayli Iso tomoniga oʻtib, Unga imon keltirayotgan edilar.

¹²Ertasi kuni bayramga borgan bir talay xaloyiq Isoning Quddusga kelayotganini eshitib qoldi.

¹³Ular palma daraxti shoxlaridan[116] olishdi, Uni qarshi olgani chiqib, shunday deb hayqirishardi: “Tasanno! Egamiz nomidan kelayotgan Inson baraka topsin![117] Isroilning shohi muborak boʻlsin!”

¹⁴Iso bir xoʻtikni topib, unga mindi, xuddi Muqaddas bitiklarda yozilganday:

¹⁵“Ey Quddus xalqi[118], qoʻrqma! Mana, Shohingiz xoʻtikni minib kelyapti.”[119]

¹⁶Isoning shogirdlari avval buni tushunmadilar. Iso ulugʻlangandan keyingina ular bu soʻzlarning U haqda yozilganini va xalq xuddi yozilganidek qilganini esladilar.

¹⁷Iso Lazarni qabrdan chaqirib tiriltirganiga guvoh boʻlgan olomon Isoga ergashib, bu haqda hammaga aytardi.

¹⁸Isoning qilgan bu moʻjizali alomati haqida eshitgan koʻp odamlar Uni kutib olgani chiqqan edilar.

¹⁹Farziylar esa bir — biriga: — Qaranglar, qoʻlimizdan hech narsa kelmadi. Butun dunyo Uning ortidan bormoqda! — deyishardi.

²⁰Xudoga sajda qilish uchun bayramga kelganlar orasida ba’zi gʻayriyahudiylar[120] bor edi.

²¹Ular Filipning oldiga borib (Filip Jalilaning Baytsayda shahridan edi) shunday deb aytishdi: — Taqsir, biz Isoni koʻrmoqchimiz.

²²Filip borib, bu haqda Endrusga aytdi. Soʻng ikkalovi Isoning oldiga borib, Unga aytishdi.

²³Iso ularga shunday javob berdi: — Inson Oʻgʻli ulugʻlanadigan vaqt — soati keldi.

²⁴Sizlarga chinini aytayin: agar bugʻdoyning doni yerga tushib oʻlmasa, u bir donligicha qoladi. Agarda oʻlsa, koʻp hosil beradi.

²⁵Kim oʻz jonini sevsa, uni yoʻqotadi. Kim bu dunyoda oʻz jonidan voz kechsa, uni abadiy hayot uchun saqlab qoladi.

²⁶Kim Menga xizmat qilmoqchi boʻlsa, orqamdan yursin. Men qayerda boʻlsam, xizmatchim ham oʻsha yerda boʻlsin. Menga xizmat qilgan odamni osmondagi Otam hurmat qiladi.

²⁷Endi esa yuragim siqilib ketyapti. Nima ham der edim?! “Ey Ota, bu vaqt — soatdan Meni saqla”, deb ayta olarmidim?! Men shu vaqt — soat uchun kelganman — ku!

²⁸Ey Ota, Oʻz nomingni ulugʻlagin! Iso shunday deyishi bilanoq osmondan: — Men nomimni ulugʻladim, bundan keyin ham ulugʻlayman, — degan sado keldi.

²⁹U yerda turgan olomon bu sadoni eshitib, momaqaldiroq deb oʻyladi. Boshqalar esa: — Unga farishta gapirdi! — deyishdi.

³⁰Bunga javoban Iso dedi: — Bu sado Men uchun emas, sizlar uchun boʻldi.

³¹Endi bu dunyo hukm qilinadi, bu dunyoning yovuz hukmdori[121] haydab chiqariladi.

³²Men yerdan yuqoriga koʻtarilganimda, hammani Oʻzimga jalb qilaman.

³³Iso bu soʻzlarni qay yoʻl bilan oʻlishini bildirish uchun aytdi.

³⁴Xalq bunga javoban dedi: — Biz Tavrotdan, Masih abadiy yashaydi, deb eshitganmiz. Qanday qilib Sen, Inson Oʻgʻli yuqoriga koʻtarilishi kerak, deb aytyapsan? Inson Oʻgʻli kim oʻzi?

³⁵Iso ularga dedi: — Nur yana qisqa bir muddat sizlar bilan boʻladi. Nur borida yuringlar, tagʻin zulmat sizlarni qamrab olmasin. Zulmatda yuradigan kishi qayerga ketayotganini bilmaydi.

³⁶Nur hanuz sizlar bilan ekan, nurga ishoninglar, shunda nur farzandlari boʻlasizlar. Bularni aytib boʻlgach, Iso uzoqlashib, xalqdan yashirindi.

³⁷Iso xalqning koʻz oʻngida shuncha koʻp moʻjizali alomatlar yaratgan boʻlsa ham, ular Isoga ishonmas edilar.

³⁸Shu tariqa Ishayo paygʻambarning soʻzi bajo boʻldi: “Ey Egamiz, bizning xabarimizga kim ishondi? Sening qudratli kuching kimga ayon boʻldi?”[122]

³⁹Haqiqatan ham, ular ishona olmadilar. Negaki, Ishayo ular haqida yana shunday deb aytgandi:

⁴⁰“Egamiz ularning koʻzlarini koʻr qildi, Aqllarini oʻtmas qildi. Toki koʻzlari bilan koʻrmasinlar, Aqllari bilan anglamasinlar, Tagʻin Menga qaytib, shifo topmasinlar.”[123]

⁴¹Ishayo Masihning ulugʻvorligini koʻrgani uchun bu soʻzlarni aytgan edi.

⁴²Shunga qaramay, koʻp yahudiy yoʻlboshchilari ham Isoga imon keltirdilar. Lekin ular farziylar tufayli buni ochiqchasiga tan olmas edilar, chunki sinagogadan haydalishdan qoʻrqardilar.

⁴³Axir, ular Xudoning maqtovidan koʻra, insonning maqtovini yaxshi koʻrardilar.

⁴⁴Iso xitob qilib dedi: — Menga ishongan odam Menga emas, balki Meni Yuborganga ishongan boʻladi.

⁴⁵Meni koʻrgan odam Meni Yuborganni koʻrgan boʻladi.

⁴⁶Menga ishongan bironta odam zulmatda qolmasin deb, Men dunyoga nur boʻlib keldim.

⁴⁷Agar kim Mening soʻzlarimni eshitib, rioya qilmasa[124], Men uni hukm qilmayman. Men dunyoni hukm qilish uchun emas, najot berish uchun kelganman.

⁴⁸Meni rad qilib, soʻzlarimni qabul qilmagan odamni hukm qiluvchi bor. Unday odamni oxiratda Men emas, aytgan soʻzim hukm qiladi.

⁴⁹Zotan, Men Oʻzimcha gapirganim yoʻq. Meni yuborgan samoviy Ota nima aytishimni, qanday gapirishimni Menga amr etgan.

⁵⁰Uning amri esa abadiy hayot berishini bilaman. Xullas, nima aytayotgan boʻlsam, Otam Menga aytganday sizlarga aytyapman.